काठमाडौं–गृहमन्त्री बालकृष्ण खाणले स्थानीय तहको निर्वाचन शान्तिपूर्ण तरिकाले स्वच्छ, निष्पक्ष र भयरहित वातावरणमा सम्पन्न गर्न मिलाउनुपर्ने सुरक्षा प्रबन्धमा कुनै कसुर बाँकी नराख्न सुरक्षा निकायका प्रमुखहरुलाई निर्देशन दिएका छन्। सोमबार दिउँसो गृहमन्त्रालयमा बसेको केन्द्रीय सुरक्षा समितिको बैठकमा मन्त्री खाणले यस्तो निर्देशन दिएका हुन्।
‘सरकारको मुख्य ध्येय शान्तिपूर्ण तरिकाले स्वच्छ, निष्पक्ष र धाँधलीरहित तरिकाले स्थानीय तह निर्वाचन सम्पन्न गर्नु हो,’ गृहमन्त्री खाणले भने, ‘अहिलेसम्म तपाईंहरुले मिलाएको सुरक्षा प्रबन्ध प्रशंसायोग्य छ। अब पनि त्योभन्दा राम्रो सुरक्षा गर्नुहोला।’
निर्वाचनमा आकस्मिक रूपमा र योजनाबद्ध झडपहरू पनि हुन सक्ने भन्दै उनले त्यस विषयमा सचेत रहन र झडपबारे सूचना पाउनेबित्तिकै सुरक्षा निकायले एकअर्काबीच समन्वयमा अगाडि बढ्न निर्देशन दिए। घटना भइहालेमा समन्वयात्मक तरिकाले सामान्यीकरण गर्न पनि उनले सुरक्षा निकायका प्रमुख र गृह प्रशासनलाई निर्देशन दिए।
बैठकमा ३० बैशाखमा हुने स्थानीय तह निर्वाचनको सुरक्षा प्रबन्धका लागि अहिलेसम्म भए गरेका कामको समीक्षा भएको गृह मन्त्रालयका प्रवक्ता फणिन्द्रमणि पोखरेलले जानकारी दिए। बैठकमा निर्वाचनको प्रचार प्रसारका क्रममा हुन सक्ने घटनालाई मध्यनजर गर्दै कसरी घटना हुन नदिने र घटना भइहालेमा समन्वयात्मक हिसाबले कसरी सामान्यीकरण गर्ने भन्ने विषयमा पनि छलफल भएको प्रवक्ता पोखरेलले बताए।
बैठकमा सोमबारमात्रै पदबहाली गरेका नेपाल प्रहरीका महानिरीक्षक धिरजप्रताप सिंह र सशस्त्र प्रहरी बलका महानिरीक्षक राजु अर्याललाई समितिको नयाँ सदस्यका रूपमा स्वागत गरिएको थियो।
बैठकमा गृहसचिव टेकनारायण पाण्डे, निमित्त रक्षासचिव यज्ञप्रसाद ढुंगेल, नेपाली सेनाका रथी बालकृष्ण कार्की, प्रहरी महानिरीक्षक सिंह, सशस्त्र प्रहरी महानिरीक्षक अर्याल, राष्ट्रिय अनुसन्धान विभागका प्रमुख यदुलाल खरेलको सहभागिता थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
