काठमाडौं- गृहमन्त्री बालकृष्ण खाणको अध्यक्षतामा केन्द्रीय सुरक्षा समिति बैठक अपरान्ह गृह मन्त्रालयमा बसेको छ। आइतबार बसेको बैठकले मुख्यगरी तीन विषयमा छलफल गरी निर्णय गरेको छ।
गृह मन्त्रालयका प्रवक्ता फणिन्द्रमणि पोखरेलका अनुसार दार्चुला जिल्लामा शुक्रबार राति गएको बाढी पहिरोमा परी घाइते र विस्थापित भएकाहरूलाई उद्धार, राहत र पुनःस्थापना यथाशक्य गर्ने निर्णय बैठकले गरेको छ। विपद्बाबाट प्रभावितलाई खाद्यान्न सडकबाट पुर्याउन समस्या भएमा हेलिकोप्टरबाट यथाशक्य पुर्याउने निर्णय पनि बैठकमा भएको छ।
यस्तै, सोमबारबाट नेपाल भ्रमणमा आउने जनवादी गणतन्त्र चीनको राष्ट्रिय जनकंग्रेस स्थायी समिति अध्यक्ष ली चाङसुको सुरक्षा व्यवस्थाबारे सुरक्षा प्रमुखहरूले गृहमन्त्री खाणलाई जानकारी गराएका थिए।
गृहमनत्री खाणले अहिलेसम्म विदेशी उच्च पदस्थ अधिकारीहरू आउँदा आ-आफ्नो जिम्मेवारी अनुसारको सुरक्षा व्यवस्थामा कुनै कमी हुन नदिएको उल्लेख गर्दै यो भ्रमणमा पनि त्यो भन्दा चुस्त, दुरुस्त सुरक्षा व्यवस्था हुनेमा आफू विश्वस्थ रहेको बताए।
बैठकले मंसिर ४ गते हुने प्रतिनिधि सभा र प्रदेश सभा निर्वाचन सम्पन्न गर्न गृह मन्त्रालय र सुरक्षा निकाय मिलेर तयार गरेको ‘विशेष सुरक्षा योजना’ पारित गरेको प्रवक्ता पोखरेलले जानकारी दिए। त्यही सुरक्षा योजनाको आधारमा जिल्ला जिल्लामा पनि थप योजना बनाउन सक्ने पोखरेलले बताए।
बैठकमा गृहसचिव टेकनारायण पाण्डे, रक्षासचिव किरणराज शर्मा, नेपाली सेनाका रथी बालकृष्ण कार्की, नेपाल प्रहरीका महानिरीक्षक धिरजप्रताप सिंह, सशस्त्र प्रहरी बलका निमित्त महानिरीक्षक नारायणदत्त पौडेल, राष्ट्रिय अनुसन्धान विभागका प्रमुख यदुलाल खरेल गृहप्रवक्ता पोखरेललगायत सहभागी थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
