काठमाडौं– नेपाल प्रहरीमा जनपद (प्रशासन)तर्फ २० जनाको दरबन्दी छ। तर, १७ जना डीआईजीको दरबन्दी खाली भएको डेढ महिना बित्दासमेत बढुवा हुन सकेको छैन।
डीआईजी प्रमुख हुने कार्यालयहरु प्रहरी वरिष्ठ उपरीक्षक (एसएसपी)को भरमा सञ्चालन हुँदै आउँदा समेत डेढ महिनादेखि रिक्त डीआईजीको पदमा सरकारले बढुवा गरेको छैन।
डीआईजी प्रमुख हुने चार वटा प्रदेश प्रहरी कार्यालय निमित्तको भरमा सञ्चालित छन्। डीआईजीहरू अरुणकुमार बिसी, दिवेश लोहनी र पूजा सिंह बढुवाका भएसँगै क्रमशः प्रदेश १ प्रहरी कार्यालय, गण्डकी प्रदेश प्रहरी कार्यालय र बागमती प्रदेश प्रहरी कार्यालय निमित्तको भरमा सञ्चालित छन्।
कर्णाली प्रदेश प्रहरी कार्यालय त डेढ महिनादेखि एसएसपीको भरमा चल्दै आएको छ। एसएसपी राजेशनाथ बाँस्तोलाले कर्णाली प्रदेश प्रहरी प्रमुखको कमाण्ड सम्हाल्दै आएका छन्। सुदूरपश्चिम, लुम्बिनी, मधेश प्रदेश प्रहरी कार्यालयमा मात्रै अहिले डीआईजी छन्। डीआईजी कार्यरत रहने अन्य प्रहरी कार्यालय पनि डीआईजीबिहीन भएका छन्। तर, सरकारले लामो समयसम्म डीआईजीबिहिन हुँदा समेत बढुवा भने गरेको छैन।
२० जना डीआईजीको दरबन्दी भए पनि प्रहरीमा अहिले ३ जना मात्रै डीआईजी छन्। जसमा मधेश प्रदेश प्रहरी कार्यालयमा मसाउँद आलम खाँ, लुम्बिनी प्रदेश प्रहरी कार्यालयमा नलप्रसाद उपाध्याय र सुदूरपश्चिम प्रदेश प्रहरी कार्यालयमा मोहनकुमार आचार्य गरी तीन मात्रै डीआईजी छन्। रिक्त रहेको १७ पदका लागि तीन ब्याचका ३८ प्रहरी अधिकारी बढुवाको प्रतिस्पर्धामा छन्।
अहिलेको अवस्था फेरबदल नभए आगामी चैतमा अहिले डीआईजी भएकाहरू मध्येबाटै आईजीपी बढुवा हुने हुँदा डीआईजी बढुवामा निकै पेचिलो बनेको छ।
बालुवाटार–सिंहदरबार कुरा नमिल्दा बढुवामा विलम्ब
जानकार स्रोतका अनुसार प्रहरीको बढुवाको विषयमा प्रधानमन्त्री कार्यालय (निजी सचिवालय) बालुवाटार र गृहमन्त्री कार्यालय सिंहदरबारबीच कुरो मिलेको छैन। प्रहरी महानिरीक्षक धीरजप्रताप सिंह र गृहमन्त्री बालकृष्ण खाण अघिल्लो ब्याचमा एसएसपी भएका १३ जनामध्ये सबैलाई बढुवा गर्नुपर्ने र बाँकी रहेका ४ जना मात्रै पछिल्लो ब्याचबाट बढुवा गर्नुपर्ने अडानमा छन्।
तर, बालुवाटार (प्रधानमन्त्री शेरबहादुर देउवा)ले भने पछिल्लो ब्याचबाट ६ जनालाई डीआईजी बढुवा गर्नुपर्ने हडान राखेकाले कुरा नमिल्दा बढुवामा समस्या भएको हो। ‘बालुवाटार जसरी पनि पछिल्लो ब्याचबाट ६ जना बढुवा गर्नुपर्ने अडानम छ। तर गृह र प्रहरी हेडक्वाटरले सिनियर टोलीका १३ जना मध्ये कसैलाई पनि बढुवामा छुटाउन नहुने अडान राखेपछि बढुवा अन्योल भएको हो,’ स्रोतले नेपाल लाइभसँग भन्यो।
बालुवाटारको अडानअनुसार बढुवा गर्दा कि सिनियर टोलीका दुई जनालाई छुटाउनु पर्ने कि त दुई डीआईजी दरबन्दी थप गर्नुपर्ने अवस्था आएपछि बढुवा अन्योल भएको स्रोतको भनाइ छ।
आगामी चैतमा आईजी हुने भएकाले पहिलो नम्बरमा आउन तीब्र लबिङ
अहिलेको अवस्था फेरबदल नभए आगामी चैत १० गते हालका आईजी धीरजप्रताप सिंहले ३० वर्षे सेवा अवधिका कारण अनिवार्य अवकाश पाउँछन्। त्यसपछि अब बढुवा हुने डीआईजीमध्येबाट आईजी हुने अवस्था रहन्छ। जसकारण अहिले एसएसपीबाट डीआईजी बढुवा हुँदा पहिलो नम्बरमा आउन एसएसपीहरुबीच तीब्र लबिङ समेत भइरहेको छ।
अहिले डीआईजी बढुवा हुँदा पहिलो नम्बरभित्र पर्न सफल भए आगामी बढुवामा समेत उछिन्दै आईजीको प्रुमख दाबेदार बन्नका लागि एसएसपीहरु तीब्र प्रतिस्पर्धामा छन्।
को–को छन् प्रतिस्पर्धामा?
मुख्यगरी दुई ब्याचका एसएसपीहरु प्रतिस्पर्धा भए पनि तेस्रो लटमा बढुवा भएका एसएसपीहरु समेत अहिले नै बढुवा हुने दाउमा लागिरहेका छन्। २०७५ माघ २६, २०७७ वैशाख ९ र २०७७ पुस २९ मा एसएसपी भएका टोलीबीच डीआईजी बढुवाका लागि प्रतिस्पर्धा सुरु भएको छ।
पहिलो लटमा बढुवा भएका १३ एसएसपीहरु सन्दीप भण्डारी, टेकप्रसाद राई, उमेशराज जोशी, श्यामलाल ज्ञवाली, रामदत्त जोशी, दीपक थापा, मीरा चौधरी, बुद्धिराज गुरुङ, किरण बज्राचार्य, पोषराज पोखरेल, टेकबहादुर तामाङ, वसन्तबहादुर कुँवर, भीमप्रसाद ढकाल प्रतिस्पर्धामा छन्।
यो टोलीभन्दा डेढ वर्षपछि २०७७ वैशाख ९ मा एसएसपी बढुवा भएकाहरू विष्णुकुमार केसी, दुर्गा सिंह, चन्द्रकुवेर खापुङ, कुवेर कडायत, भरतबहादुर बोहरा, केदार ढकाल, अशोक सिंह, सुदीप गिरी, दूर्गा सिंह, किरण राणा, रवीन्द्र केसी, राजेशनाथ बास्तोला, यज्ञविनोद पोखरेल पनि बढुवाको लबिङमा छन्। २०७७ पुस २९ गते एसएसपी भएकाहरू पनि बढुवाका लागि लबिङमा लागिसकेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778036869.gif)
-1764146706.png)
-1779545841.jpg)
