पोखरा– पोखरा महानगरपालिकाका मेयर धनराज आचार्यसहितको जनप्रतिनिधिले गत जेठ १२ गते सपथ लिए । सपथ लिएसँगै पदभार ग्रहण गर्नुअघि पोखराको जिरोकिमि चोकदेखि हल्लनचोक सडक बिचका डिभाइडरमा फूल रोपे ।
त्यो बेला स्थायी प्रकृतिका करिब ३७५ फूलका बिरुवा रोपिएको थियो । सोही अवसर मेयर आचार्यले पोखरालाई फूलैफूलको सहर बनाउने उद्घोष गरेका थिए । तर रोपेको २ दिन नबित्दै केही फूलका बोट गायब भए । पुनः मेयर आचार्यले आफ्नै लगानीमा उत्तिकै संख्यामा पुग्ने गरी फूलका बिरुवा रोपेका थिए ।
शनिबार पोखरा महानगरमा मेयर आचार्यसहितका जनप्रतिनिधिले पदभार सम्हालेको १०० दिन पूरा भएको छ । आचार्यले १०० दिन पूरा भएको उपलक्ष्यमा पनि वृक्षरोपणै गरे । पोखरा सभागृहमा जापानी प्रजातिको बिरुवा रोपेपछि उनले आफ्ना उपलब्धि सार्वजनिक गरे ।
उनको त्यो वृक्षरोपणमा मात्रै सिमित रहेन । उनले एक घर एक बिरुवा अभियान पनि सञ्चालन गरे । उक्त अभियानअन्तर्गत हालसम्म २४ हजार फलफूलका विरुवा रोपिसकिएको छ । साथै विश्व वातावरण दिवसको अवसर पारेर कास्कीकोटमा वृक्षारोपण कार्यक्रम सम्पन्न गरे ।
आफ्ना सय दिने उपलब्धि सार्वजनिक गर्दा मेयर आचार्यले फूलैफूलको सहर पोखरा बनाउने सन्दर्भमा जोडे नै सडक व्यवस्थित गर्ने योजना पनि सुनाए । सडकमा स्मार्ट लाइट राख्ने, पोखराका नगर बसमा मेट्रोकार्ड लागु गर्ने र अहिले हुँदै आइरहेको सशुल्क पार्किङलाई निशुल्क बनाउने उद्घोष पनि गरे ।
अहिले पोखराका सडकमा गाडी तथा मोटरसाइकल सशुल्क पार्किङको व्यवस्था छ । पार्किङ शुल्क उठाउन महानगरपालिकाले निजी कम्पनीलाई ठेक्का दिएको छ । मेयर आचार्यका उपलब्धिको ५७ नम्बर बुँदामा भनिएको छ, ‘मौजुदा पार्किङको समय सकिएपछि सडकमा पार्किङ शुल्क उठाइने छैन भने पार्किङलाई सशुल्क पार्किङ क्षेत्र निर्माण गरिँदै छ भने करको दायरालाई फराकिलो बनाउन नीति लिइएको छ । यसै अनुसार रातो किताबमा व्यवस्थापन गरिएको छ ।’
गत मंसिर १४ गते सडक पार्किङका लागि पोखरा महानगरले ३ करोड १६ लाख ७० हजार रुपैयाँमा ठेकेदार कम्पनी फेवा सावित्री जेभीलाई ठेक्का दिएको छ । कम्पनीले पोखराका मुख्य सडकसहित १५ वटा सडकबाट पार्किङ शुल्क उठाउँछ ।
मोटरसाइकल र स्कुटरलाई दिनभरको १० रुपैयाँ, सार्वजनिक बसलगायत ठूला सवारी साधनलाई प्रतिघन्टा ३० रुपैयाँ, मझौला सवारीलाई २० रुपैयाँ पार्किङ शुल्क लिँदै आइरहेको छ ।
कोरियाली सरकार (कोइका) को सहयोगमा पोखराको समग्र यातायात क्षेत्रलाई व्यवस्थित गर्न यातायात गुरुयोजना तय गर्ने सम्झौता गरिएको जानकारी मेयर आचार्यले दिए । उनका अनुसार साझा बस सञ्चालन समितिसँग पोखरामा ५ वटा पब्लिक साझा इलेक्ट्रिक बस सञ्चालन गर्न र सबै पर्यटकीय गन्तव्यमा पुर्याउने कामका लागि समझदारी तय भएको हो ।
उन्यालो पोखरा अभियानअन्तर्गत पोखराका विभिन्न २३ वटा चोकहरुमा हाईमास्ट पोल र १५०४ वटा सडक बत्ती जडान अभियान सुरु भएकोे छ । आचार्यले पोखरामा इलेक्ट्रिक सार्वजनिक गाडी सञ्चालन हुने जानकारी दिएका छन् । उनले भने, ‘महानगरले सबै जसो पर्यटकीय गन्तव्यसम्म पुग्ने गरी ५ विद्युतीय सार्वजनिक बस चलाउने समझ्दारी भएको छ ।’ यातायात क्षेत्रको सुधारका लागि गुरुयोजना तय गरेको उनले जनाए ।
मातृ मृत्यु तथा नवजात शिशु मृत्युबाट बचाउन गर्भवती तथा सुत्केरी महिलाहरुका लागि ५० बेडको विश्रामस्थल सञ्चालन प्रक्रियाको शुभारम्भ गरिएको मेयर आचार्यले जानकारी दिए ।
स्कुल नर्सिङ कार्यक्रम पोखरा महानगरपालिका सञ्चालित सामुदायिक विद्यालयहरुमा अध्ययनरत विद्यार्थीहरुको नियमित स्वास्थ्य परिक्षण गर्ने गरी स्कुल नर्सिङ कार्यक्रम तथा आधारभूत स्वास्थ्य परीक्षण कार्यक्रम शुभारम्भ गरिएको महानगरले जनाएको छ । हालसम्म १ सय ७१ विपन्न नागरिकलाई जनही १ लाखको दरले उपचार सहयोग सिफारिस तथा क्षय, कुष्ठ, हात्तपाइले, डेंगू लगायत रोगका बिरामीको खोजी तथा उपचार गरिएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
