काठमाडौं– देश कोरोना महामारीले ग्रस्त थियो। छिमेकी मुलुक भारतमा अभिनेता सुशान्त सिंह राजपुतको निधनले माहोल तताएको थियो। भारतीय फिल्म उद्योगमा नतावादको बहस सुरु हुँदा नेपालमा पनि उक्त बहसको बाछिटाहरु आइपुगे।
अभिनेत्रीद्वय नम्रता सापकोटा र साम्राज्ञी राज्यलक्ष्मी शाहले नेपालमा पनि नातावाद व्याप्त रहेको भन्दै सामाजिक सञ्जालमार्फत् अभिव्यक्ति दिएका थिए।
साम्राज्ञी कोरोना महामारीको नियन्त्रणका लागि सरकारले गरेको लकडाउन सुरु भएयता चर्चामा थिइन्। २०७७ असार २३ गते इन्स्टाग्राममार्फत् एक भिडियो सार्वजनिक गर्दै उनले आफूले चलचित्रमा काम गर्दा ‘लैंगिक भेदभाव’ भोग्नु परेको बताएकी थिइन्। उनले व्यक्ति केन्द्रित भएर नाम नदि पनि जिकिर गरेका तीन फिल्महरु ‘ड्रिम्स’, ‘ए मेरो हजुर २’ र ‘इन्टुमिन्टु लन्डनमा’ थिए।
साम्राज्ञीले सामाजिक सञ्जालमार्फत् आफूले ‘ड्रिम्स’को छायांकनको क्रममा ‘लैंगिक भेदभाव’ भोग्नु परेको बताएकी थिइन्। अन्य दुई फिल्मसँग सम्बन्धित व्यावसायिक कुराहरु सार्वजनिक गरेको भए पनि ‘ड्रिम्स’सँग सम्बन्धित रहेर साम्राज्ञीले सार्वजनिक गरेको अभिव्यक्तिले फिल्म क्षेत्रमा तरंग ल्याएको थियो।
त्यसैबीच ‘ड्रिम्स’ फिल्मका निर्मातासमेत रहेका भुवन केसीले साम्राज्ञीलाई सामाजिक सञ्जालमार्फत् अव्यावसायिक र गैर जिम्मेवार रुपमा जवाफ दिएका थिए।
सामाजिक सञ्जालमा भुवनले लेखेका थिए, ‘खान नपाएको भन्दै सामाजिक सञ्जालमा रोइकराई गर्ने हिरोइन अहिले कुन फिल्मको नाम बेचेर खाइरहेकी छिन्? जुन थालमा खाने, त्यही थालमा दुलो पार्ने? सामाजिक सञ्जालमा गर्ने बराबरको अभिनय फिल्ममा पनि गरे हुने नि।’
केसीको अभिव्यक्तिले विषयलाई थप गम्भीर बनाउँदै लगेको थियो। आफूमाथि केसीले गैरजिम्मेवार टिप्पणी गरेपछि साम्राज्ञीले सामाजिक सञ्जालमा अर्को भिडियो सार्वजनिक गरिन्। उनले भुवन केसीलाई ‘पर्भर्ट’ भएको आरोप लगाएकी थिइन्।
‘त्यो स्टेटस लेख्ने व्यक्तिले जापानमा अवार्ड कार्यक्रम हुँदा मलाई तँ त मेरो प्रोडक्ट हो, त्यो पुरानो कुरा कोट्याएर के फाइदा? तँ एउटा ठाउँमा पुगिसकिस् भन्दै सम्झाउन खोज्नु भयो’, उनले उक्त भिडियोमा भनेकी छिन्, 'तर, मलाई भित्र भित्र घिन लागिरहेको थियो। उहाँ मसित टाँसिन खोज्दै गालामै मुख ल्याएर बोलिरहनु भएको थियो। उहाँलाई अंकल भनेको मन पर्दैन्। मैले ‘हस् दाई’ भनेर धकेलिदिएँ। त्यसबेला उहाँले पर्भर्ट जस्तो व्यवहार देखाउनु भएको थियो। हि इज लिटरल्ली अ पर्भर्ट।’
साम्राज्ञीले भिडियोमार्फत् भनेको अभिव्यक्तिको अन्तिम वाक्यांश ‘हि इज लिटरल्ली अ पर्भर्ट’ थियो। अर्थात् केसीमाथि साम्राज्ञीले अरु कसैलाई असहज हुने गरि (विशेषगरि विकृत मनसायसहित) व्यवहार गर्ने व्यक्ति भएको आरोप लगाएकी थिइन्।
त्यस घटना यता भुवन र साम्राज्ञीबीच विभिन्न घटनाहरु भए। चलचित्र कलाकार संघमा उजुरीदेखि अदालतमा भुवन केसीले १० करोड रुपैयाँको क्षतिपूर्ति माग्दै उजुरी दिनेसम्मका घटनाहरु भए। केसीले आफूमाथि साम्राज्ञीले लगाएको आरोप निराधार भएको बताइरहँदा स्पष्ट प्रमाण भने पेस गरेका थिएनन्।
उनै केसीलाई सोमबार राति बसेको मन्त्रिपरिषद् बैठकले चलचित्र विकास बोर्डको जिम्मेवारी सुम्पिएको छ।
