दाङ– तुलसीपुर–घोराही फोरलेन सडकको काम पुस १५ गते (डिसेम्बर)सम्म ३० प्रतिश गर्ने सहमति भएको छ ।
कामको जिम्मा लिएको श्रेष्ठ कन्ट्रक्सनले हालको कामलाई तीव्रता दिएर पुस महिनासम्म ३० प्रतिशतमा पुर्याउने सहमति जनाएको दाङका प्रमुख जिल्ला अधिकारी हिरालाल रेग्मीले जानकारी दिएका छन् । उनका अनुसार अहिलेसम्म १० प्रतिशत मात्र काम भएको छ।
त्यसैगरी निर्माण कम्पनीले १५ दिनभित्र सडकमा भएका सबै खाल्डाखुल्डी पुर्ने सहमति पनि भएको छ । सडक निर्माणको जिम्मा लिएको श्रेष्ठ कन्ट्रक्सनको तर्फबाट प्रतिनिधित्व गरेका इञ्जिनियर शेखर शर्माले तोकेको समयमा काम पुरा गर्ने प्रतिवद्धता जनाए।
सडकको कामलाई तीव्र्रता दिन जिल्ला समन्वय समितिका प्रमुखको समयोजकत्वमा घोराही, तुलसीपुर उपमहानगरका मेयर, सडक सुधार आयोजनाका प्रमुख, यातायात व्यवसायीका प्रतिनिधि, प्रमुख जिल्ला अधिकारी, निर्माण व्यवसायी रहने गरी समन्वय समिति समेत गठन गरिएको छ ।
समन्वय समितिले १५÷१५ दिनमा कामको अनुगमण गर्ने, बैठक बस्ने, काममा देखिएका असहजतालाई हटाएर सहजका लागि सहजीकरणको भूमिका निर्वाह गर्ने प्रजिअ रेग्मीले बताए ।
सडक निर्माणको काम सुस्त गतिमा भइरहेको व्यापक जनगुनासो आइरहेका बेला जिल्ला समन्वय समितिले सरोकारवाला पक्षलाई बोलाएर शुक्रबार दिउँसो छलफल गराएको हो ।
यता सडक सुधार आयोजनाका प्रमुख अर्जुन बमले सहमति गरेअनुसार प्रगति गर्न नसके सम्झौता तोड्ने चेतावनी दिए । अहिलेको काम गराएको गतिले निर्माण कम्पनी लक्ष्यमा पुग्न नसक्ने भन्दै बमले धरौटी जफत गरेर सम्झौता तोड्ने बताए ।
घोराहीको बबई खोलादेखि तुलसीपुरको हात्तीखौवासम्म २८ किलोमिटर सडक निर्माणका लागि तथ्य इञ्जिनियरिङ एण्ड इन्फ्रा प्रोजेक्टले नेपाल सरकारसँंग फोरलेन सडक निर्माणका लागि एक करोड २१ लाख अमेरिकी डलरमा सम्झौता गरेको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
