इलाम १ : झलनाथ खनाललाई सत्ता गठबन्धनको भर, एमालेको आश

राजनीति

राजनीतिक ब्यूरो सोमबार, भदौ २७, २०७९ १३:१२

काठमाडौं- एकीकृत समाजवादीका 'सम्मानित नेता' झलनाथ खनाल इलाम- १ बाट निर्वाचित सांसद हुन्। एमालेका अध्यक्ष र सोही पार्टीबाट प्रधानमन्त्री समेत भइसकेका नेता खनाल एमाले विभाजन भएर गठन भएको एकीकृत समाजवादीको नेतृत्व तहमा छन्।

खनालले २०७४ को निर्वाचनमा सो क्षेत्रबाट ३६ हजार ८०५ मत ल्याएर विजयी भएका थिए। जबकि, निकटतम प्रतिद्वन्द्वी कांग्रेसका भूपेन्द्र कट्टेलले १९ हजार ६३८ मत मात्र पाएका थिए।

इलाम- १ मा सन्दकपुर गाउँपालिका, माईजोगमाई गाउँपालिका, सूर्योदय नगरपालिका र रोङ्ग गाउँपालिकाका सबै वडाहरू पर्छन्। त्यस्तै, माई नगरपालिकाकाका वडाहरु १, २, ३, ४, ५, ९, र १०, तथा इलाम नगरपालिकाको वडा १० पर्छन्।

बैशाखमा सम्पन्न स्थानीय तह निर्वाचनमा इलाम १ अन्तर्गतका वडाहरुमा वडा अध्यक्षका उम्मेदवारहरुले पाएको एकीकृत मतमा एमाले अगाडि छ। एमालेले २६ हजार २३३, कांग्रेसले २५ हजार ७७२, एकीकृत समाजवादीले १० हजार ४२९, माओवादी केन्द्रले एक हजार २३५, राप्रपाले एक हजार १६९ र अन्य दल तथा स्वतन्त्र उम्मेदवारहरुले ३ हजार ८०५ मत पाएका छन्।

स्थानीय तहको मत ट्रेन्ड हेर्दा खनाल त्यहाँका कमजोर उम्मेदवार देखिन्छन्। तर, सत्ता गठबन्धनका दलहरुबीच तालमेल भएमा उनी बलिया बन्छन्। उनले मुख्यगरी कांग्रेसका मतदाताको भर पर्नुपर्ने देखिन्छ। एमाले हाराहारी मत ल्याएको कांग्रेसको मत जति सहज रुपमा 'ट्रान्सफर' हुन्छ, खनालको संसद् यात्राको निरन्तरता उति बलियो बन्छ।

खनाल इलामबाट २०४८, २०५१, २०६४, ०७० र ०७४ को निर्वाचनमा विजयी भएका थिए। त्यसैले उनको व्यक्तिगत प्रभाव पनि सो क्षेत्रमा राम्रै मानिन्छ। कतिसम्म भने २०६४ मा पार्टीका नेतृत्व तहका अधिकांश नेताहरु हार्दा पनि उनी विजयी भएका थिए।

खनाललाई एमाले कार्यकर्ताको पनि आशा छ। विगतमा आफ्नै कार्यकर्ताको रुपमा भरथेग गरेको र उकेरा लगाएका कार्यकर्ताले उनलाई सहयोग गर्न पनि सक्छन्। तर, पार्टी विभाजनको आलो घाउमा उनको आशा कति सान्दर्भिक होला, त्योचाहिँ निर्वाचनले नै पुष्टि गर्नेछ।

चर्चा गर्नुपर्ने विषय अर्को पनि छ। समग्रमा अन्य कैयौँ नेताहरुजस्तै ओझ र प्रभाव घट्दै गएका नेतामा पर्छन्, खनाल पनि। वर्षौंदेखिका सांसदप्रति अहिले आक्रोश व्यक्त भइरहेका छन्। यही पृष्ठभूमिका पार्टीगत मत कमजोर रहेको क्षेत्रमा प्रतिस्पर्धी बन्नु उनका लागि जोखिमरहित भने छैन।