काठमाडौं– नेकपा माओवादी केन्द्रका अध्यक्ष पुष्पकमल दाहाल (प्रचण्ड)ले एमसीसीमाथि संसदीय समितिमा पनि छलफल हुनुपर्ने प्रस्ताव अगाडि सारेका छन्।
सत्तारुढ गठबन्धनका शीर्ष नेताहरुबीच आइतबारको छलफलमा प्रचण्डले एमसीसी सम्झौता संसद्मा टेबुल गर्ने नै भए छलफलका लागि समितिमा लैजानुपर्ने प्रस्ताव राखेका हुन्।
'अध्यक्ष प्रचण्डले कुनै पनि विधेयक सरकारको तर्फबाट सदनमा टेबुल गर्नु सैद्धान्तिक हिसाबले स्वाभाविक प्रक्रिया भएतापनि हाल लामो समयदेखि सदन अवरुद्ध भएको र अरु कुनै पनि विधेयक टेबुल नभएको अवस्थामा सभामुखलाई एमसीसी मात्र टेबुल गर्नुपर्छ भन्नु उपयुक्त नहुने कुरा प्रष्ट गर्नुभयो,' प्रचण्डका स्वकीय सचिव रमेश मल्लले भने।
मल्लका अनुसार प्रचण्डले समितिमा छलफलको प्रस्ताव राखेपनि प्रधानमन्त्री शेरबहादुर देउवाले भने टेबुल गरेर प्रक्रियामा लैजानुपर्ने अडान राखेका छन्।
आइतबारको बैठकमा गठबन्धनका शीर्ष नेताहरु एमसीसीमाथि सदनमै छलफल गर्नेगरी संसद्मा टेबुल गर्न सहमत भएका हुन्।
गठबन्धनको बैठकपछि सञ्चारकर्मीसँग कुरा गर्दै सरकारका प्रवक्ता समेत रहेका सञ्चार तथा सूचना प्रविधिमन्त्री ज्ञानेन्द्र बहादुर कार्कीले आज (आइतबार)को बैठकमा एमसीसी टेबल हुने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
