काठमाडौं–असोज ७ गतेबाट प्रदर्शनमा आउन लागेको नेपाली फिल्म ‘प्रेम गीत ३’ सोही दिन भारतमा पनि प्रदर्शनमा आउँदै छ। हिन्दी भाषामा डबिङ गरेर ‘विश्वजितम’ नामबाट प्रदर्शनमा आउन लागेको फिल्मको प्रचारका लागि हाल फिल्मका निर्देशक सन्तोष सेन, अभिनेता प्रदीप खड्का र अभिनेत्री क्रिष्टिना गुरुङलगायतको टोली भारत पुगेकाे छ।
केही दिनअघि भारत पुगेका उनीहरुले हाल भारतको महाराष्ट्र राज्यमा फिल्मको प्रचार गरिरहेका छन्। निर्देशक सेनले बताएअनुसार उनीहरु अझैं केही दिन भारतमा रहेर प्रचार गर्नेछन्।
‘प्रेम र गीतसँग महाराष्ट्रबाट यात्रा प्रारम्भ,’ सन्तोषले महाराष्ट्रबाट प्रचार सुरु गरेकाे बारे लेखेका छन्, ‘गाउँ-गाउँ, बस्ती-बस्ती आउनेछौं।’
भारतमा अजय कुमार प्रोडक्सनमार्फत् युएफओले वितरण गर्न लागेको यो फिल्मलाई नेपाली फिल्मका लागि अन्तर्राष्ट्रिय ढोका खोल्ने रुपमा हेरिएको छ। निर्देशक सेनकाअनुसार फिल्मको हिन्दी भर्जन ‘विश्वजितम’ को ट्रेलर केही दिनमा रिलिज गरिनेछ।
सेन र छेतेन गुरुङको निर्देशन रहेको फिल्ममा प्रदीप खड्का र क्रिष्टिनासँगै शिव श्रेष्ठ, मनिष राउतलगायतका कलाकारको अभिनय रहेको छ। फिल्मलाई मन्दिप गौतम र निर्देशक गुरुङले लेखेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
