धनगढी-कैलालीको धनगढीमा जारी प्रथम राष्ट्रिय मुख्यमन्त्री बीवाईसी महिला गोल्डकप फुटबल प्रतियोगिताको उपाधिका लागि विभागीय टोलीहरु एपीएफ क्लब र नेपाल पुलिस क्लब शनिबार भिड्दै छन्। धनगढी रंगशालामा शनिबार साँझ हुने फाइनलमा दुवै टोली उपाधिका लागि भिड्न लागेका हुन्।
वनदेवी युवा क्लबको आयोजना वैशाख ३ गतेदेखि सुरु भएको प्रतियोगिताको उपाधि जित्ने दाबी दुवै टिमले गरेका छन्। शुक्रबार धनगढी रंगशालामा भएको प्रि–म्याच कन्फ्रेन्समा फाइनलिष्ट दुवै टोलीका कप्तान र प्रशिक्षकले उपाधि जित्ने दाबी गरेका हुन्। उत्कृष्ट लयमा रहेको एपीएफकी कप्तान अनिता बस्नेतले फाइनल जित्नका लागि खेल्ने बताइन्। उनले रातिको समयमा खेल्दा केही कठिनाइ भएको भए पनि उपाधि आफ्नो टिमले जित्ने दाबी गरिन्।
‘पहिलो पटक लाईटमा खेल्दा आउने समस्याले गाह्रो भइरहेको छ। कुनै बेला लाइट बिग्रिँदा खेलको रिदम बिग्रने समस्या छ,’ कप्तान बस्नेतले भनिन्,‘सात वर्षपछि फाइनलमा पुगेका छौं। महिला गोल्डकप पहिलो पटक भएको हुँदा जसले हामी सबैलाई उत्साहित बनाएको छ। हामी च्याम्पियन हुन्छौं। त्यही हिसाबको तयारी छ।'
एपीएफएका प्रशिक्षक जनकसिंह थारुले पनि जित्नको लागि खेल्ने बताए। ‘लिगमा पनि लगातार जितिरहेका छौं। नकआउट प्रतियोगिता पनि जित्छौं,’ प्रशिक्षक थारुले भने, ‘हामीले पुलिसलाई हराउँदै आएका छौं। फेरि हराएर उपाधि जित्छौं ।’ एपीएफले सेमिफाइनलमा आर्मीलाई ३–२ ले हराएको थियो भने क्वार्टरफाइनलमा विराटनगरलाई ८–० को फराकिलो अन्तरले हराएको थियो।
नेपाल पुलिस क्लबले पनि उपाधि जित्ने दाबी गरेको छ। लामो समयपछि प्रतियोगिताहरुको फाइनलमा पुगेकाले सोही अवसरलाई मौकामा बदल्ने पुलिसको दाबी छ। पुलिसकी कप्तान घिमकुमारी गुरुङले पनि जित्नका लागि खेल्ने बताइन् । ‘जित्नका लागि खेल्छौं। सबै जनाले त्यहीअनुसार तयारी गरेका छौं,’ कप्तान गुरुङले भनिन्, ‘लाइटमा नयाँ अनुभव लिइरहेका छौं। रमाइलो पनि भइरहेको छ। दिउँसो खेलेको भए गर्मी हुन्थ्यो। राति हुँदा सजिलो पनि भएको छ।’
पुलिसका प्रशिक्षक सञ्जिव जोशीले पनि जित्नकै लागि फाइनल खेल्ने बताए। ‘धेरै वर्षपछि फाइनल पुगेका छौं। जित्नका लागि खेल्छौं,’ प्रशिक्षक जोशीले भने,‘मैदानमा केही समस्या छ। बललाई चाहेअनुसार खेलाउन गाह्रो भइरहेको छ। नयाँ फर्मेसनअनुसार टिमले पनि प्रगति पाइरहेको छ। राम्रै नतिजा आउँछ।’ पुलिसले सेमिफाइनलमा आयोजक वनदेवी युवा क्लबलाई ३–० को अन्तरले हराएको थियो भने क्वार्टरफाइनलमा चन्द्रपुर नगरपालिकालाई १–० ले हराएको थियो।
शनिबार धनगढी रंगशालामा समापन हुने गोल्डकपको विजेताले ट्रफीसहित नगद ५ लाख र उपविजेताले ट्रफीसहित २ लाख ५० हजार रुपैयाँ पुरस्कार राशि प्राप्त गर्नेछ। प्रतियोगितामा ओम्यान अफ दी म्याचलाई ५ हजार, त्यस्तै विभिन्न विधाका उत्कृष्ट खेलाडीलाई १० हजार र प्रतियोगिताभरि उत्कृष्ट हुने खेलाडीले नगद ५० हजार रुपैयाँ प्राप्त गर्ने आयोजक क्लबका अध्यक्ष सुसन जोशीले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
