काठमाडाैं- उच्च अदालत पाटनले मतपेटिका खरिदसम्बन्धी ठेक्कामा अन्तरिम आदेश जारी गरेको छ। उच्च अदालतका न्यायाधीश महेन्द्रनाथ उपाध्यायको एकल इजलासले अल्पकालीन अन्तरिम आदेश जारी गरेको हो ।
अयोग्य कम्पनीको बोलपत्रलाई निर्वाचन आयोगले स्वीकृत गरेको दाबीसहित ग्यावियोनेट इन्भारोमन्ट सोलुसनले दायर गरेको रिटमा पाटनले निर्वाचन आयोगको नाममा अल्पकालीन अन्तरिम आदेश जारी गरेको हो। बुधबार यस्तो आदेश जारी गरेपछि आदेश बिहीबार सार्वजनिक भएको हो ।
उच्चले मतपेटिकाको बोलपत्रसम्बन्धी कार्य जुन अवस्थामा रहेको छ त्यही अवस्थामा राख्नू भनी अल्पकालीन अन्तरिम आदेश जारी गरेको हो । मतपेटिका खरिदको ठेक्का प्रक्रियामा सबै मापदण्ड र प्रक्रिया पूरा गरी सहभागी भएका ६ कम्पनीमध्ये एक ‘ग्याविओनेट इन्भारोमेन्ट सोलुसन प्रालि’ले निर्वाचन आयोगमै पत्रकार सम्मेलन गरेर विरोध जनाएको थियो । उसले उच्चमा मुद्दा दायर गर्दै मतपेटिका खरिदसम्बन्धी सबै प्रक्रिया रोक्न आदेशको माग गरेको थियो । दुबै पक्षलाई छलफलका लागि भदौ १९ गते आइतबार बोलाएको छ ।
सो अवधिसम्मका लागि विपक्षी निर्वाचन आयोगको मतपेटिकाको बोलपत्रसम्बन्धी कार्य रोक्न अदालतले भनेको छ। आयोगले बनाएको मूल्याङ्कन समितिको प्रतिवेदनले समेत ‘शशीधर/काविल/ब्रिजटेक जेभी’ले महत्वपूर्ण दुई मापदण्ड पूरा नगरेका भनेको दाबी रिटमा गरिएको छ। तर, एकाएक आफ्नै मूल्याङ्कन समितिको प्रतिवेदनलाई समेत बेवास्ता गरी रहस्यमय ढंगले ‘शशीधर/काविल/ब्रिजटेक जेभी’लाई टेन्डर दिने कार्य भएको दाबी रिटमा गरिएको छ।
कम्पनीका डाइरेक्टर हेमन्त अग्रवालले मंगलबार निर्वाचन आयोग परिसरमै पत्रकार सम्मेलन गरी आयोग आफैंले तोकेको मापदण्ड पूरा नगरेको कम्पनीलाई दिन आर्थिक चलखेल भएको आरोप लगाएका थिए । आयोगले १७ करोड ८७ लाख ५० हजार (मु.अ.करसहित)को स्वीकृत लागत अनुमानका आधारमा टेन्डर आह्वान गरेको थियो ।
त्यसमा हिमालयन ट्रेडिङ विजिनेश कन्सर्न/एस गार्मेन्ट्स प्रालि जेभी, नेपाल हिमा ट्रेड लिंक प्रालि, केएस इन्टरनेशनल, एस.पी. एड लक्की ए.एस. जेभी, ग्याबिओनेट इन्भाइरोमेन्ट सोलुसन प्रालि र शशीधर/काविल/ब्रिजटेक जेभीले बोलपत्रमा सहभागी भएका थिए ।
सबैभन्दा महँगो कबोल रकम २० करोड २४ लाखको बोलपत्र नेपाल हिमा ट्रेड लिंक प्रालिले पेस गरेको थियो भने सबैभन्दा कम शशीधर/काविल/ब्रिजटेक जेभीले गरेको थियो । ग्याबिओनेटले १४ करोड ५६ लाख ४० हजार रुपैयाँ बराबरको कबोल रकम पेस गरेको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
