काठमाडौं– मंगलबार मात्रै अभिनेत्री नीता ढुंगाना र अभिनेता तथा ज्योतीषी हरिहर अधिकारी निर्माण गर्न लागेको फिल्म ‘ह्रस्व दीर्घ’मा दक्षिण भारतीय अभिनेता ब्रह्मानन्दनले काम गर्ने सम्झौता भएको सार्वजनिक भयो। ढुंगाना र अधिकारीले सामाजिक सञ्जालमार्फत् यसको जानकारी दिए।
चन्द पन्तले निर्देशन गर्ने भनिएको उक्त फिल्ममा ब्रह्मानन्दन मात्रै नभएर भारतका अन्य कलाकार तथा प्राविधिकहरु पनि छन्। फिल्ममा ब्रह्मानन्दनसँगै प्रदीपसिंह रावत, सुनिल बर्मा र अलिले काम गर्ने सम्झौता भइसकेको उनीहरुले सार्वजनिक गरेका छन्।
नेपाली फिल्ममा भारतीय कलाकारलाई अभिनय गराउने होडबाजीमा निता र हरिहरको जोडी देखिन्छ। तर, यो नयाँ होडबाजी भने होइन। नेपाली फिल्म क्षेत्रमा फिल्म चलाउनका लागि प्रचारबाजीकै परिणामको रुपमा होस् वा फिल्मको ‘महत्त्व’ बढाउने हेतुले भारतीय कलाकारलाई प्रवेश गराउने चलन पुरानै छ। यीमध्ये कतिपय फिल्म त ‘पानी पानी’ भन्नै नपाउने गरि असफल भएका छन् भने भारतीय कलाकारले काम गर्ने सम्झौता भयो भनिएका कतिपय फिल्महरु बन्नै सकेका छैनन्।
अनमोल केसीको मुख्य अभिनय रहने भनिएको फिल्म ‘एक्स ९’को निर्माण पनि बलिउड कलाकारहरुलाई प्रवेश गराउने लहरमा थियो। जसको परिणाम स्वरुप बलिउड अभिनेता सुनिल शेट्टी फिल्ममा अनुबन्धित समेत भएको फिल्मको निर्माण पक्षले सार्वजनिक गरेको थियो। त्यस्तै, फिल्ममा खलनायकको भूमिकाका लागि बलिउडकै सोनु सुदलाई अनुबन्धन गर्ने हल्ला समेत फिल्मको निर्माण पक्षले चलाएको थियो।
तर, उक्त फिल्मलाई लिएर खासै प्रगति भएको छैन। मुकुन्द भट्टले निर्देशन गर्ने भनिएको उक्त फिल्म नेपालकै ठूलो एक्सन फिल्म भनेर प्रचार गरिएको भएपनि हालसम्म काम अघि बढेको छैन। फिल्ममा अन्य नेपाली कलाकारका रुपमा पुष्प खड्का, सौगात मल्ल, निश्चल बस्नेत, मिस्टर आरजेलगायतलाई पनि अनुबन्धन गरिएको सार्वजनिक गरिएको थियो।
भारतीय कलाकारसँगै नेपालका निकै रुचाइएका कलाकार फिल्ममा हुने भएकाले निर्माण हुनुअघि नै प्रचारका कारण चर्चामा रहेको उक्त फिल्म अहिले भने गुमनाम झैं भएको छ। २०२२ को जनवरीबाट छायांकनमा जाने भनिएको फिल्म अहिलेसम्म अघि बढेको छैन।
यता नेपाली फिल्ममा भारतीय कलाकारलाई फिल्म चलाउने अस्त्रका रुपमा प्रयोग गर्ने चलन पनि पुरानै छ। बलिउडका नाम चलेका कलाकारलाई नेपाल झिकाएर केमियो रोल वा कुनै गीतमा अभिनय गराएरै भएपनि फिल्मलाई प्रचार गर्ने होडबाजी फिल्मकर्मीमा रहेको छ।
यसकै परिणाम थियो सन्नी लियोनीले नृत्य गरेको फिल्म ‘पासवर्ड’। तर, फिल्मले हलमा भने ‘पानी’ समेत भन्ने अवस्था रहेन। पहिलो पटक नेपाली फिल्ममा सन्नी लियोनीको अभिनय भन्दै प्रचार गरिएको भएपनि फिल्मले खासै दर्शकलाई तान्न सकेन। सन्नीले फिल्मको एक गीत ‘आजको साम’मा गरेको नृत्यले दर्शकलाई हलसम्म तान्न सकेन। सन्नीको ठुम्काले न दर्शक तानिए, न निर्माता निर्देशकलाई नै फाइदा भयो। एकातिर फिल्म असफल भयो भने अर्कातिर प्रचारका लागि चुकाएको महंगो रकम पनि बालुवामा पानीकै रुपमा खेर गएको थियो।
त्यसो त नेपाली फिल्मको इतिहासमा जाने हो भने सुरुवाती वर्षहरुमा भारतका प्राविधिक मात्रै नभएर कलाकारहरु नै पनि भारतीय हुन्थे। माइतीघर फिल्म यसको सशक्त उदाहरण पनि हो। तर, पछिल्लो समय नेपालमै एकसेएक कलाकार उत्पादन भएका छन। विदेशी कलाकारलाई नै अभिनय गराउने पक्षमा पनि जोडदार भूमिकामा प्रवेश गराएर नेपाली फिल्मको विश्वव्यापी ब्राण्डिङ गर्ने मौका अहिले छ। तर, नेपालमा भने भारतीय कलाकारको भूमिका प्रायः प्रचार केन्द्रित नै भइरहेको छ।
‘द म्यान फ्रम काठमाडौं’ बलिउडसँगै पाकिस्तानी तथा अन्य देशका कलाकारलाई समावेश गरिएको फिल्म थियो। पेमा डोन्डुपको निर्देशनमा बनेको यो फिल्ममा भारतीय ‘ब्याड बोय’ कलाकार गुल्सन ग्रोभरसँगै पाकिस्तानी कलाकार हामिद सैखलगायतका कलाकारको अभिनय थियो। तर, फिल्मले खास प्रदर्शन गर्न सकेन सिनेमा हलमा। फिल्म प्रदर्शनमा आएसँगै न राम्रो चर्चा भयो, न राम्रो व्यापार नै। अन्ततः आश गरिएको फिल्मको प्रस्थान भने निराशाजनक भएको थियो।
नेपालमा बलिउड तथा दक्षिण भारतीय फिल्महरुको स्थापित प्रभाव र असरकाबीच निर्देशक तथा निर्माताले लगानी सुरक्षित गर्ने हेतुले यिनै क्षेत्रका कलाकारलाई अभिनय गराउने चाहना राख्नु स्वाभाविक नै हो। तर, विगतदेखिको अवस्था हेर्दा नेपाली फिल्म इतिहासको सुरुवातबाहेक कालान्तरमा बलिउड तथा भारतीय कलाकारलाई प्रचारमुखि बनेर ल्याइएको छ।
फिल्ममा खास भूमिका र असर भन्दा पनि ‘अभिनय छ है’ भन्ने देखाएर दर्शकलाई दिगभ्रमित बनाउने सोचमा निर्माता निर्देशक देखिन्छन्। कालान्तरमा यसको प्रत्यक्ष असर फिल्ममा देखिने जोखिम पनि बढेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
