प्रतिकात्मक तस्बिर
काठमाडौं– काठमाडौं, म्याग्दी, नवलपरासी पूर्व र चितवनमा भएका सवारी दुर्घटनामा ५ जनाको मृत्यु भएको छ। मंगलबार राति भएका सवारी दुर्घटनामा उनीहरुको मृत्यु भएको प्रहरीले जनाएको छ।
काठमाडौं महानगरपालिका–१४ कलंकी चोकमा बा ५ ख ७३४५ नम्बरको टिपरले बा ८० प ६३७३ नम्बरको मोटरसाइकललाई ठक्कर दिँदा मोटरसाइकल चालक धादिङ धुनिबेशी नगरपालिका–२ घर भएका ४५ वर्षीय दिवाकर अधिकारीको घटनास्थलमै मृत्यु भएको छ।
टिपर चालकलाई प्रहरीले नियन्त्रणमा लिएको छ।
म्याग्दीको अन्नपूर्ण गाउँपालिका–४ नारच्याङ छोटेपास्थित सडकमा ग २ ख ६५८ नम्बरको ट्रक सडकबाट करिब ६५ मिटर तल खसेर दुर्घटना हुँदा २ जनाको मृत्यु भएको छ।
मृत्यु हुनेहरुमा ट्रकमा सवार मकवानपुरको गोकर्ण बस्ने ३४ वर्षीय सन्त बहादुर तितुङ र म्याग्दी अन्नपूर्ण गाउँपालिका–१ दोवा बस्ने ४३ वर्षीय खुम बहादुर रामजाली रहेका छन्। दुर्घटनामा गम्भीर घाइते भएका उनीहरुको बेनी अस्पतालमा उपचारको क्रममा मृत्यु भएको हो।
नवलपरासी(पूर्व), गैंडाकोट नगरपालिका–२ भृकुटी चोकमा ना ३ ख १८९ नम्बरको ट्रकले किचेर ४५ वर्षीय पुरुषको मृत्यु भएको हो। ट्रकमुनी सुतीरहेको अवस्थामा ट्रकले किचेर गम्भीर घाइते भएका उनको जिल्ला सरकारी अस्पताल चितवनमा उपचारको क्रममा मृत्यु भएको हो। ट्रक चालकलाई प्रहरीले नियन्त्रणमा लिएको छ।
चितवनको भरतपुर महानगरपालिका–२५ अमृत चोकमा ना ५ त ५७३१ नम्बरको ट्याक्टरले ना ५१ प ८२३४ नम्बरको मोटरसाइकललाई मंगलबार राति ठक्कर दिँदा सोही महानगरपालिका–२२ बस्ने २९ वर्षीय बिनय बोटेको मृत्यु भएको छ।
दुर्घटनामा गम्भीर घाइते भएका उनको नयाँ मेडिकल कलेज भरतपुरमा उपचारको क्रममा मृत्यु भएको हो। दुर्घटनामा घाइते भएका सोही ठाउँ बस्ने ५२ वर्षीय बाबुराम चौधरीको सोही अस्पतालमा उपचार भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
