काठमाडौं– आर्थिक संकटबाट गुज्रिरहेको श्रीलंकाका सबै मन्त्रीले राजीनामा बुझाएका छन्। आर्थिक संकट समाधानका लागि सरकारी प्रयास असफल रहेको भन्दै प्रदर्शन चर्किँदै गइरहेको बेला २६ मन्त्रीले राजीनामा पत्र बुझाएका हुन्।
तर, प्रधानमन्त्री महिन्दा राजपाक्ष र उनका भाइ राष्ट्रपति गोतबाया राजपाक्षले भने राजीनामा दिएका छैनन्। शिक्षामन्त्री दिनेश गुणवर्देनाले मन्त्रीपरिषद्का सदस्यहरुले प्रधानमन्त्री महिन्दालाई आइतबार राजीनामा पत्र बुझाएको बताए।
राजीनामा दिनेमा प्रधानमन्त्री महिन्दाका छोरा नामल राजपाक्ष पनि रहेका छन्। यसले प्रधानमन्त्री राजपाक्ष र राष्ट्रपति गोतबायालाई देशमा स्थायित्व कायम गर्नका लागि सहयोग गर्ने अपेक्षा रहेको उनले ट्वीटमा उल्लेख गरेका छन्।
सन् १९४८ मा बेलायतबाट स्वतन्त्र भएपछि श्रीलंकाको यो सबैभन्दा ठूलो आर्थिक संकट भएको बताइएको छ। यसको प्रमुख कारण इन्धन आयातका लागि आवश्यक पर्ने विदेशी मुद्रामा ठूलो कमी हुनु हो। मुलुक अहिले विद्युत्, खाद्यवस्तु, इन्धन र औषधिको अभावको सामना गरिरहेको छ। यस्तो अवस्थामा सरकारप्रति जनताको आक्रोश छ।
सन् २०१९ मा बहुमतका साथ सत्तामा आएका गोटाबाया राजपाक्षेको लोकप्रियतामा पनि भारी गिरावट आएको छ। निर्वाचनका बेला उनले स्थायित्व र बलियो सरकार बनाउने वाचा गरेका थिए।
आइतबार राजधानी कोलम्बोमा सयौं नागरिकले कर्फ्यूको उल्लंघन गर्दै राष्ट्रपति राजापाक्षेविरुद्ध जुलुस निकालेका थिए। सरकारले सामाजिक सञ्जाल अस्थायी रूपमा अवरुद्ध गरेपछि उनीहरुले जुलुस निकालेका हुन्।
विपक्षी समगी जन बालवेगया (एसजेबी) गठबन्धनका दर्जनौं राजनीतिज्ञ र यसका समर्थकहरू आइतबार कर्फ्यूको अवज्ञा गर्दै डाउनटाउन कोलम्बोको इन्डिपेन्डेन्स स्क्वायरनजिक भेला भएका थिए। उनीरुहरुले ‘गोटा गो ब्याक होम’ भन्ने नारा लगाएका थिए।
बढ्दो मुद्रास्फीति, खाद्यान्न अभाव र विद्युत् कटौतीको विरोधमा विपक्षी गठबन्धनले पनि राजधानीको बाहिरी शहरमा र्याली निकालेको छ। कोलम्बोको इन्डिपेन्डेन्स स्क्वायरमा प्रदर्शनकारीलाई रोक्न हतियारसहित प्रहरी र सैनिक खटाइएको थियो। तर, कर्फ्यूका बाबजुद प्रदर्शन भने रोकिएको छैन। प्रदर्शन चर्किँदै गएपछि मन्त्रीहरुले सामूहिक राजीनामा दिएका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
