लन्डन–चर्चित बौद्ध गुरु एवं लेखक श्याल्पा तेन्जिन रिन्पोछेले रुस र युक्रेनका राष्ट्रपतिलाई शान्ति वार्ता गर्न लुम्बिनीमा बोलाउन प्रस्ताव गरेका छन्।
शुक्रबार बेलुका कोभेन्ट गार्डेनस्थित कनड्युट क्लबमा आयोजित कार्यक्रमलाई सम्बोधन गर्दै रिन्पोछेले तत्कालीन अमेरिकी राष्ट्रपति डोनाल्ड ट्रम्प र उत्तर कोरियाका नेता किम जोङ्ग अनबीच सिंगापुर र भियतनाममा भेट वार्ता भएको स्मरण गरे।
'हामीले लुम्बिनीलाई विश्व शान्तिको केन्द्रको रुपमा विकास गर्यौं भने रुसी राष्ट्रपति पुटिन र युक्रेनका राष्ट्रपति जेलेन्स्कीलाई शान्ति वार्ताका लागि बोलाउन सक्छौं,’ उनले भने।
लुम्बिनीमा विश्व शान्तिधाम निर्माण गरी विश्व शान्तिको केन्द्रको रुपमा विकास गर्न अभियान चलाईरहेका रिन्पोछेले भने, ‘पवित्र भूमि लुम्बिनीमा शान्ति धाम निर्माण गरेर विश्वभरिका मानिसलाई नेपाल शान्ति र खुसीको भूमि हो भन्ने सन्देश दिने मेरो उद्देश्य हो।’
विश्वका आध्यात्मिक सहरजस्तै मक्का मदिना, जेरुसेलम, भ्याटिकन सिटी, वाराणसी वा बोधगयाजस्तै लुम्बिनीलाई विश्व आकर्षणको केन्द्र बनाउने आफ्नो सपना रहेको उनले बताए। अनुमानित लागत झण्डै ३ करोड डलर रहेको उक्त धामको निर्माणका लागि ‘क्राउड फण्डिङ’ बाट रकम जुटाउने उनले बताए।
‘मैले हरेक व्यक्तिबाट एक रुपियाँ, एक पाउण्ड वा एक डलर संकलन अभियान सुरु गरेको छु। देश विदेशमा रहेका नेपाली एवं विदेशीहरुले यो योजनालाई समर्थन गरिरहनु भएको छ र आउँदो तीन वर्षभित्रै यसले पूर्णता पाउनेमा म विश्वस्त छु,’ उनले भने।
सन् २०२४ सम्म सम्पन्न हुने लक्ष्य राखिएको विश्व शान्ति धाममा संग्रहालय, पुस्तकालय, ५ हजार जना अट्ने क्षमताको सम्मेलन हल, प्रवचन कक्ष, युनिभर्सल पिस इन्सटिच्यूट, रिट्रिट सेन्टर आदि रहनेछन्। डिजाइन विश्वमै पृथक खालको भएको रिन्पोछेले बताए।
‘प्रत्येक श्वासमा आनन्द, पूर्णताको जीवन लगायत चार पुस्तकका लेखक रिन्पोछे हरेक आमाले आफ्ना सन्तानलाई विना शर्त प्रेम गरेजस्तै प्रेम गर्न सकेमा परिवार, समाज र विश्वमा शान्ति सम्भव हुने बताउँछन्। ‘शान्ति भनेको स्वतन्त्रता हो, विना स्वतन्त्रता शान्ति सम्भव छैन्’, उनी भन्छन्, ‘अपेक्षा, डरमा स्वतन्त्रता कदापी हुन्न,’ उनले भने।
सन् १९८८ देखि अमेरिका बस्न थालेका रिन्पोछेले काठमाडौँको कपनमा सञ्चालन गरिरहेको श्याल्पा मोनास्ट्रीमा १५० विद्यार्थीले बौद्ध शिक्षा अध्ययन गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1787821306.jpg)
-1786513116.png)
