काठमाडौं- बागमती करिडोर क्षेत्रभित्र एउटा रेस्टुरेन्ट छ, जसको अगाडिपट्टि 'सुपो' लेखिएको ठूलो नाङ्लो झुण्ड्याइएको छ। त्यो नाङ्लो 'सुपो चिया चौतारी रेस्टुरेन्ट'को होडिङबोर्ड हो।
२० भन्दा बढी स्वादका चिया पाइने सो चिया चौतारीको मेन्यू पनि नाङ्लैमा दिइन्छ। जहाँ चियाका कप र खाजाका परिकार राखिएको हुन्छ।
सुपो चिया चौतारीमा चिया-कफी मात्र पाइँदैन, चाउमिन, मःम, रोल बर्गर, स्यान्डवीच जस्ता भेज र ननभेज खाजाका साथै मोहीबाट बनेको लेमाेनेड आइस टीको स्वाद पनि लिन पाइन्छ।
यो चिया चौतारीका सञ्चालक हुन् ज्योति पौडेल।
०००
पश्चिम नेपालका गुल्मी, अर्घाखाँची, पाल्पा, स्याङ्जा लगायतका जिल्लामा नाङ्लोलाई सुपो भनिन्छ। पश्चिम अर्घखाँचीमा जन्मेका पौडेलका हजुर-आमाहरुले सुपो भनेरै नाङ्लोलाई चिन्थे। नाङ्लो भन्दा बुझ्दैनथे।
अहिले सुपोको पहिचान हराउँदै गएको छ। कतिपयले त सुपोको अर्थ नै बुझ्दैनन्। त्यही हराउन लागेको सुपोलाई ब्राण्ड बनाउन लागिपरेका छन् पौडेल। भन्छन्, 'गाउँघरको सुपोको पहिचान नाङ्लोले खाइदियो। त्यसैले 'सुपो' लाई जोगाइराख्न मैले रेस्टुरेन्टको नाम नै सुपो राखें।'
केही वर्ष वैदेशिक भूमिमा पसिना बगाएर फर्केपछि सुपो चिया चौतारी रेस्टुरेन्ट खोलेका पौडेल आफ्नो रुचिको क्षेत्र र पढाइ होटल लाइन नै भएकाले यो व्यवसाय अपनाएको बताउँछन्। उनले २०७८ साल चैतबाट यो रेस्टुरेन्टको सुरुवात गरेका हुन्।
1662600552.jpg)
८ वर्षअघि स्नातक तहको अन्तिम परीक्षा दिएलगत्तै पौडेल रोजगारीका लागि संयुक्त अरब इमरिटस् (यूएई) पुगे। उनले त्यहाँको एउटा फाइभ स्टार होटलमा काम गरे। काम गर्दै जाँदा सेवा-सुविधा राम्रो हुँदै गयो। कमाइ राम्रो थियो।
'सबै ठिकठाक नै थियो। तर मन भने सधैं बेचैन। परिवारसँग छुटेर अर्काको देशमा काम गर्नु पर्दा छटपटी हुन्थ्यो। चाडपर्व आउँदा परिवार सम्झिन्थें। गाउँघर सम्झिन्थें,' पौडेल सुनाउँछन्, 'बरु नेपाल फर्किएर केही गर्न पाए हुन्थ्यो भन्ने मनमा लाग्थ्यो।'
यही सोचले नेपाल फर्किने निर्णय गरे उनले। नेपाल फर्किएपछि आफ्नो पढाइ र अनुभवका आधारमा रेस्टुरेन्ट खोल्ने सोच बनाएका थिए।
उनी नेपाल फर्केपछि पौडेलले काष्ठमण्डप कलेजमा होटल म्यानेजमेन्ट पढाउन थाले। ‘बिहान कलेज पढाउँथे तर दिउँसो खाली समय त्यत्तिकै बिताउनुपर्थ्यो। दिउँसो पनि केही गर्न पाए हुने भन्ने लाग्थ्यो। त्यसपछि केही समय अनलाइन विजनेस गरें,’ उनले भने।
