काठमाडौं– नेकपा माओवादी केन्द्रका नेता एवम पूर्वमन्त्री मातृका यादव पार्टीले आयोजना गर्ने प्रायः कार्यक्रममा अनुपस्थित हुन्छन्। पार्टीले मधेश प्रदेशमा आयोजना गर्ने ठूला कार्यक्रममा यादव सहभागी हुँदैनन्।
मंगलबार मधेश प्रदेशको राजधानी जनकपुरमा आयोजना गरेको राजनीतिक प्रशिक्षण कार्यक्रममा पनि उनी अनुपस्थित रहे। मधेश प्रदेशबाट प्रतिनिधित्व गर्ने प्रायः नेता उपस्थित भएको कार्यक्रममा यादवलाई नदेख्दा प्रतिनिधिले अचम्म मानेका छन्।
जनकपुरको प्रशिक्षण कार्यक्रममा अध्यक्ष पुष्पकमल दाहाल ‘प्रचण्ड’ नेता नारायणकाजी श्रेष्ठ, प्रदेश इन्चार्ज गणेश साह, सह–इन्चार्ज विश्वनाथ साह, प्रदेश अध्यक्ष प्रह्लाद बुढाथोकीलगायत प्रदेशभरका नेता तथा कार्यकर्ता सहभागी थिए। तर, मधेशबाट प्रतिनिधित्व गर्ने माओवादीका नेता यादवले सहभागी भएनन्।
उनी तत्कालीन नेकपा हुँदादेखि नै मधेश प्रदेशका कार्यक्रममा अनुपस्थित हुन्थे। पार्टीमा रघुवीर महासेठलाई अध्यक्ष केपी शर्मा ओली र प्रचण्डले प्रभु साहलाई बढ्दा संरक्षण गरेको भन्दै उनी असन्तष्ट थिए। ओली तथा प्रचण्ड दुबैले वास्ता नगरेको भन्दै उनी पार्टीले आयोजना गर्ने कार्यक्रममा सहभागी हुन छाडे।
सर्वोच्च अदालतले एमाले र माओवादी केन्द्रलाई पुरानै अवस्थामा फर्काएपछि उनी मधेश प्रदेशका कार्यक्रममा ठ्याम्मै जान छोडेका छन्। ‘पार्टीले आयोजना गर्ने मधेश प्रदेशका कार्यक्रममा मातृका जीले उपस्थित नै जनाउनु भएको छैन। संयोगवस उहाँ मधेशमै भएकाबेला कार्यक्रम भयो भने देखिए जस्तो गरेर फुत्किनुहुन्छ,’ एक केन्द्रीय सदस्यले भने, ‘उहाँका असन्तुष्टिहरु धेरै छन्। फोनमा भन्न मिल्दैन भेट्ने अवसर मिलेमा भन्छु।’ मधेशमा पार्टीले आयोजना गर्ने कार्यक्रममा यादवलाई एलर्जी नै हुने गरेको ती केन्द्रीय सदस्यको आरोप छ।
यादवको असन्तुष्टि प्रदेश कमिटी गठन हुँदा बढ्दै गएको उनी निकट एक केन्द्रीय सदस्यले बताए। ‘प्रदेश कमिटी इन्चार्ज नारायणकाजी श्रेष्ठ निकट गिरिराजमणि पोखरेल हुन खोजेका थिए। त्यसबेला उहाँलाई बनाउन हुँदैन। मधेशमा मधेशी फेस हुनुपर्छ भन्दै मान्नु भएन,’ ती केन्द्रीय सदस्यले भने, ‘उहाँ(मातृका यादव)लाई उनीहरु(नारायणकाजी श्रेष्ठ)निकटले स्वीकार गर्ने कुरै भएन। त्यसपछि विकल्पका रूपमा गणेश साह इन्चार्ज हुनुभयो।’
