काठमाडौं–नेपालमा व्यक्तिगत कामले आएका भारतीय कांग्रेस नेता राहुल गान्धी रात्रीक्लब गएको विषयमा भारतीय जनता पार्टीले अनावश्यक विवाद सिर्जना गरेको टिप्पणी भारतीय कांग्रेस पार्टीले गरेको छ। कांग्रेस प्रवक्ता रणदीप सुरजेवालाले गान्धी नेपालमा साथीको विवाहमा गएको र भाजपाले अनावश्यक विवाद सिर्जना गरेको बताएका छन्।
सोमबार दिउँसो नेपाल आइपुगेका गान्धी साँझ ठमेलस्थित एलओडी रात्रीक्लबमा पुगेको तस्बिर सार्वजनिक भएसँगै सत्तारुढ भाजपाले उनको आलोचना गरिरहेको छ। भाजपाको सूचना तथा प्रविधि विभागका प्रमुख तथा पश्चिम बंगाल इञ्चार्ज अमित मालबीयले मुम्बईमा तनाव भएका बेला राहुल रात्रीक्लबमा मस्ती गरिरहेको तर्क सामाजिक सञ्जालमा गरेका थिए।
गान्धी नेपालमा आफ्नी एक साथीको विवाहमा गएको उल्लेख गर्दै कांग्रेस प्रवक्ता सुरजेवालाले भनेका छन्, ‘साथीभाइ, परिवार हुनु हाम्रो संस्कृतिको हिस्सा हो। विवाहमा जानु कुनै अपराध होइन। हुनसक्छ, आजबाट भाजपाले विवाहमा उपस्थिति हुनुलाई गैरकानुनी बनाउँला। अब विवाहमा जाँदा पनि भाजपासँग सोधेर जानुपर्ने?’
सँगै, सुरजेवालाले व्यंग्यात्मक शैलीमा साथी बनाउनु र उनीहरुको विवाहमा सामेल हुनु अपराध घोषित हुने भएमा पूर्वजानकारी गराउन पनि भाजपाले अनुरोध गरेका छन्।
यता कांग्रेसको स्पष्टिकरणपछि पनि भाजपाका नेताहरु भने चुप लागेका छैनन्। गान्धीमाथि उनीहरुको प्रहार निरन्तर चलिरहेको छ। भाजपाका नेता सहनाज हुसैनले देश गम्भीर अवस्थामा हुँदा मोजमस्तीमा व्यस्त हुनु लजास्पद भएको बताएका छन्। त्यस्तै, भाजपाका केन्द्रीय मन्त्री किरेन रिजिजूले पनि गान्धी एलओडीमा भएको भिडियो सेयर गर्दै गान्धी पार्टी, छुट्टि, मोजमस्तीमा व्यस्त भएको कुरा देशका लागि कुनै नयाँ विषय नभएको बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
