काठमाडौं- दोस्रो संस्करणको नेपाल सुपर लिग (एनएसएल) फुटबल प्रतियोगिताप्रति असन्तुष्ट रहेका सहिद स्मारक ‘ए’ डिभिजन लिग खेल्ने ४ क्लबले पत्रकार सम्मेलन गर्ने भएका छन्।
चैत २६ गतेदेखि सुरु हुन लागेको दोस्रो संस्करणको एनएसएल फुटबल प्रतियोगिताको विपक्षमा रहेका ८ मध्ये ४ क्लबले मात्रै पत्रकार सम्मेलन गर्न लागेका हुन्।
शनिबार जारी गरिएको सूचना अनुसार आइतबार दिउँसो २ बजे दशरथ रंगशालामा पत्रकार सम्मेलन गर्न लागिएको हो। उक्त सूचनामा न्यूरोड टिम (एनआरटी), मनाङ मस्र्याङ्दी, थ्रीस्टार र संकटा क्लबका पदाधिकारीले मात्रै हस्ताक्षर गरेका छन्।
नाम भने लिग विजेता मछिन्द्र फुटबल क्लब , संकटा क्लब, न्यूरोड टिम, मनाङ मर्स्याङ्दी क्लब, थ्रीस्टार क्लब, जावलाखेल युथ क्लब, फ्रेन्ड्स क्लबको पनि रहेको छ। तर, सातदोबाटो युथ क्लबको नाम र मछिन्द्र, जावलाखेल युथ र फ्रेन्ड्स क्लबका पदाधिकारीको हस्ताक्षर नहुनु उनीहरु यसअगाडिको निर्णयबाट पछि हटेको बुझिन्छ।
यसअघि यी आठै क्लबले धमाधम एनएसएलले मार्की खेलाडी र प्रशिक्षकहरू नियुक्त गरेर गोल्डकप खेल्ने तयारीमा रहेका खेलाडीलाई प्रभावित बनाइरहेको भन्दै संयुक्त प्रेस विज्ञप्तिमार्फत् आयोजकलाई सचेत गराइदिन अखिल नेपाल फुटबल संघ (एन्फा)लाई आग्रह गरेका थिए।
त्यसपश्चात्, एन्फाका पदाधिकारी र असन्तुष्ट ८ क्लबबीच बसेको बैठकले अक्सन स्थगित गर्न एनएसएल आयोजक नेपाल स्पार्ट्स एन्ड इभेन्ट म्यानेजमेन्ट प्रालीलाई पत्र काटेको थियो।
तर, एनएसएल आयोजकले अटेर गर्दै अक्सन गरेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