साहले समेत दुबैपक्षलाई मिलाउने गरी इन्चार्जको भूमिका निर्वाह गर्न नसकेको भन्दै उनीसँग यादव पछिल्लो समय रुष्ट छन्। श्रेष्ठ निकटबाट पोखरेल इन्चार्ज हुन नसकेपछि प्रह्लाद बुढाथोकीलाई अध्यक्ष बनाइयो। विवादका बीच पार्टीबाट इन्चार्ज, अध्यक्ष र सचिव बनाएपनि प्रदेश अधिवेशनबाट नयाँ नेतृत्व आउन सकेको छैन।
सबै प्रदेशमा नयाँ नेतृत्वसहित पदाधिकारी टुंगो लागिसके पनि मधेश प्रदेशमा विवादका कारण टुंगो लाग्न सकेको छैन। यादव र श्रेष्ठ गुटका नेता भिड्ने गरेकाले साहले दुबै पक्षका नेता मिलाउन नसक्दा कमिटीले पूर्णता पाउन नसकेको एक नेताले बताए।
मधेश प्रदेशमा श्रेष्ठ निकटको पकट बलियो छ। त्यसैले उनीहरु मेधस प्रदेशमा बढ्ता भाग खोज्छन्। त्यसमा श्रेष्ठ पक्षले यादवलाई क्रस गर्न थालेपछि विवाद बढ्ने गरेको छ। महोत्तरीको बर्दिवासमा सहिद रामवृक्ष यादवको सालिक उखाडेर गिरिराजमणि पोखरेलले फालेको भन्दै यादवले चर्को विरोध जनाए। सहिदको सालिक फालेर अपमान गरेको भन्दै महाधिवेशनमा यादवपक्षका नेता सत्यनाराण भगतले राजनीतिक अपराध गरेको आरोप लगाएपछि बैठक नै रोकिन पुग्यो। अन्तमा भगतले माफी नै मागेपछि बैठक सुरु भयो। त्यो विवादमा समेत प्रचण्डले श्रेष्ठपक्षका नेताहरुलाई संरक्षण गरेको भन्दै यादव असन्तुष्ट छन्।
पार्टी केन्द्रीय समितिमा मधेश प्रदेशबाट कम समेटिएको भन्दै यादवले असन्तष्टि जनाएका थिए। त्यसमा प्रायः श्रेष्ठ निकट नेताहरु मात्रै समेटिएको भन्दै प्रचण्डसँग चिढिएका छन्। त्यसमा पनि प्रचण्डले श्रेष्ठ निकट नेताहरुलाई बोकेको भन्दै उनीहरु असन्तुष्ट छन्। श्रेष्ठसँग पार्टी एकता भएको १२÷१३ वर्ष हुँदासमेत एउटै पार्टीमा दुई पार्टी चलाएको भन्दै यादवले लगातार विरोध जनाउँदै आएका छन्। माओवादी पार्टीमा एकतामा आएपछि १२÷१३ वर्षसम्म मिसिन नसक्ने कस्तो खालको एकता भन्दै यादवले सार्वजनिक कार्यक्रममा समेत असन्तुष्टि जनाउने गरेका छन्।
प्रचण्डले श्रेष्ठपक्षका नेतालाई बढ्ता संरक्षण गरेको आरोप लगाएपनि प्रचण्डको सार्वजनिक रुपमा आलोचना भने गरेका छैनन्। प्रायः प्रचण्डलाई नियमित भेट्ने नेतामा पर्छन् यादव। प्रचण्डको परिवारसँग पनि उनी नजिक छन्। प्रायः सार्वजनिक कार्यक्रममा प्रचण्डको दरो संरक्षण गरेर प्रतिवाद गर्छन्। तर, मधेश प्रदेशको सवालमा प्रचण्डले आफूलाई अन्याय गरेको भन्दै सार्वजनिक कार्यक्रमा अनुपस्थित हुन्छन्। त्यस वारेमा प्रचण्डले समेत सार्वजनिक रुपमा यादवको आलोचना गरेका छैनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1788274741.jpg)
-1786602170.png)
-1786513116.png)
