काठमाडौं- काठमाडौं महानगरकी उपप्रमुख सुनिता डंगोलले दी प्याखं (देवी नाच) द्यः छेँ (देवघर)को अनुगमन गरेकी छन्।
सोमबार सार्वजनिक निर्माण विभागका प्रमुख राम थापा, योजना अनुगमन तथा मूल्याङ्कन एकाइ प्रमुख नरेन्द्र विलास बज्राचार्यसहित उनी निरीक्षणका लागि पुगेकी हुन्। त्यस क्रममा वडाध्यक्ष न्हुच्छेकाजी महर्जन, वडा सदस्य हेराशोभा डंगोल र गुठियारहरु सहभागी थिए।
निरीक्षणका क्रममा उनले निर्माण शैली, यसको प्राविधिक पक्ष, तलाहरुको उपयोगजस्ता विषयमा जानकारी लिएकी थिइन्। देव घर महानगरपालिकाको वडा नं. १८ बिज्यापुननी, किलागलमा छ।
अनुगमनका क्रममा नाचका नायो, कजि र गुरुसहित गुठियारहरुले देव घर पुननिर्माण कार्य यथास्थितिमा गर्न नसकिने गुनासो गरे। उनीहरुको एउटै माग थियो, ‘अहिलेकै गतिमा काम गर्दा निर्माण सकिँदैन। देव घर निर्माण सम्पन्नताका लागि महानगरले थप सहयोग गर्नुपर्छ।’
गुठियारहरुको कुरा सुनिसकेपछि उपप्रमुख डंगोलले, कानुनले दिएको अधिकारभित्र रहेर सहयोग गरिने आश्वसन दिइन्। परम्परागत एवं तान्त्रिक नाच, बाद्यबादन, श्रृङ्गारजस्ता धार्मिक, सांस्कृतिक र सामाजिक क्रियाकलापले काठमाडौँका मूर्त सम्पदालाई जीवन्त बनाइ राखेकोले यस्ता सम्पत्तिको सुरक्षामा आफ्नो लक्ष्य स्पष्ट भएको उपप्रमुख डंगोलको भनाइ थियो।
मठ मन्दिर पुननिर्माण गर्दा काठ, धातु र ढुङ्गामा कुँदिने कलाका लागि महानगरको दररेट र बजारको भाउ नमिलेर समयमा काम हुन सकेन। देवी नाच देवघरका गुठियार नरेन्द्र महर्जनको भनाइ थियो। ‘कुमारीको प्रतीकका रुपमा राखिने मयुर झ्याल कुँद्न महानगरको दररेट अनुसार २० हजार रुपैयाँभन्दा बढी खर्च गर्न पाइँदैन। बजारमा ८० हजार रुपैयाँभन्दा कममा काम गर्ने कालीगढ पाइँदैन। यस्ता समस्याका कारण सम्पदाको मौलिकता कायम गराउन कठिन भयो।’ गुठियारहरुले कानुनी व्यवस्थासँग पुननिर्माणको बेमेलका प्रसङ्ग सुनाएका थिए।
1661784596.png)
त्यसक्रममा वडा १८ का अध्यक्ष एवं सम्पदा तथा पर्यटन समितिका संयोजक न्हुच्छेकाजी महर्जनले, देवघर पुननिर्माणका लागि वडाले महानगरसँग गर्नुपर्ने प्रशासनिक र प्राविधिक समन्वयमा कमी हुन नदिने बताएका थिए। ‘समयमा निर्माण सम्पन्न होस् भन्ने हाम्रो चाहना हो’ महर्जनको भनाइ थियो।
देवघरका कजि नातिकाजी महर्जनले भवन निर्माण सम्पन्न भएपछि देवी नाचसँग सम्बन्धित सांस्कृतिक र सामाजिक काम गर्न धेरै सहज हुने धारणा राखेका थिए। ६ करोड रुपैयाँ लागत अनुमान र योजना गरेर देव घर पुननिर्माण थालिएको हो। महानगरले यसका लागि पहिलो बर्ष १ करोड रुपैयाँ र क्रमागत योजनाअन्तर्गत दोस्रो वर्ष १ करोड रुपैयाँ विनियोजन गरेको थियो।
भवन ७ तलाको छ। देवी नाचमा ७ जना देवगण हुने भएकोले भवनलाई ७ तले बनाइने भएको हो। यस बर्ष इन्द्रजात्राका अवसरमा भोलिबाट नाच प्रदर्शन सुरु हुँदैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
