फिचर

साउने बजार: हरियो चुरा, पोते र मेहन्दी [तस्बिरहरु]

मनिष अर्याल मंगलबार, साउन ३, २०७९ १६:०३

काठमाडौं– हिन्दूहरुले साउनलाई भगवान शिवको महिनाका रुपमा लिन्छन्। हिन्दू महिला तथा पुरुषले साउन महिनाभर भगवान शिवको पूरा आराधना गर्ने गर्छन्।

साउनमा हिन्दू महिलाहरु हातमा हातमा महेन्दीसँगै हरियो चुरा र हरियो तथा पहेँलो पोते लगाउने गर्छन्। पुरुषहरुले पहेँलो वस्त्र लगाउँछन्।

सहरी क्षेत्रमा बस्नेहरुमा पछिल्लो समय साउन लागेपछि हातमा महेन्दी लगाउने, हरियो चुरा र पोते लगाउने क्रम बढ्दो छ। जसको असर बजारमा पनि देखिन्छ।

संघीय राजधानी काठमाडौंका मुख्य सहर र चोकमा अहिले हरियो चुरा तथा पोते र महेन्दी बेच्नेको बाक्लै उपस्थिति हुन्छ। यस्तै, चोक–चोकमा बसेर महेन्दी लगाउनेहरु पनि उत्तिकै भेटिन्छन्।

साउनमा माता पार्वतीले पति महादेवलाई खुसी बनाइ सौभाग्य प्राप्त गर्न हरिया चुरा, पोते र हातमा मेहेन्दी लगाएकी थिइन् र महादेवबाट सौभाग्य पाइन् भन्ने मान्यतालाई अनुसरण गर्दै साउनमा हरियो चुरा, पोते र हातमा महेन्दी लगाउने चलन छ।

वैज्ञानिक खोजअनुसार हातमा महेन्दी लगाउँदा स्वास्थ्यमा पनि सकारात्मक प्रभाव पर्छ। महेन्दी लगाउँदा शरीरमा शीतलता महसुस हुन्छ। साथै महेन्दीको सुगन्धले दिमागी तनावलाई कम गर्छ।

Sawan_market_-(14)1658225452.jpg

पूजा, आराधना गर्दा हात-खुट्टामा मेहन्दी लगाएर गर्दा शुद्ध मानिनुका साथै शुभ हुने विश्वास गरिन्छ। त्यसकारण यस महिनामा महिलाहरु मेहन्दी लगाउँछन्। मेहन्दी लगाएपछि बस्ने रङको कलात्मक पक्ष पनि उत्तिकै विशेष छ।

अहिले ब्युटीपार्लरदेखि सडकसम्म पनि मेहन्दी लगाउने महिलाको भिड देखिन्छ।