कास्की १: एमालेलाई विरासत जोगाउन कठिन

निर्वाचन विशेष

राजनीतिक ब्यूरो बिहीबार, भदौ १६, २०७९ १९:४२

काठमाडौं– कास्कीमा प्रतिनिधि सभातर्फ ३ वटा क्षेत्र छन्। अघिल्लो प्रतिनिधि सभा निर्वाचनमा ३ वटै क्षेत्रमा एमाले–माओवादी गठबन्धनका उम्मेदवार विजयी भएका थिए।

२०७४ सालको निर्वाचनमा क्षेत्र नम्बर १ मा वाम गठबन्धनबाट एमाले उम्मेदवार खगराज अधिकारी ३९ हजार २४२ मतसहित विजयी भएका थिए। नेपाली कांग्रेसका यज्ञबहादुर थापाले २५ हजार ८२६ मत प्राप्त गरेका थिए।

प्रतिनिधि सभाको अघिल्लो निर्वाचनमा जित निकालेको एमालेलाई आगामी मंसिरमा हुने निर्वाचनमा भने कास्की १ बाट जित निकाल्न सहज छैन।

स्थानीय तहको निर्वाचन २०७९ मा कास्की क्षेत्र नम्बर १ अन्तर्गत पर्ने पालिकामा वडाध्यक्षका उम्मेदवारले प्राप्त गरेको मतलाई आधार मान्दा एमाले कमजोर देखिन्छ। एक्लै बलियो रहेको कांग्रेसलाई गठबन्धनका अन्य दलको पनि साथ रहने हुँदा एमालेको सम्भवना झन् कमजोर देखिन्छ।

कास्की १ मा मादी गाउँपालिकाका सबै (७ वटा) वडा र रुपा गाउँपालिकाका (१२ वटा) तथा पोखरा महानगरपालिकाका १०, १२, १३, १४, २७, २८, २९, ३०, ३१ र ३२ गरी १० वटा वडाहरु पर्छन्। ३ पालिकाका गरी यो क्षेत्रहरूमा कुल २९ वटा वडाहरू रहेका छन्।

यी वडाहरूमा एमालेका वडाध्यक्षका उम्मेदवारले कूल २८ हजार ३४६ मत प्राप्त गरेका छन् भने माओवादी केन्द्रबाट वडाध्यक्षका उम्मेदवारले ३ हजार १७० मत प्राप्त गरेका छन्। नेपाली कांग्रेसबाट वडाध्यक्षका उम्मेदवारले ३१ हजार ७२ मत प्राप्त गरेका छन्। स्थानीय तहको निर्वाचनमा पनि कांग्रेस र माओवादी केन्द्रसहित गठबन्धनका दलले तालमेल गरेका थिए।

कास्की क्षेत्र नम्बर १ मा राप्रपाका वडाध्यक्षका उम्मेदवारले १ हजार ७३७, स्वतन्त्रले ४३५ र अन्य पार्टीका उम्मेदवारले ३९ मत प्राप्त गरेका थिए।

वडाध्यक्षहरुले प्राप्त गरेको मतलाई हेर्दा कास्की १ मा कांग्रेस सबैभन्दा ठूलो दल छ। गठबन्धनका नेकपा माओवादी केन्द्र, एकीकृत समाजवादी, जसपा र राष्ट्रिय जनमोर्चाको समेत मत जोड्दा एमालेसँगको मतान्तर झन् फराकिलो हुने देखिन्छ।

त्यसमाथि २०७४ सालको जस्तो राजनीतिक समीकरण नभएका कारण पनि एमालेलाई नतिजा आफ्नो पक्षमा पार्न झन् कठिन हुने देखिन्छ।

बदलिरहने कास्की १ को नतिजा
२०६४ सालयता भएका निर्वाचनको परिणामलाई हेर्दा कास्की १ को नतिजा कसैका लागि स्थायी नहुने चित्र देखिन्छ।

२०६४ सालमा भएको संविधान सभाको पहिलो निर्वाचनमा कास्की १ बाट नेकपा माओवादी केन्द्र (तत्कालीन नेकपा माओवादी)का देव गुरुङ विजयी भएका थिए। दुई ठाउँबाट विजयी गुरुङले पछि मनाङ रोज्दा २०६५ सालमा कास्की–१ मा उपनिर्वाचन भएको थियो। उपनिर्वाचनमा पनि माओवादीकै कृष्णबहादुर गुरुङ निर्वाचित भएका थिए।

२०७० सालमा भएको संविधान सभाको दोस्रो निर्वाचनमा कास्की १ ले कांग्रेसलाई रोज्यो। २०७० को निर्वाचनमा कांग्रेसका यज्ञबहादुर थापा विजयी भएका थिए।

२०६४ सालको प्रतिनिधि सभाको निर्वाचनमा नेकपा एमालेका उम्मेदवार विजयी भए। एमाले र माओवादी केन्द्र बीचको वाम गठबन्धनका उम्मेदवार एमाले नेता खगराज अधिकारी १३ हजार बढीको मतान्तरसहित विजयी भए।

कास्की १ का मतदाताको मनोविज्ञानले पनि अघिल्लो निर्वाचनको जस्तै नतिजा आफ्नो पक्षमा पार्न गाह्रो पर्ने एमालेका स्थानीय नेताहरुको भनाइ छ। त्यसमाथि ५ दलीय गठबन्धन एकातिर हुँदा जित निकाल्ने हम्मे पर्ने एमाले नेताहरुको मनस्थिति छ।

२०७९ को स्थानीय तहको निर्वाचनमा कास्की १ मा वडाध्यक्षहरुले प्राप्त गरेको मत:

राजनीतिक दल	प्राप्त मत
नेकपा एमाले	२८३४६
नेपाली कांग्रेस	३१०७२
नेकपा माओवादी केन्द्र	३१७०
राष्ट्रिय प्रजातन्त्र पार्टी	१७३६
स्वतन्त्र	४३५
जनता समाजवादी पार्टी	४४
अन्य	३९

वैशाखमा सम्पन्न स्थानीय तहको निर्वाचनपछि पनि मतदाताको संख्या थपिएको छ। नयाँ मतदाताको संख्या थपिएकाले उनीहरुको रोजाइले पनि आसन्न मंसिरमा हुने निर्वाचनको परिणामलाई प्रभावित पार्न सक्छ।