फाइल तस्बिर
काठमाडौं–काठमाडौंको फोहर उठाउनका लागि सरकारले शुक्रबार बञ्चरेडाँडा र सिसडोलमा आन्दोलनरत स्थानीय तथा जनप्रतिनिधिलाई वार्तामा बोलाएको छ। सहरी विकास मन्त्रालयले बिहान ८ बजे वार्ताका लागि बोलाएको हो। बञ्चरेडाँडा संघर्ष समिति र वडाका प्रतिनिधिसमेतलाई राखेर शुक्रबार वार्ता गर्न लागेको मन्त्रालयले जनाएको छ।
वार्तामा ककनी गाउँपालिका १, २ र ३ तथा धुनिबेसी नगरपालिका १, ३ र ४ का वडाध्यक्ष सहभागी हुनेछन्। काठमाडौं महानगरपालिकाका मेयर बालेन्द्र शाह, ककनी गाउँपालिकाका अध्यक्ष सुमन तामाङ, धुनिबेसी नगरपालिकाका मेयर बालकृष्ण आचार्य र बञ्चरेडाँडा डम्पिङ साइट आयोजना प्रमुख रविन्द्र बोहरा, आन्दोलनरत संघर्ष समितिको संयोजक श्रीराम ढुंंगानाले पनि वार्तामा भाग लिने छन्।
सहरी विकासमन्त्री रामकुमारी झाँक्री तथा नुवाकोटका कांग्रेस नेता प्रकाशशरण महत पनि वार्तामा सहभागी हुने जनाइएको छ।
सहरी विकास मन्त्रालयले सोमबार नुवाकोटको ककनी गाउँपालिका र धादिङको धुनिबेसी नगरपालिका प्रमुखलाई मात्र राखेर बञ्चरेमा फोहोर फाल्ने सम्झौता गरेको थियो।
प्रभावित क्षेत्रका बासिन्दालाई सहभागी नगराई सम्झौता हस्ताक्षर गरिएको भन्दै विरोध सुरु भएको थियो। आफूलाई सोध्दै नसोधी गुपचुप सम्झौता गरेको भन्दै स्थानीयले आन्दोलन गरेका थिए ।
मंगलबारदेखि सिसडोल र बञ्चरेडाँडाका स्थानीय आन्दोलित भएपछि फोहर बोकेका ट्रकहरु काठमाडौं फर्केका थिए। बुधबार र बिहीबार पनि तनाव जारी नै रहेपछि प्रधानमन्त्रीसँग वार्ता गर्ने भनिएको थियो। बिहीबार नै मेयर शाहले प्रधानमन्त्री शेरबहादुर देउवासँग भेट गरेका थिए। भेटमा प्रधानमन्त्रीले स्थानीयसँग सहमति गरेर अघि बढ्न भनेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1765782108.png)
-1764146706.png)
-1763721444.png)
-1765273665.jpg)
