काठमाडौं– भन्सार विभागले डिजिटल कारोबारको माध्यमबाट एक महिनामा ७ अर्बभन्दा बढी राजस्व संकलन गरेको छ। विभागले माघ मसान्तसम्म ७ अर्ब ४ करोड बराबरको राजस्व संकलन गरेको हो।
डिजिटल संकलनको व्यवस्था १ पुसदेखि सुक्खा बन्दरगाह वीरगञ्ज भन्सार कार्यालयबाट सुरु भएको थियो। यद्यपि, अर्थमन्त्री जनार्दन शर्माले माघ १२ गते औपचारिक उद्घाटन गरी देशभरीका सबै भन्सार कार्यालयहरुमा कार्यान्वयन गरिएको थियो।
भन्सार विभागको प्रज्ञापनपत्र सम्बन्धी भुक्तानी एनसीएचएल तथा बैंक वित्तीय संस्थाका विभिन्न च्यानलहरुसँग जोडी विद्युत्तिय माध्यमबाट संकलनको सुरुवात भएसँगै ईपेमेन्टमार्फत विद्युत्तीय राजस्व संकलनमा उल्लेख्य बृद्धि भएको हो।
नेशनल पेमेन्ट स्वीच अन्तर्गत भन्सार विभागको भुक्तानी संकलनलाई रियल टाईम तथा नन्रियल टाईम दुवै माध्यमबाट संकलन गरिने व्यवस्था हुँदा माघ मसान्तसम्म रिटेल पेमेन्ट स्वीचमार्फत रियल टाईममा ३.४ अर्ब र एनसीएचएल–आईपिएसमार्फत नन्रियल टाईममा ४ अर्ब बराबरको संकलन भएको विभागले जनाएको छ।
भुक्तानी गर्नका निम्ती भन्सार एजेन्ट वा आयातकर्ताले भन्सारको अनलाइन प्रणालीबाट रजिष्ट्रेशन वर्ष, रजिष्ट्रेशन नम्बर, भन्सार विभागको कोड तथा प्रज्ञापनपत्र नं. प्राप्त गरी उपलब्ध कुनैपनि च्यानलमा सो विवरण दाखिलागरी अनलाइन भुक्तानी गर्नसक्दछन् । यसरी भुक्तानी गर्दा कारोबार सीमा भने छनोट गरिएको प्रणाली अनुसारको हुन्छ ।
भन्सार एजेन्ट तथा आयातकर्ताले सोझै आफ्नो बैंक खाताबाट कनेक्ट आईपीएस, कर्पोरेटपे तथा बैंक वित्तीय संस्थाको शाखाबाट भुक्तानी गर्न सक्दछन्। यो सेवा एनसीएचएलका विभिन्न सदस्य बैंक वित्तीय संस्थाका मोबाइल/ईन्टरनेट बैंकिङ तथा सदस्य भुक्तानी सेवा प्रदायक (वालेट) हरुमा पनि चाँडै उपलब्ध हुने बताइएको छ। भन्सार विभागका सम्पूर्ण भुक्तानीहरु पहिले नगद वा चेकमार्फत हुने गरेका थिए।
देशभरीका भन्सार नाकाहरुबाट आयात कर, भ्याट, अन्तः शुल्क लगायतका विभिन्न करहरु संकलन हुने कुल राजस्वको ४४ प्रतिशत ओगटेको छ भने सरकारी करको हकमा ५० प्रतिशत योगदान गरेको छ। यसरी भन्सार विभागको अनलाइन संकलन सेवाको सुरुवातले विभागको सेवा प्रवाहमा उल्लेखिय सुधार ल्याई विभागको ‘क्यासलेस र फेस लेस’सेवा दिने नीतिलाई सहयोग गर्ने अपेक्षा गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
