काठमाडौं- नेकपा माओवादी केन्द्रका नेता मातृका यादवले केन्द्रीय सदस्य चयन गर्दा एउटा गुटलाई खुसी पार्न खोजेको भन्दै आपत्ति जनाएका छन्।
नेता यादवले गत फागुन २०-२३ मा सम्पन्न माओवादी केन्द्रको केन्द्रीय समिति बैठकबाट मनोनित सदस्यहरुबारे आपत्ति जनाउँदै पार्टी अध्यक्ष पुष्पकमल दाहाल प्रचण्डलाई पत्र लेखेका थिए।
केन्द्रीय समिति बैठक सकिएको भोलिपल्ट उनले पार्टी केन्द्रीय कार्यालयमा प्रचण्डलाई सम्बोधन गर्दै पत्र बुझाएका थिए।
जसमा केन्द्रीय समिति बैठकमा केन्द्रीय समितिका बाँकी पद(पूर्ण तथा वैकल्पिक) पूर्ति गर्दा आफूसँग सरसल्लाह नगरी एउटा गुटलाई खुसी पार्ने काम भएको भन्दै असन्तुष्टि जनाएका छन्।
माओवादीको केन्द्रीय समितिमा मधेश प्रदेशबाट ९ जनालाई थप गरेको थियो।
केन्द्रीय सदस्य थप गर्ने बेलामा मधेशका प्रभावशाली नेता यादवसँग अध्यक्ष प्रचण्डले सरसल्लाह गरेका थिएनन् भने नेता नारायणकाजी श्रेष्ठ पक्षका ९ जनालाई केन्द्रीय सदस्य बनाइएको आरोप यादव पक्षको छ।
केन्द्रीय समिति बैठक अघि अध्यक्ष प्रचण्डसँग रिसाएका नेता श्रेष्ठलाई खुसी पार्न मधेश प्रदेशको ९ जना केन्द्रीय सदस्य उनी पक्षबाट बनाइएको आरोप यादव पक्षको छ।
प्रचण्डलाई लेखेको पत्रमा यादवले भनेका छन्, 'केन्द्रीय समितिका बाँकी पदपूर्ति गर्दा कमरेडहरुको योग्यता र क्षमतालाई ध्यान दिनु पर्ने र पार्टीको सशक्तीकरण एवं आसन्न निर्वाचनलाई परिणाममुखी बनाउने आधारमा गर्नुपर्ने तर, मसँग यसबारे कुनै सरसल्लाहै नगरी एउटा गुटलाई खुसी पार्ने काम भएको छ।'
अध्यक्षको यस्तो निर्णयमा आफ्नो पूरै असहमति भएको यादवले पत्रमा उल्लेख गरेका छन्।
'एउटा गुटलाई खुसी पार्ने काम भएकोले मेरो पूरै असहमति भएको व्यहोरा अवगत गराउँछु' पत्रमा भनिएको छ।
पत्र पठाएको दुई साता हुन लाग्दासमेत यसबारे प्रचण्डले चासो नदिएको यादवपक्षको आरोप छ।
यादवले असन्तुष्ट नेताहरुले छलफलको माग गरेकाले छलफलमा सहभागी हुने पत्रमा उल्लेख गरेका छन् तर प्रचण्डले मधेश प्रदेशका असन्तुष्ट नेताहरुसँग छलफल गरेका छैनन्।
पछिल्लो समय प्रचण्डले नारायणकाजीलाई मधेश प्रदेशमा बढी स्पेस दिएको भन्दै नेता यादव असन्तुष्ट बनेका छन्।
प्रदेश कमिटीको इन्चार्ज तोक्ने बेलामा समेत नेता श्रेष्ठ र यादव पक्षबीच टकराव भएको थियो।
नारायणकाजीले गिरिराजमणि पोखरेललाई प्रदेशको इन्चार्ज बनाउन खोजेका थिए। तर, यादवले मधेशमा मधेशी अनुहार चाहिने भन्दै प्रतिवाद गरे। नारायणकाजी पक्षले मातृका यादवलाई स्वीकार नगरेपछि विकल्पको रुपमा गणेश साह इन्जार्ज तोकिएका थिए।
प्रचण्डसँग रुष्ट बनेका यादव बुधबार पार्टीले आयोजना गरेको प्रशिक्षण कार्यक्रममा समेत सहभागी भएका थिएनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
