डडेलधुरा– प्रधानमन्त्री एवम् कांग्रेस सभापति शेरबहादुर देउवाको गृह जिल्ला डडेलधुरामै कांग्रेस तीन चिरामा विभाजन भएको छ। जिल्लामा छैटौं जिल्ला अधिवेशका सभापति तथा प्रदेश सांसद कर्ण मल्ल पक्ष, वर्तमान अध्यक्ष भीमबहादुर साउद पक्ष र विपी कांग्रेस डडेलधुराका संयोजक तिलक हमाल पक्ष गरी कांग्रेस तीनतिर देखिएको हो।
फरकफरक रुपमा गाउँ केन्द्रित चुनावी अभियान गर्दै आएका उनीहरुले पार्टी कार्यालयसमेत अलगअलग बनाएका छन्। तत्कालीन पार्टी कार्यालय रहेको किसुनजी भवनमा साउदको टिमलाई प्रवेश निषेध भएपछि उनीहरुले सम्पर्क कार्यालयका नाममा पार्टी कार्यालय नै सुरु गरेका छन्।
जिल्ला अधिवेशनमा भएको क्रियाशील सदस्यताको विवाद स्थानीय तहको निर्वाचनमा प्रत्यक्ष पर्ने देखिएको छ। निवर्तमान सभापति मल्ल टिमले गाउँगाउँमा भेला गरिहेको छ। आधिकारिक उम्मेदवारलाई हराउन वागी उम्मेदवार उठाउने विषयमा समेत कांग्रेसको एक समूह लागिरहेको छ।
गठबन्धनको विषयमा पनि जिल्लामा दुई धार देखिएको छ। एक पक्ष तालमेल गर्नुपर्ने पक्षमा छ भने अर्को पक्ष एक्लै चुनाव लड्नुपर्ने बताइरहेको छ। जिल्लाका अधिकांश नेता कार्यकर्ताले गठबन्धनका नाममा पेल्न खोजिएमा तत्काल सामूहिक विद्रोह गर्ने चेतावनी नै दिएका छन्।
जिल्ला अधिवेशनका बेला जिल्लाभरका चार सय ६० जना क्रियाशील सदस्यको नाम काटेर माओवादीबाट समायोजनका नाममा तीन सय १२ क्रियाशील सदस्य केन्द्रबाटै थप गरिएपछि छैटौं जिल्ला अधिवेशनबाट निर्वाचित जिल्ला कार्यसमितिले सातौं जिल्ला अधिवेशन बहिष्कार गरेको थियो।
डडेलधुराका सभापति साउदले नेकपा माओवादी केन्द्र, नेकपा एकीकृत समाजवादी र जनता समाजवादीलगायत दलहरूसँग मिलेर गठबन्धन गरेर निर्वाचनमा जाने तयारी थालेका छन्। गठबन्धनका नाममा अन्य राजनीतिक दलहरूसँग मिलोमतो गर्ने काम भएको भन्दै छैटौं जिल्ला अधिवेशनबाट निर्वाचित पदाधिकारी तथा जिल्ला स्तरीय नेताहरूले आसन्न स्थानीय तह निर्वाचनका लागि छुट्टै अभियान सञ्चालन गरिरहेका छन्।
अन्य पार्टीसँग गठबन्धन गर्ने नाममा पार्टीका इमानदार कार्यकर्तालाई पाखा लगाइएकाले समानान्तर गतिविधि सञ्चालन भइरहेको डडेलधुराका नेता हरिप्रसाद भट्ट बताउँछन्। पार्टी नेतृत्वले टिकट नदिए आफू अमरगढी नगरपालिका प्रमुखमा स्वतन्त्र उम्मेदवारी घोषणा गरेर चुनावी अभियानमा लाग्ने उनी बताउँछन्।
यस्तै नेपाली कांग्रेस डडेल्धुराका निवर्तमान उपसभापति करुणाकर भट्टले कांग्रेसका नेता कार्यकर्ताहरू एक ढिक्का भएर स्थानीय तहको निर्वाचनमा होमिएमा जिल्लाका सात वटै स्थानीय तहमा नेपाली कांग्रेस विजयी हुने बताए। पार्टी सभापतिको गृह जिल्लामा गुटबन्दी चलाएर नेता कार्यकर्तामाथि अन्याय गरिएको उनले बताएका छन्।
यसैबीच, गठबन्धको वास्ता नगरी माओवादी केन्द्रले भागेश्वर गाउँपालिका अध्यक्ष र अजयमेरु गाउँपालिका वडा नम्बर २ मा उम्मेदवार नै खडा गरिसकेको छ। डडेल्धुरामा कांग्रेससँग बाराबर स्थानीय तह माग गरेको माओवादी केन्द्रका जिल्ला संयोजक उमेशप्रशाद भट्टले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
