काठमाडौं– २०७५ मा एसिड आक्रमणमा परेकी बसन्ती परियारको जीवनमा आधारित रहेर बनेको भिडियो सामग्री ‘बसन्ती’ सार्वजनिक भएको छ। नबिल बैंकले निर्माण गरेको उक्त सामग्री मंगलबार काठमाडौंमा आयोजित एक कार्यक्रममा सार्वजनिक भएको हो।
कार्यक्रममा नेपालमा एसिड आक्रमणको विषयमा बहस पनि राखिएको थियो। कार्यक्रममा नबिल बैंकका सीईओ अनिल केशरी शाह, अधिकारकर्मी उज्जवल थापा, एसएसपी दुर्गा सिंह, डा. रोजिना शिल्पकार र सञ्चारकर्मी आरती चटौतबीच संवाद भएको थियो। कार्यक्रममा एसिड सर्भाइभर बसन्ती परियारले आफूले भोग्नुपरेको कथा सुनाएकी थिइन्।
बाल्यकालबाटै मोडल बन्ने सपना बोकेकी बसन्तीले आफूलाई नबिल बैंकले त्यो सपना पूरा गर्न मद्दत गरेको उनले बताइन्। नबिल बैंकले निर्माण गरेको भिडियो सामग्रीमा बसन्तीले एसिड आक्रमणपछि भोग्नु परेको कुरा र फेरि साधारण जीवनमा फर्किन गरेको संघर्षलाई प्रस्तुत गरिएको छ।
कार्यक्रममा अधिकारकर्मी उज्ज्वल थापाले बसन्ती एक पात्रमात्रै भएको र समाजमा यस्ता घटनाहरु थुप्रै घटेको बताए। उनले एसिड आक्रमणजस्तो जघन्य अपराध हुन नदिन एसिडको बिक्री वितरणलाई पूर्ण रुपमा रोक लगाउनुपर्ने बताए।
उनले भने, ‘मलाई यो काम किन गर्नुहुन्छ भनेर सोध्नुहुन्छ। तर, म सोध्छु, के तपाईं यो पीडा देख्नुहुन्न?’ उनले बसन्तीले भोग्नु परेको पीडा शाररिकसँगै सामाजिक पनि भएको बताए। उनले भने, ‘तर, उहाँमा भएको नारी शक्तिका कारण आज हामीमाझमा हुनुहुन्छ।’
त्यस्तै, एसएसपी दुर्गा सिंहले एसिड आक्रमण महिला हिस्साको एक रुप भएको बताइन्। उनले महिला हिंसाको हतियारको रुपमा एसिड प्रहारको घटना भइरहेको बताइन्। उनले भनिन्, ‘बदलाको भावनामा, सुन्दरता बिगारिदिन्छु भन्ने भावनामा यी घटना घटेका छन्। कानुन हुँदाहुँदै पनि प्रभावकारी हुन सकेको छैन।’
उनले यस्तो अपराधमा कानुनी बाटो पहिल्याउने र अपराध हुन नदिन जनचेतना फैलाउनु पर्ने बताइन्।
त्यस्तै, चिकित्सक डा. रोजिना शिल्पकारले जलनप्रति जनचेतना, रोकथामका विषयमा ध्यान नदिइएको बताइन्। उनले जलनको पीडा शारीरिक मात्रै नभएर मानसिक पनि हुने भएकाले यसमा सरकारले नै ध्यान दिनुपर्ने बताइन्।
उनले भनिन्, ‘पहिलो कुरा त जलनको उपचार भनेकै रोकथाम हो। यसलाई हुन दिनुहुँदैन। अर्को कुरा जलनलाई लिएर जनचेतना, यो भइहालेमा के गर्ने भन्नेमा जानकारी सबैलाई दिनुपर्छ।’
त्यस्तै, सञ्चारकर्मी आरती चटौतले समाजमा भइरहेका एसिड आक्रमणका घटनामा समाज पनि जिम्मेवार हुने बताइन्। एसिड आक्रमणलाई न्यूनीकरण गर्नमा सञ्चारको पनि महत्त्वपूर्ण भूमिका हुने बताउँदै उनले एसिड आक्रमणजस्ता अपराध हुन नदिनमा भूमिका खेल्नुपर्ने बताइन्। उनले भनिन्, ‘मिडियामार्फत जनचेतना जगाउने कुरामा कर्पोरेटले पनि लगानी गर्नुपर्छ। यी विषयमा जनचेतना आवश्यक छ।’
भारतमा जन्मिएकी बसन्ती परियार १२ वर्षको उमेरमा नेपाल आएकी थिइन्। २०७५ सालमा उनीमाथि उनका छिमेकी विमल शेर्पालीले एसिड आक्रमण गरेका थिए। उक्त घटनामा उनको शरीरको २५ प्रतिशतसम्म भाग जलेको थियो।
कार्यक्रममा नबिल बैंकका सीईओ शाहले बसन्ती एक मोडलको रुपमा मात्रै नभएर रोल मोडलको रुपमा पनि रहेको बताए। उनले भने, ‘उहाँले गर्नुभएको संघर्ष हाम्रो समाज, हामी सबैंका लागि रोल मोडलको काम हो।’
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
