तस्बिर सौजन्य: अमेरिकी दूतावास, काठमाडौं
काठमाडौं– नेपालका लागि संयुक्त राज्य अमेरिकाका राजदूत र्याण्डी बेरीले नेपाल बलियो हुँदा अमेरिका बलियो हुने बताएका छन्।
नेपाल तथा अमेरिका बीच कूटनीतिक सम्बन्ध स्थापना भएको ७५ वर्ष लागेको अवसरमा राजधानीमा शुक्रबार आयोजित स्वागत समारोहलाई सम्बोधन गर्दै राजदूत बेरीले भने, 'यो साझेदारी हाम्रा दुवै देशको हितमा छ। नेपाल बलियो हुँदा अमेरिका बलियो हुन्छ, नेपालीहरू स्वस्थ हुँदा अमेरिकीहरू स्वस्थ हुन्छन्, र नेपालको सार्वभौमिकता मजबुत र सुदृढ हुँदा अमेरिकाको सार्वभौमिकता मजबुत हुन्छ। यसै कारण हामीले अमेरिकाको भविष्यलाई नेपालको भविष्यसँग जोडेका छौँ।'
'सन् उन्नाइस सय सतचालीस (१९४७) देखि हामीले गरेका सबै कामको मूल मर्ममा रहेको मानवीय भावनाले नै भौगोलिक रूपमा फरक भए पनि हामी धेरै कुरामा समान छौँ। र आजको दिनसम्म पनि हाम्रो सम्बन्धलाई गहिराइ प्रदान गर्ने र जीवित राख्ने काम हाम्रा जनताहरूबीच रहेका भावनात्मक सम्बन्धहरूले गरेका छन्,' राजदूत बेरीले भने।
गएको ६० वर्षमा झन्डै चार हजार पिसकोर स्वयंसेवकहरूले नेपालमा सेवा गरेको राजदूत बेरीले स्मरण गरे। सन् २०१५ को महाभूकम्पले घर ध्वस्त पारेका पैँतालीस हजारभन्दा बढी नेपाली परिवारहरू युएसएआईडीका इन्जिनियरहरू, डकर्मीहरू र सामुदायिक समन्वयकर्ताहरूको मद्दतमा पुनर्निमित घरहरूमा सरेका पनि बेरीले बताए।
उनले मिलेनियम च्यालेन्ज कर्पोरेसन (एमसीसी) सम्झौताले नेपालको सडक मर्मत सम्भारमा सुधार गर्नुका साथै नेपालको जलविद्युत्को सम्भावनालाई यथार्थमा परिणत गर्न सघाउने विश्वास व्यक्त गरे।
अमेरिकी सहयोगबाट नेपालको पहिलो टेलिफोन एक्सचेन्जको स्थापना, तराईमा मलेरियाको उन्मूलन, सडकहरूको निर्माण, कुनै समयमा बसोबास अयोग्य रहेका क्षेत्रहरूमा कृषिको विकास, साक्षरता दरमा वृद्धि र बाल मृत्युदरमा उच्च गिरावट आएको राजदूत बेरीले बताए।
'हामीले हाम्रा व्यक्तिगत सम्बन्धहरूको शक्ति ती ६ अमेरिकी मरिन सैनिकहरूमा देख्यौँ, जो महाभूकम्पबाट घाइते नेपालीहरूको उद्धार गर्न एउटा जोखिमपूर्ण मिसनमा उडे र आफ्नो जीवन यस सम्बन्धको मर्मप्रति बलिदान दिए। शान्ति स्थापना कार्यहरूमा भाग लिन आफ्नै सैन्य क्षमता निर्माण गर्न र प्राकृतिक विपद्हरू आइलागेर नेपालीको जीवन जोखिममा हुँदा छिटो प्रतिकार्य गर्न नेपाललाई सहयोग गर्ने अमेरिकी सैन्य विशेषज्ञहरू नै हुन्,' उनले भने।
कोभिड-१९ को महामारीविरुद्ध अमेरिकाले नेपाललाई झन्डै ३८ लाख खोपका मात्रा तथा अन्य मेडिकल सामग्री, तालिम र प्राविधिक सहयोगका रूपमा १२ करोड २० लाख अमेरिकी डलरभन्दा बढीको सहयोग प्रदान गरेको राजदूत बेरीले बताए।
युएसएआईडीले हालै स्वीकृत गरेको ६५ करोड ९० लाख अमेरिकी डलरको सहायता सम्झौता खाद्य सुरक्षा बढाउन, आर्थिक वृद्धि गर्न, प्राकृतिक स्रोतहरूको दिगो व्यवस्थापन गर्न, गुणस्तरीय स्वास्थ्य सेवा तथा शैक्षिक प्रणालीहरू सुधार गर्न, लोकतान्त्रिक शासनलाई सुदृढ गर्न र प्राकृतिक विपद्हरू न्यूनीकरण गर्ने नेपालको क्षमतालाई मजबुत बनाउन प्रयोग गरिने उनले जनाए।
'अमेरिका-नेपाल सम्बन्धका आगामी ७५ वर्षको सुरुवात गर्दै गर्दा म समस्त नेपालीहरूले यो जानुन् भन्ने चाहन्छु कि नेपालप्रति अमेरिकाको गहिरो र अटल स्नेह छ। अमेरिकीहरू नेपालको प्राकृतिक सौन्दर्य, तपाईंहरूको सांस्कृतिक समृद्धि, जातीय विविधता, स्वादिष्ट खाना, शानदार हिमालहरू, गर्जने नदीहरू, र अपत्यारिला वन्यजन्तुबाट आकर्षित हुन्छन्। तर तपाईं नेपालीहरूको विश्व प्रसिद्ध न्यानो आतिथ्यप्रति हामी सबैभन्दा बढी आकर्षित हुन्छौँ,' बेरीले भने, 'र यो नै हाम्रो सम्बन्धको आधारशिला हो जसले हामीलाई अघि बढाउनेछ र हाम्रा जनताहरूलाई नयाँ, रोमाञ्चक र परिवर्तनकारी तवरले सहकार्य गर्न सघाउनेछ। अझै राम्रा कुरा आउन बाँकी नै छन्।'
नेपाल तथा अमेरिकाबीच २५ अप्रिल १९४७ मा कूटनीतिक सम्बन्ध स्थापना भएको थियो। नेपालले ३ फेब्रुअरी १९५८ मा वाशिङ्गटन डीसीमा आफ्नो राजदूतावास स्थापना गरेको थियो भने अमेरिकाले त्यसको एक वर्ष पछि ६ अगष्ट १९५९ मा काठमाडौंमा आफ्नो दूतावास स्थापना गरेको थियो। ब्रिटेनका लागि नेपाली राजदूत, जनरल केशर शमशेर जबरा, अमेरिकाका लागि पहिलो नेपाली राजदूत नियुक्त गरिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
