काठमाडौं– त्रिभुवन अन्तर्राष्ट्रिय विमानस्थलको आन्तरिक उडानतर्फको कक्षमा विभिन्न ठाउँमा जाने उडानको तयारी भइरहेको थियो। केही दिनदेखिको मौसमका कारणले उडान डिले लगायतका समस्या भइरहेका थिए। बिहान ९ बजेर ४० मिनेटमा पहिलो फोन कल आयो। जुन फोनले आन्तरिक उडान कक्षमा यात्रुहरुबीच आतंक नै सिर्जना भयो।
विदेशबाट कसैले विमानस्थलको आन्तरिक उडानतर्फको कक्षमा विभिन्न ७ स्थानमा बम राखिएको भन्दै फोन गरेको थियो। ‘कार्यालयको टेलिफोन एक्सचेन्ज कक्षमा ९ बजेर ४० मिनेटदेखि दुईपटक फोन आयो,’ विमानस्थलका प्रवक्ता टेकनाथ सिटौलाले भने, ‘फोन रिसिभ गर्दा नै फोन गर्ने मानिसले सलाम वालेकुम भन्दै कुरा सुरु गरेका थिए।’ उनका अनुसार फोन रिसिभ गर्दा हिन्दी भाषामा बोलेका ती फोन गर्ने व्यक्तिले त्यसपछि भने नेपाली भाषामा कुराकानी गरेका थिए।
‘फोन गर्ने व्यक्तिले आन्तरिक उडानतर्फ ७ ठाउँमा बम राखिएको छ। २ घन्टाभित्र विष्फोट हुन्छ भनेर कुराकानी गरेको थियो,’ उनले भने, ‘त्यसपछि हामीले तुरुन्त विमानस्थल प्रशासनदेखि सुरक्षा निकाय र नेपाली सेनासम्म खबर गर्यौं।’
बम राखिएको भनेपछि तत्कालै बम डिस्पोज टोलीले सम्पूर्ण विधि प्रयोग गरेर आन्तरिक उडानको सबै क्षेत्रमा सर्च गर्ने काम भएको र केही शंकास्पद वस्तु भने नभेटिएको उनले बताए।
बम नभएको पुष्टि भएपछि बिहान ११ बजेर १० मिनेटबाट उडान पुनः सुरू गरिएको त्रिभुवन विमानस्थलका महाप्रबन्धक प्रेमनाथ ठाकुरले जानकारी दिए।
प्रहरीको केन्द्रीय अनुसन्धान ब्यूरो र साइबर ब्यूरोले उक्त फोन कलका बारेमा अनुसन्धान गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1762771102.png)
