काठमाडौं– अख्तियार दुरुपयोग अनुसन्धान आयोगका पूर्व आयुक्त राजनारायण पाठकविरुद्धको भ्रष्टाचार मुद्दा विशेष अदालतमा अन्तिम सुनुवाइ सुरु भएको छ।
विशेष अदालतका अध्यक्ष श्रीकान्त पौडेल, न्यायाधीशहरु यमुना भट्टराई र शालिग्राम कोइरालाको इजलासमा सुनुवाइ सुरु भएको हो।
भ्रष्टाचार नियन्त्रणको जिम्मा पाएको अख्तियार दुरुपयोग अनुसन्धान आयोगले आफ्नै पूर्वआयुक्त पाठकविरुद्ध २०७५ साल चैतमा विशेष अदालतमा मुद्दा दायर गरेको थियो।
शुक्रबार मुद्दाको सुनुवाइ सुरु भएको र सरकारी कानुन व्यवसायीले बहस थालेका छन्। उनीहरुको बहस नै नसकिएकाले मुद्दा हेर्दा हेर्दैमा राखिएको छ। ७८ लाख घुस लिएको भिडिओ सार्वजनिक भएपछि उनीविरुद्ध अख्तियारले अनुसन्धान गर्दै भ्रष्टाचार मुद्दा दायर गरेको थियो।
तत्कालीन आयुक्त पाठकले भक्तपुर, चाँगुनारायणस्थित नेपाल इन्जिनियरिङ कलेजको स्वामित्व विवादसम्बन्धी उजुरी मिलाइदिने भनी उक्त कलेजका सञ्चालक लम्बोदरकुमार न्यौपानसँग ७८ लाख घुस लिएका थिए। अख्तियारको बयानमा पनि उनले उक्त घुस लिएको स्वीकार गरेका छन्। अख्तियारले आयुक्तसहित न्यौपानेविरुद्ध पनि मुद्दा दायर गरेको थियो।
दुवैजनाविरुद्ध ७८ लाख रुपैयाँ बिगो कायम गरी भ्रष्टाचार निवारण ऐन २०५९ बमोजिम जरिवाना र कैद सजाय माग अभियोगपत्रमा गरिएको थियो। आयोगले दायर गरेको मुद्दामा पाठकलाई जरिवाना र कैद सजायका साथै उनी अख्तियार दुरुपयोग अनुसन्धान आयोगको आयुक्त पदमा बहाल रहेकै अवस्थामा कसुर गरेको हुँदा थप सजायकोसमेत माग गरिएको छ।
अख्तियारले आफ्नै पूर्वआयुक्तले पदमा रहँदा घुस मागेको विषयमा पहिलोपटक अनुसन्धान गर्दै मुद्दा दायर गरेको थियो। पैसा दिएर पनि विवाद नमिलाइदिएपछि गोप्य रूपमा खिचिएको भिडिओ सार्वजनिक भएको थियो।
सुरुमा अख्तियारले उक्त अनुसन्धानलाई तामेलीमा राख्ने प्रयास गरेको थियो। तर भिडीयो सार्वजनिक भएपछि भने चासो देखाएर अनुसन्धान गर्दै मुद्दा दायर गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
