काठमाडौं–प्रहरी अतिरिक्त महानिरीक्षक (एआईजी) बढुवाविरुद्ध र आईजी बढुवाविरुद्धको मुद्दाको सुनुवाइ सर्वोच्च अदालतमा सोमबारबाट सुरु भएको छ। सर्वोच्चका प्रधानन्यायाधीश दीपककुमार कार्की र न्यायाधीश कुमार चुडालको इजलासमा उक्त मुद्दाको सुनुवाइ सुरु भएको हो।
सुरुमा एआईजी बढुवाको सुनुवाइ भइरहेको थियो। सोही क्रममा बहस सुनिरहेका रिट निवेदक तथा पूर्वडीआईजी इश्वरबाबु कार्कीले जुरुक्क उठेर पाउनुपर्ने अंकसमेत नदिई बढुवाबाट वञ्चित गराइएको खुलाए। कार्कीले त्रिविबाट स्नातकोत्तकर उत्तीर्ण गरेको शैक्षिकप्रमाणपत्र देखाउँदै भने, ‘श्रीमान् मैले विशिष्ट श्रेणीमा स्नातकोत्तर उत्तीर्ण गरेको छु। तर मलाई दोस्रो श्रेणीसरहको मात्रै अंक दिइएको छ। अंक कति पाउने भन्ने निश्चित भएको शीर्षकमा समेत कम अंक दिइएको छ भने अन्य अंकमा समेत तल पारिएको हुनसक्छ श्रीमान्।’
बढुवाका अन्य आधारहरू स्पष्ट भए पनि बढुवा समितिले दिने अंक वैज्ञानिक नभएको तर्क कार्कीका वकिलले गरे। बढुवा समितिले दिने ७ अंक र कार्यसम्पादन मूल्यांकनको ४० अंकका आधारहरु वैज्ञानिक नभएको कार्कीतर्फका अधिवक्ताले तर्क राखे।
वरिष्ठ अधिवक्ता हरि उप्रेतीले त बढुवा समितिले दिने अंक गायत्री मन्त्रजस्तो भएको समेत उल्लेख गरे।
आफूहरु सिनियर हुँदासमेत जुनियर डीआईजीहरु धीरजप्रताप सिंह र रवीन्द्र धानुकलाई एआईजी बनाएको भन्दै त्यसविरुद्ध इश्वरबाबु कार्की, घनश्याम अर्याल र प्रकाशजंग कार्कीले सर्वोच्चमा रिट दायर गरेका थिए।
यद्यपि रिट निवेदक तीनै जना गत वैशाख १८ गतेबाट ३० वर्षे सेवा अवधिका कारण अनिवार्य अवकाशमा गइसकेका छन् ।
एआईजी बढुवाविरुद्धको रिटको बहस सकिएपछि आईजी बढुवाविरुद्धको बसहको सुनुवाइ सुरु भएको छ। सरकारले धीरजप्रताप सिंहलाई आईजीमा बढुवा गरेपछि एआईजी विश्वराज पोखरेलले त्यसविरुद्ध सर्वोच्चमा रिट हालेका थिए। आफूभन्दा झण्डै डेढ वर्ष जुनियरलाई सरकारले आईजी बनाएको भन्दै उक्त निर्णय खारेज गरी आफूलाई आईजी बनाउनुपर्ने माग पोखरेलको छ।
उक्त मुद्दा र एआईजी बढुवाको मुद्दालाई लगाउमा राखेर सुनुवाइ गरिएको छ। आईजी बढुवाको मुद्दामा पोखरेलको तर्फबाट अधिवक्ता मेघराज पोखरेलले बहस गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
