काठमाडौं– हात्तीको दाह्रा तस्करीमा संलग्न भएको अभियोग लागेका व्यक्तिलाई काठमाडौं जिल्ला अदालतका न्यायाधीश चाणकमणि अर्यालको इजलासले धरौटीमा रिहा गरेपछि सरकारी पक्ष उच्च अदालत पाटन पुगेको छ।
वन्यजन्तु चोरी सिकारीजस्तो जघन्य कसुरमा संलग्न भएका व्यक्तिलाई सामान्य धरौटीमा रिहा गरेको भन्दै सरकारी पक्ष उच्च अदालत पाटन पुगेको हो। १५ वर्षसम्म कैद र १० लाख रुपैयाँसम्म जरिवाना माग दाबी गर्दै दर्ता भएको मुद्दाका प्रतिवादीलाई न्यायाधीश अर्यालले धरौटीमा रिहा गरेपछि उच्च सरकारी वकिल कार्यालय पाटनले उक्त आदेश खारेजको माग गरेको छ। हात्तीको दाह्रा तस्करीमा संलग्नका अभियुक्तलाई थुनामै राखेर मुद्दाको पुर्पक्ष हुनुपर्ने माग सरकारी पक्षको छ।
वन्यजन्तुजस्तो गम्भीर कसुरमा संलग्न भएका व्यक्तिलाई सामान्य धरौटीमा छाड्न न्यायधीश अर्यालयले दिएको आदेश बद्नियतपूर्ण रहेको सरकारी पक्षको दाबी छ। जिल्ला सरकारी वकिल कार्यालय काठमाडौंले बुझाएको प्रतिवेदनका आधारमा उच्च सरकारी वकिल कार्यालय पाटनले दायर गरेको निवेदन उच्च अदालत पाटनले दर्ता गरिसकेको छ।
जिल्ला सरकारी वकिलको कार्यालय काठमाडौंका सहन्यायाधीवक्ता गंगा पौडेलले पुनरावेदनका लागि उच्च अदालत पाटनमा निवेदन दर्ता गरिएको र अर्को हप्ताका लागि पेसी तोकिएको नेपाल लाइभलाई जानकारी दिए।
२०७८ फागुन २७ गते प्रहरीको केन्द्रीय अनुसन्धान ब्यूरो (सीआईबी)ले महाराजगञ्जको होटल ओदानबाट हात्तीको दाह्रासहित ३ जनालाई पक्राउ गरेको थियो। हात्तीको दाह्रासहित त्यसबेला पाँचथरको फिदिम नगरपालिका–४ का रमेश सुवेदी, झापाको भद्रपुर नगरपालिका–७ का भक्तिकुमार लिम्बू र झापाको भद्रपुर नगरपालिका–६ का अशोक कार्की पक्राउ परेका थिए।
पक्राउ परेका तीनै जनालाई सीआईबीले डिभिजन वन कार्यालयमा पठाएको थियो। अनुसन्धानको क्रममा यसमा ७ जनाको गिरोह संलग्न रहेको खुलेको थियो। पक्राउ परेकाहरुकै बयानको आधारमा हात्तीको दाह्रा चोरी शिकारीमा इलामको जितपुरका रमेश राई, झापाको बनियानीका चन्द्रबहादुर भट्टराई, मोरङको ववियाविर्ताका सुजिन्द्र कार्की र मोरङको मिक्लाजुङका भोजराज कार्कीको समेत संलग्नता रहेको खुलेको थियो।
त्यसपछि पक्राउ परेका ३ जना र उनीहरुको बयानबाट खुलेका ४ जनालाई फरार प्रतिवादी बनाउँदै काठमाडौं जिल्ला अदालतमा मुद्दा गरिएको थियो। वन्यजुन्तु चोरी शिकारी जस्तो गम्भीर कसुरमा संलग्न रहेको भन्दै उनीहरुलाई १५ वर्षसम्म कैद र १० लाख रुपैयाँ जरिवानाको माग गरिएको थियो। तर, न्यायाधीश अर्यालयको इजलासले गत वैशाख १४ गते उनीहरुलाई धरौटीमा रिहा हुने आदेश दिएको थियो। लिम्बू र सुवेदीलाई जनही १० लाख र कार्कीलाई ७ लाख धरौटीमा रिहा हुने आदेश दिइएको थियो। त्यसपछि उनीहरु रिहा भएका थिए।
सामान्यतया ३ वर्षभन्दा बढी कैद सजाय माग भएका मुद्दाको पुर्पक्ष थुनामै राखेर गरिँदै आएकोमा अर्यालले भने १५ वर्ष कैद सजाय माग भएको मुद्दामा समेत धरौटीमा रिहा हुने आदेश दिएका थिए।
हात्तीको दाह्रासहित पक्राउ परेका व्यक्तिलाई धरौटीमा हिरा हुन आदेश दिएपछि न्यायाधीश अर्याल भने छानबिनमा तानिने भएका छन्। पुर्पक्षमा थुनामा पठाउनु पर्ने अभियुक्तलाई धरौटीमा रिहा गरेको देखिएपछि न्यायाधीश अर्यालय छानबिनमा तानिने भएका हुन्। विवादित आदेश दिएपछि न्यायाधीश अर्याललाई जिम्मेवारीबाट हटाएर छानबिन गर्न लागिएको न्याय परिषद् स्रोतले जानकारी दिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
