घोराही– स्वास्थ्य तथा जनसंख्या मन्त्रालयले १८ डायलायसिस मेसिन दाङ पठायो। राप्ती स्वास्थ्य विज्ञान प्रतिष्ठान घोराहीमा १० र राप्ती प्रादेशिक अस्पताल तुलसीपुरका लागि ८ मेसिन दाङ आइसकेका छन्। साउन १३ गते डायलायसिस मेसिन आएकोमा जडानको काम अगाडि बढेको छैन। जडान गर्न प्राविधिक नआएको राप्ती प्रादेशिक अस्पताल तुलसीपुरका डायलायसिस प्रमुख लीना बडेलको भनाइ छ।
मेसिन आएपनि अन्य सामग्री नआएको उनले बताए। रगत सफा गर्ने उपकरण आउनुपर्ने उनको भनाइ छ। ‘मेसिन त आए, तर अन्य सामग्री आउनुपर्छ,’ उनले भने, ‘प्राविधिक आउनुपर्छ, प्राविधिक नआउँदासम्म जडानको काम अघि बढ्दैन।’
अहिले राप्ती प्रादेशिक अस्पतालमा ५ डायलायसिस मेसिन छन्, जसबाट २३ जनाले सेवा लिइरहेका छन्। थप ८ मेसिन जडान भएमा ६० जनासम्म बिरामीले सेवा पाउने उनले बताए।
त्यस्तै, राप्ती स्वास्थ्य विज्ञान प्रतिष्ठानमा ५ मेसिन छन्। ५ मेसिनबाट अहिलेसम्म २५ बिरामीले सेवा लिइरहेकामा १० मेसिन थपिएसँगै यस क्षेत्रका धेरै बिरामीले सेवा पाउने सूचना अधिकारी निशानदाजु भट्टराईले बताए।
उनका अनुसार अहिले दुई चरणमा मात्रै सेवा दिने गरिएको छ। अब भने चौबीसै घण्टा सेवा दिन सकिन्छ। अहिले करिब ४० बिरामी उपचारको प्रतिक्षामा छन्।
लमही रोटरी क्लबको पहलमा डायलायसिस सेन्टर सञ्चालनमा छ। त्यहाँ अहिले ३० बिरामीले सेवा लिइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
