काठमाडौं– हालसालै रामबाबु गुरुङको निर्देशनमा बनेको फिल्म ‘कबड्डी ४ः द फाइनल म्याच’ सिनेमा हलमा प्रदर्शन भयो। जुन अहिले पनि लागिरहेको छ। फिल्मले व्यापारिक रुपमा पनि राम्रो कमाई गरेको छ। सिनेमा क्षेत्रमा नेपाली फिल्मले पुनः आफ्नो बाजी मारेको देखिएको छ।
तर, कर्मसियल रुपमा निर्माण भएको ‘कबड्डी ४ः द फाइनल म्याच’भन्दा फरक शैली र विषयमा रहेर बनेका दर्जनभन्दा बढी फिल्महरू प्रदर्शनको पालो पर्खिरहेका छन्। उनीहरूले प्रदर्शनको मिति तय गरेर 'प्रमोसनमा जुटेका' छन्। दीपेन्द्र के खनालको निर्देशनमा बनेको ‘चिसो मान्छे’देखि नेपालमा थाहा आन्दोलनका अग्रणी रुपचन्द्र विष्टमाथि आधारित रहेको बायोपिक ‘रुदाने’जस्ता फिलमहरु यो सूचीमा छन्।
यी फिल्महरुले व्यापारिक रुपमा के कस्तो प्रतिक्रिया पाउँछन् भन्ने फिल्म प्रदर्शनमा आएपछि थाहा होला। तर, समग्रमा नेपाली सिनेमाको स्तर, सिनेमाको भाष्य र सिनेमाले प्रस्तुत गरिरहेका कथाभन्दा फरक गर्न खोजेको विषय भने सबल पक्ष बनेको छ।
दीपेन्द्र के खनालको निर्देशनमा बनेको फिल्म ‘चिसो मान्छे’ धेरै समयदेखि चर्चामा रहेको र आश गरिएको फिल्म हो। खनालकै निर्देशन, लेखन तथा छायांकनमा रहेको फिल्मको भूगोल नेपाली सिनेमाले खासै नदेखेको भूगोलमा आधारित छ।
सुदूरपश्चिमको भूगोलमा आधारित रहेको फिल्ममा प्रस्तुत भएको कथा पनि नेपाली फिल्म क्षेत्रका निम्ति नौलो कथा हो। कोरोना कालमा मृत श्रीमानको लास लिएर आएकी एक महिलाको मनोविज्ञानको चित्रण गरिएको छ फिल्ममा।
शर्मिला पाण्डेको निर्माण रहेको यो फिल्ममा स्वस्तिमा खड्का, देशभक्त खनाल र अपर्ण थापाको अभिनय रहेको छ। फिल्म असार ३ गतेबाट प्रदर्शनमा आउँदै छ।
‘चिसो मान्छे’कै जस्तो पश्चिमको भूगोलमा रहेर बनेको अर्को फिल्म ‘प्रकाश’ले पनि आफ्नो प्रदर्शन मिति तोकेको छ। जुम्लामा एक युवा शिक्षकको कथा देखाइएको यो फिल्मको टिजर सार्वजनिक हुँदा धेरै प्रशंसा पाएको थियो। फरक फरक शैली र कथामा रहेर फिल्म बनाइरहेका निर्देशक दिनेश राउतको निर्देशन रहेको यो फिल्म उनकै निम्ति पनि एउटा अग्निपरीक्षाको रुपमा देखिएको छ।
भदौ १० गते प्रदर्शनमा आउन लागेको फिल्ममा प्रदीप खड्का, दिया मास्के, रेणु योगी, प्रकाश घिमिरे, राजन खतिवडा लगायतका कलाकारको अभिनय रहेको छ। निर्देशक राउतदेखि अभिनेता प्रदीपले नै पनि फरक किसिमको काम गरेको फिल्म दुवैका लागि नयाँ ढोका खोल्ने माध्यम बन्ने देखिएको छ। फिल्ममा प्रस्तुत कथाको दायरा र नयाँ शैलीले पनि यसको चर्चा भइरहेको छ।
प्रभावशाली निर्देशक प्रशान्त रसाईली पनि यो वर्ष आफ्नो फिल्म लिएर आएका छन्। आफ्नै शैलीका सिनेमा बनाएर भिडबाट छुट्टै पहिचान बनाएका निर्देशकहरुमध्येका एक रसाईलीको फिल्म ‘अभिन्न’ यो वर्ष प्रदर्शनमा आउँदै छ।
