अवैध धन्दा सञ्चालन गरेको आरोपमा पक्राउ परेका चिनियाँ नागरिक। फाइल तस्बिर
काठमाडौं–आइतबार जिल्ला प्रहरी कार्यालय रुपन्देहीको टोलीले कल सेन्टरको नाममा ठगी धन्दा सञ्चालन गरेको आरोपमा ब्लु स्काई बिजनेश सोलुसन प्रालिमा छापा हान्यो।
रुपन्देहीको तिलोत्तमा नगरपालिका–२ जानकीनगरस्थित उक्त कल सेन्टरमा छापा हानेको प्रहरीले एक भारतीय नागरिकसहित ९ जना मुख्य योजनाकार भएको भन्दै पक्राउ गर्यो भने करिब २ सय कर्मचारीलाई नियन्त्रणमा लिएर सोधपुछ प्रक्रिया अघि बढायो।
कल सेन्टरको नाममा सामाजिक सञ्जालमार्फत् विभिन्न बहाना तथा प्रलोभन देखाएर ठगीको धन्दा सञ्चालन गरेको आरोपमा छापा मारिएको रुपन्देहीका एसपी रवीन्द्र रेग्मीले बताएका छन्।
यो गिरोहले सामाजिक सञ्जालमार्फत् चिट्ठा परेको भन्दै म्यासेज पठाउने र उक्त चिट्ठा तथा सामान लिनका लागि निश्चित रकम भन्सार शुल्क लाग्ने भन्दै रकम पठाउन लगाएर ठगी गरेको दाबी प्रहरीले गरेको छ। यसरी कल सेन्टरको नाममा ठगी धन्दा सञ्चालन गराउने मुख्य गिरोह चिनियाँ नागरिक रहेको प्रहरी दाबी छ । उनीहरुबाट प्रहरीले ल्यापटप, डेक्सटप, सीपीयू, मोबाइल, पेन ड्राइभ, विभिन्न हार्ड डिस्क, आइप्याडलगायतका सामान बरामद गरेको छ।
रुपन्देहीमा छापा मारेको भोलिपल्टै त्यही शैलीमा काठमाडौंमा पनि ठगी धन्दा भएको भन्दै प्रहरीले छापा मारेको छ। काठमाडौं महानगरपालिका–९ तीनकुनेस्थित गैह्रिगाउँमा चिनियाँ नागरिकले सञ्चालनमा गरेको स्काई वल्र्ड सर्भिस प्रालिमा जिल्ला प्रहरी परिसर काठमाडौंको टोलीले छापा मारेको छ।
कल सेन्टरबाट १ जना चिनियाँ नागरिकसहित ४१ जनालाई पक्राउ गरिएको जिल्ला परिसर काठमाडौंका एसएसपी भरत बोहराले बताएका छन्। सो क्रममा १४ जना महिला र २७ जना पुरुष पक्राउ परेका छन्। उनीहरुलाई नगर प्रहरी कार्यालय भृकुटीमण्डपमा राखिएको छ। यो घटनाको अपरेशन जारी रहेको र मुचुल्का उठाउने काम जारी रहेको प्रहरीले जनाएको छ।
प्रहरी स्रोतले नेपाल लाइभलाई जानकारी गराएअनुसार यो गिरोहले विभिन्न मोबाइल वालेटमार्फत् लोन दिने र त्यतिबेला उनीहरु बैंकिङदेखि तीन पुस्ते सबै विवरण लिने गरेका थिए। ती अधिकृतले उदाहरण दिँदै नेपाल लाइभसँग भने, ‘२० हजार लोन एक दिनका लागि भनेर दिइयो भने दिँदै १५ हजारमात्रै दिने। दिइएको हदम्याद (एक हप्ताभित्र) २० हजार फिर्ता गर्न नसके कल सेन्टरबाट युवतीहरुको प्रयोग गरी फोन गर्न लगाएर रकम तिर्न बाध्य पार्ने, तिर्न अटेर गरे विभिन्न धम्कीसमेत दिने गरेको पाइन्छ ।’