उनी अनलाइबाट पर्सहरु बेच्थे। यो व्यवसाय राम्रो चलेको थियो। तर कोभिडका कारण लकडाउन भयो। लकडाउनकै समयमा पनि केही समय यही कामलाई निरन्तरता दिए।
'अब आफ्नै रुचिको काम गर्नुपर्छ भनेर मैले अनलाइन विजनेसको काम छोडेर होटल सञ्चालन गर्ने तयारी गरें,' पौडेल भन्छन्, 'धेरै ठाउँ हेरें। अन्तिममा बागमती करिडोर क्षेत्र रोजें। तीनकुनेको बाग्मती पुलदेखि दोभान क्षेत्रसम्म रहेको बाग्मती करिडोर क्षेत्रमा हरियाली बोटबिरुवा र पार्क समेत रहेकोले म आकर्षित भएँ।'
1662600553.jpg)
साथीसँग सल्लाह
रेस्टुरेन्ट खोल्ने पक्का भएपछि उनले साथीसँग सल्लाह गरे। उनी भन्छन्, 'होडिङबोर्ड अरुको भन्दा युनिक राख्नुपर्छ भन्ने सोच आयो। त्यसपछि सुपोको होङिबोर्ड राख्ने भएँ। रेष्टुरेन्टको नाम पनि सुपो नै राखियो।’
रेष्टुरेन्ट बनाउँदा उनले महँगा सामान प्रयोग गरेनन्। टेबुल, कुर्सी पनि खेर गइरहेका काठ प्रयोग गरेर बनाउन लगाए।
'फालेका डब्बा टिपेर रङ लगाई गमला बनाएँ। कबाडीबाट सस्तो मूल्यमा किनेर सजावटका सामान बनाएँ। थोत्रा टाएर ल्याएर मेच र राउण्ड टेबल बनाएँ। थोत्रा साइकलमा रङ भरेर बत्ति राखेर सजाएँ। सबै सामान कम खर्च लाग्ने मात्र प्रयोग गरें,' पौडेलले सुनाए।
आफ्नो चिया चौतारीमा चिया तथा खाजा खाएर फर्किएका ग्राहकहरु दोहोर्याएर आउने गरेको उनी बताउँछन्। यो रेस्टुरेन्टमा दैनिक चिया पिउन आउने ग्राहक धेरै छन्।
‘दैनिक चिया पिउन मात्रै दुई सयदेखि तीन सयसम्म ग्राहक आउँछन्। व्यवसाय राम्रो चलेको छ,’ उनले भने। उनको चिया चौतारीमा तीन जना कामदारले रोजगारी पाएका छन्।
1662600553.jpg)
‘यो एरिया हस्पिटालिटी विजनेस सेक्सन भएकाले ठूलाठूला रेस्टुरेन्ट पनि थपिइरहेका छन्। अब सेकेण्ड ठमेल वा सेकेण्ड झम्सिखेल बन्नेवाला छ यो क्षेत्र। करिअर र फ्युचर देखेर नै यहाँ लगानी गरेको हुँ,’ पौडेलले भने।
आफ्नो कामप्रति निकै लगनशील पौडेल सुपो चिया चौतारीको शाखा अन्य स्थानमा खोल्ने सोचमा छन्। काठमाडौंभित्रै अन्य शाखा खोल्ने उनको योजना रहेको उनले बताए।
विदेशमा बगाउने पसिना आफ्नै देशमा बगाउने हो भने यहीँ राम्रो आम्दानी गर्न सकिन्छ भने उदाहरण बनेका पौडेल युवाहरुलाई नेपालमै केही गर्न सुझाउँछन्।
भन्छन्, ‘नेपालमै छ असीमित पैसा। तर बुद्धि र विवेक प्रयोग गर्न भने जान्नु पर्छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
