काठमाडौं– सार्वजनिक लेखा समितिको सभापति सत्ता पक्षले नछाडेको भन्दै एमालेले बैठक बहिष्कार गरेको छ। मंगलबार समितिको प्रतिवेदन पास गर्नका लागि बोलाइएको बैठक एमालेले बहिष्कार गरेको हो।
एमाले संसदीय दलका प्रमुख सचेतक विशाल भट्टराईले सरकारले गरेको खर्च परीक्षण गर्ने र उचित दृष्टिकोण राख्ने काम सत्तापक्षबाटै हुन नसक्ने बताउँदै लोकतन्त्रको मान्यता अनुरुप विपक्षी दलले नेतृत्व गर्नुपर्ने बताए।
उनले भने, ‘सरकारले गरेको खर्च परीक्षण गर्ने र उचित दृष्टिकोण राख्ने काम सरकारले नै गर्नुहुँदैन। विपक्षीले सरकारको खर्चमा दृष्टिकोण राख्न पाओस् भनेरै विपक्षीलाई सभापति दिने चलन छ। सत्तामा हुँदा हामी उक्त पदमा एकदिन पनि बसिराखेनौं। एक वर्षदेखि सत्तापक्ष बसिरहेको छ, हामी आश्चार्यचकित भएका छौं।’
उनले यसअघि वर्तमान सत्तापक्षकै सांसद पूर्व अर्थमन्त्री जनार्दन शर्मा पनि सत्तापक्षबाटै उक्त समितिको सभापति रहेको उल्लेख गर्दै एमालेले भने त्यस्तो नगर्ने र नसहने बताए।
‘भर्खरै राजीनामा दिएका अर्थमन्त्रीले सत्तापक्षबाटै सभापति भएर सार्वजनिक लेखा समिति चलाउनुभयो। त्यो पनि बेहोर्यौ। नेकपा एमाले यस्तो गलत कदमकाविरुद्ध अविराम रुपमा सवाल उठाउँछ। लोकतान्त्रिक संस्कार मान्नुपर्छ’, उनले भने।
हाल सभापति नेपाली कांग्रेसका सांसद भरत शाह छन्। तत्कालीन नेकपा सरकारमा हुँदा विपक्षी दलका तर्फबाट उनले उक्त समितिको सभापति प्राप्त गरेका थिए। विगतमा पनि सत्तापक्षको रहने गरेको बताउँदै उनले पद छाडेका छैनन्।
सत्तापक्षकै सभापति भएकाले समितिको बैठक पनि कम हुन थालेको भट्टाराईले बताए। नेकपाको सरकार हुँदा लगातार बैठक बसे पनि अहिले आफ्नै पार्टीको सरकार हुँदा शाहलाई बैठक बोलाउन असहज भएको उनको संकेत थियो।
‘विगत एक वर्षदेखि समिति सरकारको काम कारबाहीमा पूरै बेखबर जस्तो छ। विगतमा हाम्रो सरकार हुँदा बाक्लै बैठक बस्थे। यसलाई उचित मान्न सकिन्न,’ उनले भने, ‘लेखा समिति छ कि छैन जस्तो भयो यो देशमा।’
आफ्ना कुरा राखिसकेपछि एमालेका सांसदहरु भट्टराई, शिवमाया तुम्बाहाङ्फे, गोकुल बास्कोटालगायत बाहिरिएका थिए। सभापति परिवर्तन नभएसम्म बैठकमा नआउने उनीहरुको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