योभन्दा अघि गत असार १६ गते मात्रै जिल्ला प्रहरी कार्यालय कास्कीले पनि पोखरामा चिनियाँले सञ्चालन गरेको कम्पनीमा छापा मारेको थियो। ठगीको आरोपमा पोखरा–१७ ड्यामसाइटमा रहेको चिनियाँ नागरिकले सञ्चालन गरेको कम्पनीमा छापा मारेको थियो।
त्यतिबेला कास्की प्रहरीले तीन चिनियाँसहित एक नेपाली नागरिकलाई पक्राउ गरेको थियो। कम्पनी नै सञ्चालन गर्न नसक्ने आर्थिक अवस्थामा रहेका नुवाकोटका सुमन तामाङको नाममा न्यू डायमण्ड टेक्नोलोजी भनेर कम्पनी दर्ता गरेर उनीहरुले काम गरेको देखिएको कास्की प्रहरीका प्रवक्ता सुन्दर तिवारीले नेपाल लाइभलाई जानकारी दिए।
उनीहरुबाट विभिन्न डिभाइसहरु बरामद गरे पनि चिनियाँ नागरिकले के धन्दा गरेका थिए भन्नेबारे प्रहरीले केही खुलाउन सकेन। कास्की प्रहरीका एक अधिकृतले भने, ‘विभिन्न डिभाइस बरामद भए। हामीले सोधपुछ पनि गर्यौं तर के धन्दा सञ्चालन गरेका थिए भन्ने खुल्न सकेन।’
उक्त कम्पनीमा काम गर्ने ८९ जना नेपालीलाई समेत नियन्त्रणमा लिएर सोधपुछ गरिएको थियो। यति हुँदा पनि उनीहरुको धन्दा खुल्न सकेको थिएन। उनीहरुबाट ४५ लाख रुपैयाँ बरामद भएकाले उक्त रकमको स्रोत नखुलेको भन्दै राजस्व अनुसन्धान विभाग पठाइएको थियो भने भिजिट भिसामा नेपाल आएर काम गरेको भन्दै अध्यागमन कानून आकर्षित हुने भन्दै प्रहरीले अध्यागमनलाई कारबाहीका लागि सिफारिस गरेको थियो । तीन चिनियाँसहित चार जनालाई पक्राउ गरे पनि प्रहरीले उनीहरुलाई मुद्दा चलाउन सक्ने अवस्था आएन। जिल्ला न्यायाधीवक्तासँग रायसमेत माग गरेको प्रहरीले मुद्दा चलाउन सक्ने कुनै आधार नै फेला पार्न सकेन। प्रविधिमा पोख्त मानिएका चिनियाँबाट बरामद भएको डिभाइस फरेन्सिक ल्याबमा जाँचका लागि पठाइए पनि अहिलेसम्म रिपोर्ट आइनसकेको डीएसपी तिवारीले बताए।
योमात्रै होइन यसअघि ठूलो संख्यामा पक्राउ परेका चिनियाँ नागरिकको कसुर पनि पत्ता नलाग्दा सहजै उम्केका थिए। ‘अपरशेन चार्ली फोक्टर’ नाम दिएर २०७६ पुस ७ गते नेपाल प्रहरीले काठमाडौं उपत्यकामा चिनियाँविरुद्ध अपरेशन चलाएको थियो । सो क्रममा मनमैजु, बुढानीलकण्ठ र बाँसबारीका ९ वटा घरमा छापा मारेर प्रहरीले १ सय २२ चिनियाँ नागरिकलाई पक्राउ गरेको थियो । पक्राउ परेकाहरुबाट ६७ थान राहदानी, ७ सय ४७ थान मोबाइल, ३ सय ३१ थान ल्यापटप, ९८ थान कम्युटर सिपियू, ९९ थान मोनिटर, २२ थान पेनड्राइभ, ३ सय २७ थान सिमकार्ड बरामद गरेको थियो । त्यतिबेला प्रहरीले अहिलेसम्मकै ठूलो अपरेशन भएको भन्दै पत्रकार नै सम्मलेन गरेर जानकारी गराएको थियो।