लैनसिंह वाङ्देलको चर्चित उपन्यास ‘लङ्गडाको साथी’माथि आधारित रहेको फिल्मको ट्रेलर केही समयअघि सार्वजनिक भएको थियो। फिल्ममा मुख्य अभिनेताको रुपमा कर्मा देखिएका छन्, जो जीवन जिउनका लागि दार्जिलिङमा संघर्ष गरिरहेका हुन्छन्। सहाराको रुपमा एक कुकुर साथमा भएको व्यक्तिको कथा फिल्ममा प्रस्तुत छ। नेपाली फिल्मका निम्ति नितान्त नयाँ कथा भएको यो फिल्मले पनि यो वर्ष सम्भावना बोकेको छ।
यो फिल्मको अर्को बलियो पाटो फिल्ममा दिग्गज संगीतकार रञ्जीत गजमेरको संगीत रहेको छ।
‘पशुपति प्रसाद’ फेम्ड लेखक तथा अभिनेता खगेन्द्र लामिछानेले पनि आफ्नो फिल्म ‘पानीफोटो’मार्फत् यही वर्ष निर्देशनमा डेब्यु गर्दैछन्। सिनेमा र नाटक क्षेत्रमा लेखन र अभिनयबाट बलियो पहिचान बनाएका लामिछानेको फिल्म साउन १३ मा प्रदर्शनमा आउँदैछ।
लामिछाने कलाकारितामा दर्शकले निकै रुचाएका र विश्वास गरेका अभिनेता हुन्। त्यसैले पनि उनको निर्देशनमाथि दर्शकको अपेक्षा बढी छ। सँगै, लामिछानेले विगतमा लेखिरहेका फिल्म तथा नाटकको अवस्था हेर्दा उनको निर्देशन पनि उत्तिकै राम्रो हुने सम्भावना ज्यादै रहन्छ।
खगेन्द्रको ‘पानीफोटो’मा बेपत्ता छोराको पखाईमा बसेका आमाबुबाको कथा देखाइएको छ। फिल्ममा मेनुका प्रधान, अनुप बराल, मलिका महत र स्वयं निर्देशक लामिछानेकै अभिनय रहेको छ।
‘सुनगाभा’ फेम्ड निर्देशक सुदर्शन थापाले पनि यो वर्ष आफ्नो नयाँ फिल्म ल्याउँदैछन्। वैकल्पिक शैली र फरक कथामा रहेर बनेको फिल्म ‘द सिक्रेट्स अफ राधा’ भदौ १० गतेबाट प्रदर्शन हुँदै छ। फिल्ममा श्रृष्टि श्रेष्ठ, खगेन्द्र लामिछाने, सौगात मल्ल, मेनुका प्रधानलगायतका कलाकारको अभिनय रहेको छ।
त्यस्तै, अनुप बरालको निर्देशनमा रहेको ‘दोख’ पनि प्रदर्शनको संघारमा छ। असार २४ गते प्रदर्शन गरिने निधो भएको फिल्मको टिजर केही समयअघि प्रदर्शन गरिएको थियो। टिजरमा देखिएका झलकहरुले फिल्म फरक शैलीमा प्रस्तुत भएको देख्न सकिन्छ।
माओवादी युद्धपछिको कथामा आधारित रहेर बनेको फिल्मले द्वन्द्व र खेललाई सँगै देखाउन खोजेको छ। फिल्ममा द्वन्द्वकालीन समयमा नेपालका विभिन्न भूभागमा भएका घटनाहरुको प्रस्तुति छ।
दिया मास्के, मनिष निरौला, लोकमनी सापेकोटा, माओत्से गुरुङलगायतका कलाकारको अभिनय फिल्ममा रहेको छ। फिल्मको कथा भने राजन कठायतले लेखेका छन्।
यीसँगै कुमार भाष्कर निर्देशित ‘कौसिद’, फुर्वा छिरिङ लामा निर्देशित ‘जार’जस्ता फिल्महरु पनि यही वर्ष प्रदर्शन हुने भनिएको छ। वैकल्पिक कथा र देखिरहेको कर्मसियलभन्दा फरक किसिमको प्रस्तुतीकरणले भरिएका यी फिल्महरुमाथि दर्शक र स्वयं सिनेमा क्षेत्रकै पनि अपेक्षा बढेको देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
