काठमाडौं– शुक्रबारबाट सिनेमा हलमा प्रदर्शनमा आएको दक्षिण भारतीय फिल्म ‘चार्ली ७७७’ अहिले चर्चाको विषय बनेको छ। फिल्म मानिस र जनावरबीचको सम्बन्ध र त्यसको गहिराइको चित्रणले भरिएको छ।
‘चार्ली ७७७’ फिल्ममा चार्ली र धर्मा (रक्षित शेट्टी अभिनित)बीचको भावनात्मक सम्बन्धलाई देखाइएको छ। धर्मा आफ्नो परिवार, आफन्त र साथीभाइभन्दा टाढा रहेर एक कारखानामा काम गर्ने हुन्छ। एक्लोपन मात्रै धर्माको साथी हुन्छ। आफूसँग सहयोग माग्न आउने होस वा कुनै आकांक्षा लिएर आउनेलाई खाली हात पठाउने बानी हुन्छ उसको ।
यही बानी चार्लीसँग पनि दोहोरिन्छ। कारखानामा आइपुगेको कुकुर चार्लीलाई उसले त्यस्तै व्यवहार गर्छ, जस्तो मानिसलाई गर्ने गरेको थियो। तर, एक दिन जब कामबाट धर्मा फर्किरहेको हुन्छ, तब चार्लीको दुर्घटना भएको देख्छ। चार्लीलाई यस्तो अवस्थामा देखेसँगै उसलाई अस्पताल लिएर जान्छ।
धर्मा अस्पतालमा पनि चार्लीबाट आफू भाग्न खोजिरहेको हुन्छ। तर, केही दिनपछि उसको व्यवहार परिवर्तन आउँछ। चार्लीप्रतिको व्यवहार र प्रेममा बदलाव आउँछ। त्यसपछिको कथा भने उनीहरुले समाजसँग गरेको विद्रोह, धर्माको जीवनमा आएको परिवर्तन र समस्याका सामुन्ने गरेको संघर्षले भरिएको छ।
फिल्ममा मुख्य अभिनेताको रुपमा रहेका रक्षित शेट्टीले निकै प्रतिभाशाली रुपमा काम गरेका छन्। त्यस्तै, संगीता श्रृंगेरीले पनि आफ्नो भूमिकामा राम्रो काम गरेकी छिन्।
फिल्ममा सबैभन्दा राम्रो अभिनय भने चार्लीको छ। चार्लीको दृश्यहरुले फिल्म हेरिरहेका दर्शकलाई बेला बेला हसाउने त बेला बेला रुवाउनेसम्मको क्षमता राख्छन्।
समयको हिसाबले केही लामो भएपनि फिल्म हेर्न सकिन्छ। फिल्मको पहिलो भाग दोस्रोको तुलनामा थोरै कम गतिले बग्छ। समग्रमा फिल्ममा प्रस्तुत गर्न खोजिएको कथा र सन्देशका कारण यो फिल्म हेर्न सकिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
