दाङ– जिल्लामा डेंगुको संक्रमणदर चार वर्षयताकै उच्च देखिएको छ। चार वर्षको तथ्यांक भन्दा डेढ महिनामा भएको संक्रमण दर उच्च देखिएको छ।
आर्थिक वर्ष ०७६/०७७ मा ७१ जनामा डेंगु संक्रमण भएका बिरामी भेटिएका थिए तर अहिले एकै दिनमा १५ देखि २० जनासम्म बिरामी आउने गरेको स्वास्थ्य कार्यालयले जनाएको छ।
त्यसयता सामान्य जस्तै बनेको यो रोग अहिले एकाएक बढ्दै गएको हो। स्वास्थ्य कार्यालय दाङका अनुसार त्यसवर्ष जिल्लामा महिलाभन्दा पुरूषमा धेरै डेंगुको समस्या देखिएको थियो। जसमा ४१ जना पुरूष र ३० जना महिलामा संक्रमण देखिएको छ।
आव ०७७/७८ मा १५ मा मात्रै डेंगु संक्रमण देखिएको थियो। जसमा ९ जना पुरूष र ६ जना महिला रहेका थिए। आव ०७८/७९ मा डेगु संक्रमणको संख्या ६ जना मात्रै थियो। यो तीन वर्षको तथ्यांकलाई हेर्दा डेंगुको संक्रमण कम भएको देखिन्छ। तीन वर्ष कम संक्रमण देखिएको डेंगु चौथो वर्षमा भने एकाएक बढेको छ।
चालु आर्थिक वर्षका ढेड महिनामा झण्डै सयको हाराहामीमा संक्रमण पुगेको छ। ह्वात्तै बढेको समेत छ। चालुु आर्थिक ०७९/८० को सुरूवातमै संक्रमणको अवस्था उच्च देखिनुले यसको जोखिम बढाएको छ।
दाङको घोराहीमा संक्रमण बढी देखिएको छ। घोराहीको राप्ती स्वास्थ्य विज्ञान प्रतिष्ठानमा मात्रै साउन २६ यता २१ दिनमा ८८ जनामा संक्रमण पुष्टी भएको छ। अहिले प्रतिष्ठानमा दैनिक सरदर पाँचजनामा डेंगु देखिने गरेको प्रतिष्ठानका सूचना अधिकारी निशानदाजु भट्टराईले बताए।
‘अस्पतालमा आउने ज्वरोका बिरामीहरूमध्ये लगभग सबैमा अहिले डेंगु देखिएको छ’, उनले भने, ‘प्रतिष्ठानमा यस वर्ष डेंगुका बिरामी बढेका छन्। यसमा एकदेखि दुई प्रतिशत मृत्यु दर भएकाले डेंगुबाट बच्न लामखुट्टेको टोकाइबाट बच्नुपर्ने चिकित्सकहरूको भनाइ छ।
घोराही उपमहानगरपालिका-१४ अटोभिलेजलगायत केही स्थानमा डेंगुको संक्रमण निकै बढेको छ। जसका कारण अहिले स्वास्थ्य सचेतनासँगै परीक्षण दर पनि बढाइएको छ। सरकारी तथा निजी स्वास्थ्य संस्थाहरूमा डेंगु परीक्षण गराउनेहरूको भीड लाग्ने गरेका छन्।
यस वर्षको सुरूवातमै संक्रमितको संख्या बढेकाले यसको नियन्त्रण र रोकथामका लागि सबैको सक्रियता आवश्यक रहेको स्वास्थ्य कार्यालय दाङले बताएको छ। डेंगुको रोकथामका लागि लार्भा नष्ट गर्ने अभियान उपयुक्त हुने स्वास्थ्य कार्यालय दाङका फोकलपर्सन कमल चन्दले बताए। यसभन्दा अगाडिका वर्षमा कोरोना र नियमित मौसमी वर्षाका कारण कम संक्रमण देखिएको उनले बताए।
‘खोप छैन, त्यसैले जोखिम छ, घरमा पानी जम्ने ठाउँ छ भने सफा राख्नुपर्छ, लामखुट्टेको टोकाइबाट बच्नुपर्छ’, घोराही उपमहानगर स्वास्थ्य उप शाखा प्रमुख नारायण घर्तीले भने, डेंगुको संक्रमण बढ्दै गएपछि घोराही उपमहानगर पालिकले अभियान नै सुरू गरेको छ। उपमहानगरका सबै वडामा डेंगु नियन्त्रणका लागि सचेतनामूलक अभियान थालेको उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
