मधेशमा लगानी गर्न मुख्यमन्त्री राउतको आग्रह

समाचार

रासस आइतबार, भदौ २६, २०७९ १३:२६

धनुषा– मधेस प्रदेशका मुख्यमन्त्री लालबाबु राउतले दक्षिण कोरियामा रहेका युवालाई मधेशमा लगानी गर्न आग्रह गरेका छन्।

मधेशी समाज दक्षिण कोरियाले आइतबार आयोजना गरेको दक्षिण कोरियाबाट तराईमा हुन सक्ने लगानी सम्भाव्यतासम्बन्धी भिजुअल अन्तरक्रियामा उनले कृषि, पर्यटन, उद्योग र शिक्षा क्षेत्रमा लगानीका बृहत् सम्भावना रहेकाले सो अवसरलाई सदुपयोग गर्न आग्रह गरेका हुन्।

मुख्यमन्त्री राउतले लगानीको वातावरण निर्माण गर्न आफू जिम्मेवार भएर लाग्ने विश्वास दिलाए। आफ्नो माटोप्रति तपाईंहरूले देखाउनुभएको सद्‌भाव अनुकरणीय छ। मधेश सरकारको तर्फबाट तपाईंहरूलाई धन्यवाद दिन चाहन्छु’, मुख्यमन्त्री राउतले भने, ‘आउनुस्, लगानी गर्नुहोस्। वातावरण हामी दिन्छौँ। समृद्ध मधेश निर्माणको बाटोमा यहाँको सहयोगको अपेक्षा गरेका छौँ।’

प्रदेश सरकारले उद्योग ऐनमार्फत् लगानीको वातावरण सुनिश्चित गरिसकेको उनले स्पष्ट पारे। कार्यक्रममा दक्षिण कोरियामा रहेको एक सयभन्दा बढी युवाको सहभागिता रहेको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।