पक्राउ परेका चिनियाँहरूले नेपाललाई आश्रयस्थल बनाएर चीनका विभिन्न बैंकको रकम निकाल्ने, अनलाइन जुवा खेलाउने, अनलाइनमा अश्लील सामग्री देखाएर रकम लिने, व्यक्तिका गोप्य सूचना चोरेर धम्क्याउँदै रकम असुल्ने काम गरेको दाबी गरिएको थियो।
चिनियाँहरुले नेपालमै सफ्टवेयर कम्पनी र होटल सञ्चालन गर्ने भन्दै दर्तासमेत गरेको त्यतिबेला पाइएको थियो। यसरी नेपाल छिरेको चिनियाँ समूहले अवैध धन्दा सञ्चालन गरेको दाबी गरे पनि प्रहरीले भने केही भेउ पाउन सकेन।
पक्राउ परेका १ सय २२ चिनियाँबाट केही कसुर खुल्न नसकेपछि प्रहरीले जिल्ला प्रशासन कार्यालयबाट अभद्र व्यवहारको कसुरमा मुद्दा दायर गरेको थियो। २०७६ पुस २० गते पक्राउ परेका १ सय २२ चिनियाँ १ हजार धरौटीमा रिहा भएका थिए। उनीहरुले रिहा भएपछि चीनले विमान नै चार्टर गरेर उनीहरुलाई आफ्नो देश लगेको थियो।
करिब ३ वर्ष अघिदेखि नै चिनियाँले नेपाललाई टार्गेट गरेर अवैध गतिविधि सञ्चालन गरे पनि अहिलेसम्म उनीहरुले गरेको कसुर नेपाल प्रहरीले पत्ता लगाउन सकेको छैन। जसको फाइदा उठाउँदै नेपाल टार्गेट गरेर चिनियाँ अवैध धन्दा सञ्चालन गर्दै आएको नेपाल प्रहरीका पूर्वडीआईजी हेमन्त मल्ल बताउँछन् ।
‘चिनियाँहरु आईटीमा पोख्त हुन्छन्। यसअघि नै घटनाबाटे आफूहरुले गरेको अपराध नेपाल प्रहरीले पत्ता लगाउन नसकेको भन्ने जानकार भइसकेका उनीहरुले नेपाललाई सुरक्षित ठानेर निरन्त अवैध धन्दा सञ्चालन गरेको हुनुपर्छ’ पूर्वडीआईजी मल्लको बुझाई छ।
अपराधसँग हरेक विषय अहिले प्रविधिमा जोडिएकाले नेपाल प्रहरीलाई पनि अनुसन्धानका लागि प्रविधि र सोही अनुसारको दक्ष जनशक्ति उत्पादन गर्न लगानी गर्नु मल्लको सुझाव छ।
सम्बन्धित समाचार
अपरेसन 'चार्ली फोक्टर', कसुर शून्य
चिनियाँविरुद्धको फितलो अपरेसन, करिब २ सय चिनियाँ फरार भएपछि रित्तो घरमा छापा
संदिग्ध चिनियाँले विनाअनुगमन कसरी सञ्चालन गरे अर्बौंका कम्पनी?
ठगीको आरोपमा रुपन्देहीको एक कल सेन्टरमा प्रहरीको छापा, दुई सय व्यक्ति प्रहरी नियन्त्रणमा
चिनियाँ नागरिकले काठमाडौंमा चलाएको कल सेन्टरबाट ३४ जना पक्राउ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
