फाइल तस्बिर
काठमाडौं–कुकुरलाई जिस्क्याएको निहुँमा शुक्रबार बाजुराको बुढीनन्दा ९ पाण्डुसेनमा नेपाली कांग्रेस र एकीकृत समाजवादीका कार्यकर्ताबीच झडप भएको छ। झडपमा क्रममा १६ जना घाइते भएको जिल्ला प्रहरी कार्यालयका प्रवक्ता प्रहरी निरीक्षक गिहेन्द्र बोगटीले जानकारी दिएका छन्।
झडपमा १० प्रहरी, तीन कांग्रेस कार्यकर्ता र तीन समाजवादीका कार्यकर्ता घाइते भएका हु्न्। बोगटीका अनुसार अहिले स्थिति नियन्त्रणमा आइसकेको छ।
सहायक प्रमुख जिल्ला अधिकारी लोकेन्द्र बिष्टले चुनावी प्रचारका क्रममा कांग्रेससँग भएको कुकुरलाई समाजवादीका कार्यकर्ताले जिस्क्याएको निहुँमा उक्त घटना भएको जानकारी नेपाल लाइभलाई दिए।
उनका अनुसार कुकुरलाई जिस्क्याएको निहुँमा सुरुमा दुवै पक्षका कार्यकर्ताबीच ढुंगा हानाहान भएको थियो।, त्यसपछि समाजवादीका कार्यकर्ताहरु सुरक्षाका लागि स्थानीय प्रहरी चौकीमा पसे। त्यहाँ पनि कांग्रेस कार्यकर्ता आएर ढुंगामुडा गरेपछि प्रहरीले हवाईफायर र अश्रुग्यास प्रहार गरेको सहायक प्रजिअ बिष्टले बताए।
त्यसक्रममा घाइते भएकाहरुलाई जिल्ला अस्पताल मार्तडी लगिएको र घटनास्थलमा प्रमुख जिल्ला अधिकारीसहितको टोलीले निरीक्षण गरेको उनले बताए। उनका अनुसार हाल अवस्था सामान्य रहे पनि थप घटना हुन नदिन सुरक्षाकर्मीहरु परिचालन गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
