काठमाडौं- ५३ वर्षदेखि प्रसारण भइरहेकाे बीबीसी नेपाली सेवाको प्रसारणमा व्यापक कटौती गर्न लागिएकाे छ। नेपाल लाइभलाई प्राप्त जानकारी अनुसार आउँदो ३० मे (१६ जेठ) देखि बीबीसी नेपाली सेवाको बिहानी प्रसारण बन्द गरिने छ भने सोही दिन बेलुकादेखि बेलुकाको आधा घण्टा लामो प्रसारण समय छोट्याएर १५ मिनेटमात्रै प्रसारण हुने छ।
बीबीसी विश्व सेवाको एसिया प्रशान्त क्षेत्रका व्यापार विकास विभागका प्रमुख इन्दुशेखर सिन्हाले बीबीसी नेपाली सेवाको कार्यक्रम प्रत्यक्ष प्रसारण गर्ने रेडियो स्टेशनहरुलाई एक पत्र लेख्दै त्यस्तो जानकारी दिएका हुन्। 'रणनीतिक कारणले त्यस्तो निर्णय लिइएको' पत्रमा उल्लेख छ, तर त्यसको विवरण दिइएको छैन।
गत मार्च २०१९ मा लन्डनस्थित बीबीसी नेपाली सेवाको कार्यालय बन्द गरिएपछि नेपालबाटै बीबीसी नेपाली सेवाको सम्पूर्ण कार्यक्रम उत्पादन भइरहेको थियो। नेपालमा बेलुका बीबीसी नेपाली सेवाको कार्यक्रम सुन्ने ठूलै श्रोता संख्या भए पनि बीबीसी विश्व सेवाले केही समय यता मल्टीमिडियामा जोड दिँदै आएको छ।
अहिले आएर बीबीसी विश्व सेवाले यस्तो निर्णय किन गर्याे त?
नेपाल लाइभले पठाएको एक प्रश्नको जवाफमा लन्डनस्थित बीबीसी प्रेस अफिसकी वरिष्ठ संचार विज्ञ लाला नजाफोभाले भनिन्, ‘श्रोता/दर्शकहरुको बदलिँदो मागलाई सम्बोधन गर्दै बीबीसी न्युज नेपालीले उसको प्रसारणमा केही फेरबदल गरेको छ। त्यसैले रेडियो कार्यक्रममा कटौती गरी उक्त श्रोत डिजिटल सामग्रीलाई थप विस्तार गर्न खर्च गरिने छ। हाम्रो डिजिटल प्लेटफर्मअन्तर्गत वेबसाइट, फेसबुक, ट्वीटर, युट्युब र इन्स्टाग्राम रहेका छन्।‘
सामाजिक सञ्जालकाे बढ्दो प्रभाव र गलत तथा मिथ्य सूचनाको महामारीका बारे चिन्ता व्यक्त भइरहेका बेला बीबीसी नेपाली सेवाले आफ्नो रेडियो प्रसारण कटौती गर्ने निर्णय गरेको हो।
वरिष्ठ पत्रकार राजेन्द्र दाहालले बीबीसी नेपाली सेवाले नेपाललाई विश्वभरि जोड्न र चिनाउनका साथै विश्वसनीय सूचना दिने कुरामा सहयोग गरेको तर अब आम पाठकसामु धेरै विकल्प भएको बताए। ‘साक्षरता र पूर्वाधार कम भएको अवस्थामा बीबीसीजस्ता मिडियाको आवश्यकता थियो तर अहिले विकल्प र रुची पनि बदलिएकोले बीबीसीले पुरै सेवा बन्द नगरी केही कटौती गरेको हुनसक्छ,' दाहालले भने।
वरिष्ठ पत्रकार कनकमणि दीक्षितले बीबीसी नेपाली सेवाको प्रसारण कटौती हुनु दुखद भएको बताए। ‘बीबीसीलाई जसरी नेपालमा ल्याइयो र सूचनामा जस्तो विश्वसनियता कायम गर्यो, त्यसको आवश्यकता अझै बाँकी रहेकाले यसलाई कटौती गर्नु दुखद हो,' उनले भने। दीक्षितले यसको सेवा कटौती नभई अझै बढाउनुपर्ने माग नेपालबाट जानुपर्ने बताए। बीबीसीले पत्रकारितामा व्यवसायीकता ल्याएको उल्लेख गर्दै उनले भने, ‘यसअघि पनि यस्तो कुरा सुनिएको थियो, अहिले कटौती गरिएको कुरा सुनियो, यसलाई अफसोच नै भन्नुपर्छ,' उनले भने।
७ जुन १९६९ मा साप्ताहिक कार्यक्रमको रुपमा सुरु भएको बीबीसी नेपाली हाल हरेक दिन प्रसार हुँदै आएको छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
