भैरहवा– सिद्धार्थनगर नगरपालिकाका नगर प्रमुख इश्तियाक अहमद खाँनले बेलहिया नाका हुंदै मुलुकमा भित्रिने पर्यटकहरुलाई आफूहरुले सम्मानसहित स्वागत गर्ने बताएका छन् ।
पर्यटन प्रहरी इकाई भृकुटीमण्डप, काठमाडौंले बेलहियामा आयोजना गरेको ‘पर्यटक सुरक्षा तथा पर्यटन प्रवर्द्धनमा व्यवसायी एवं स्थानीय नागरिकको भूमिका’ विषयक अन्तरक्रिया कार्यक्रमलाई सम्बोधन गर्दै उनले 'अतिथि देवाे भवः' नारालाई अनुशरण गर्दै अगाडि बढ्नुपर्ने बताए ।
‘मुलुकमा पैसा खर्च गर्नका लागि भारतीय र तेस्रो मुलुकबाट पर्यटकहरु आउँछन् तर हामीले उनीहरुलाई सम्मान गर्नुको साटो दुर्व्यवहार गर्छौंँ, जनु राम्रो होईन’, उनले भने, ‘पर्यटकलाई सम्मान नगरेसम्म नगर र मुलुकले फड्को मार्दैन ।’ उनले नगरपालिकामा फूलैफूलको शहर, हरियाली, स्वच्छ र सफा शहर, फोहोर व्यवस्थापन, छाडा चौपाया शून्य, पार्किङ व्यवस्थापन, व्यवसायिक भवन निर्माण, कारागार स्थानन्तरण हुने लगायतका योजनाहरु सुनाए।
उनले बेलहिया नाकाबाट मुलुकमा भित्रिने पर्यटकहरुलाई नाकामा गुलाब लगायतको फूल दिएर सम्मानसहित भित्र्याउने योजनाहरु रहेको भन्दै स्वागतले पर्यटकको प्रचारप्रसार र आगमनमा वृद्धि हुने बताए । उनले आफू पैसा कमाउन नभई नगरको विकास गर्नका लागि आएको दाबी गर्दै नगरको विकासमा साथ र सहयोग गर्न नगरवासीलाइ आग्रह गरे ।
बेलहिया नाकाको सौन्दर्यकरणसम्बन्धी कार्य भइरहेको तर आयोजना कार्यालयअन्तर्गत रहेको ६ लेन सडकको निर्माणमा भएको ढिलाइले नगरको योजना सञ्चालनमा समेत समस्या उत्पन्न भएको उनले बताए ।
कार्यक्रममा रुपन्देहीका प्रमुख जिल्ला अधिकारी भरतमणि पाण्डेले स्रोतसाधनको अभावमा पनि कामहरु भइरहेको बताउँदै प्रशासनको तर्फबाट हुन सक्ने सम्पूर्ण सहयोग गर्न तयार रहेको बताए । उनले रात्रिकालिन व्यवसाय संचालनका लागि कार्यविधि अन्तिम चरण पुगेको पनि बताए।
रुपन्देहीका प्रहरी प्रमुख एसपी रविन्द्र रेग्मीले सुरक्षाबिना केही कल्पना गर्न नसकिने भन्दै सुरक्षाको विकल्प सुरक्षा नै रहेको र त्यसमा सदैव तत्पर रहेको बताए । उनले आफ्नो स्थानको विकासका लागि सबैले सामाजिक उत्तरदायित्व अन्तर्गत भूमिका निर्वाह गर्नुपर्ने बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
