काठमाडौं–नेपाली सेनाका प्रवक्ता नारायण सिलवालले सन् २०१५ को महाभूकम्पका बेला सरकारसँग स्वीकृति लिएरै अमेरिकी सेनालाई पत्र लेखेको स्पष्ट पारेका छन्। तर त्यो कुनै गठबन्धनमा जान स्वीकार गरेर नलेखिएको उनको स्पष्टोक्ति छ।
नेपाल लाइभसँग कुरा गर्दै प्रवक्ता सिलवालले भने, ‘कुनै एलायन्समा जानका लागि स्वीकार गरेर, कुनै समझदारी या लिखित सम्झौता गरेर होइन, विनाशर्त मित्रवत सहयोगका लागि अनुरोध गरिएको हो, त्यो पनि सरकारसँग अप्रुभल लिएर।’
उनले उक्त पत्रमा सहयोगका लागि चार क्षेत्र तोकिएको पनि स्पष्ट पारे। त्यसअनुसार विभिन्न स्थानमा राहत सामग्री पुर्याउन हेलिकोप्टर, कार्गो प्लेन, एयरपोर्ट, वेयरहाउस, पुल जोगाउन खटिने जनशक्तिका लागि तालिमलगायतका विषय तथा क्षेत्र तोकेर सहयोग मागिएको उनले बताए।
भूकम्पका लागि चीन, भारत, पाकिस्तान, बेलायत, अमेरिकालगायत मुलुकका सेना सहयोगा लागि आएको र नेपाली सेनाले सबैको समन्वय, सञ्चालन, अनुगमन सबै गरेको उनले बताए।
‘त्यो बेलामा देशका सबै संयन्त्रसहित नेपाल आर्मीलाई के अनुभूति भयो भने हाम्रो तयारी कमजोर रहेछ, यस्तै प्रकृतिको या योभन्दा ठूलो खालको प्रकोप आयो भने के हुन्छ भनेर त्यसको फिडब्याक र अनुभवका आधारमा हामीले आफ्नो तयारी बढाउनुपर्छ भनेर संसारसँग सहयोग लिने क्रममा अमेरिकन आर्मीसँग सहकार्य भएको हो,’ उनले भने, ‘अमेरिकामा राज्यस्तरको नेशनल गार्ड प्रकोप नियन्त्रणमा खटिने भनेपछि त्यतिखेरको सरकारसँग अप्रुभल लिएर लेखेको पत्र हो।’
त्यतिखेर कुनै सम्झौता नगरेको, अहिले पनि नगरेको र भविष्यमा पनि नगर्ने कुरा नै नेपाली सेनाको अडान रहेको उनले बताए।
‘नेपालको असंलग्न परराष्ट्र नीति, भूराजनीतिक अवस्था, त्यसको सामरिक संवेदनशिलतामा प्रतिकूल असर पर्ने गरी कुनै एउटा देश या जो कोहीसँग पनि सैन्य गठबन्धन गर्नुहुँदैन भन्ने कुरामा नेपाली सेना स्पष्टमात्र छैन, सतर्क पनि छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770283097.jpg)
-1764146706.png)