भुवन केसीलाई चलचित्र क्षेत्रमा चिन्ने र परिचितका बीच उनका अनेक किस्साहरु छन्। प्रायः उनी विवादमा आइरहने कलाकार हुन्। अभिनेत्रीहरु माथिको व्यवहारका कारण उनी धेरै पटक विवादमा तानिएका छन्। कुनै बेलाकी चर्चित अभिनेत्री सारङ्गा श्रेष्ठले केसीबारे भनेकी थिइन्, ‘भुवन केसी नभएको भए धेरै नायिका कुमारी नै हुन्थे होलान्।’
एकातिर केही वर्षअघि आफूमाथि लागेको दुर्व्यवहार र ‘पर्भर्ट’को आरोप र फिल्म उद्योगमा महिला कलाकारले लगाउने गरेको आरोपमा पर्ने गरेका केसीले चलचित्र विकास बोर्डको अध्यक्षमा राजनीतिक नियुक्ति पाउँदा सामाजिक सञ्जाल तथा सम्बन्धित क्षेत्रका व्यक्तिहरुले सरकारको निर्णयमाथि प्रश्न गरेका छन्।
लेखक अमृता लम्सालले चलचित्र विकास बोर्डमा केसीको नियुक्तिलाई लिएर ट्विटरमार्फत् आपत्ति जनाएकी छन्। केसी अध्यक्षमा नियुक्त भएसँगै सामाजिक सञ्जालमा उनले लेखेकी छन्, ‘बोल्यो भने प्रमाण ल्याउँ भन्छन्। दिने प्रमाण त छैन। तर, उहाँलाई बोर्ड अध्यक्षमा ल्याउन नाम चलेकै महिला अधिकारकर्मीसमेत लाग्नु भएको बजार हल्ला थियो। हुन त महिलामाथि हुने यौन हिंसा र दुर्व्यवहार, मिटुलाई कतिले पो गम्भीरतापूर्वक लिएका छन् र?’
सरकारले केसीलाई बोर्ड अध्यक्ष नियुक्त गरेर दुर्व्यवहार जस्तो संवेदनशील विषयको धज्जी उडाएको तर्क अहिले सामाजिक सञ्जालमा उठिरहेको छ।
सरकारले गरेको निर्णयले भुवन केसीले उनी आरोपित मुद्दामा सफाइ पाएको भन्ने सन्देश जाने किसिमको टिप्पणी भइरहेको छ। सौगात गौतमले ट्विटरमा लेखेका छन्, ‘कुनै पनि विषयको संवेदनशीलताको धज्जी उडाउने कसरी? केशव स्थापित र भुवन केसीमाथि लागेको आरोप उस्तै हो। एक जनालाई एमालेले मेयर नै बनाउन खोज्यो भने अर्कोलाई गठबन्धनले चलचित्र विकास बोर्डको अध्यक्ष बनायो।’
राजनीतिक रुपमा केसीले आफ्नो कित्ताकाट गर्दा सुरुवातमा एमाले निकट देखिएका थिए। चुनावमा उठ्ने हल्लाकाबीच एमालेमार्फत् राजनीति सुरु गरेका उनी केही महिनाअघि मात्रै नेपाली कांग्रेस प्रवेश गरेका थिए।
पार्टी परिवर्तन गरेको केही समयमा नै उनले राजनीतिक नियुक्ति पाउँदै बोर्डको अध्यक्ष भए। तर, चलचित्रकर्मी तथा सामाजिक अभियन्ताकाबीच भने केसीको नियुक्तिले सरकारले पीडकको साथ दिएको सन्देश गएको चर्चा भइरहेको छ।
ट्विटर प्रयोगकर्ता सुस्मिता बाँनियाले पनि मिटुको आरोप लागेकालाई सरकारले नियुक्ति गर्नु आपत्तिजनक भएको बताएकी छन्। उनले लेखेकी छन्, ‘मिटुको आरोप लागिरहँदा पनि चुनावी स्टन्ट बनाउँदै भुवन केसीलाई पार्टी प्रवेश गराएको नेपाली कांग्रेसले अहिले चलचित्र विकास बोर्डको अध्यक्षमा लगेर भर्ती गराउनु कुन नौलो कुरा भयो र? यतिबेला नेपाली कांग्रेसका नेतृहरुको नैतिक प्रश्न कता छ?’
त्यस्तै, ट्विटरमार्फत् प्रमित लिवाङ्गीले पनि भुवन केसीलाई बोर्डको अध्यक्ष बनाएर सरकारले यौनजन्य हिंसा गर्नेलाई साथ दिएको बताएका छन्। उनले लेखेका छन्, ‘भुवन केसीलाई चलचित्र विकास बोर्डको अध्यक्ष बनाएर यौनजन्य हिंसा, अझ कार्यस्थलमा हुने यौनजन्य हिंसामा राज्य, सरकार पीडकको साथ भएको बलियो प्रमाण दिएछ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1767836232.jpg){kind=logo}
-1786602170.png)
-1789631269.jpg)
