काठमाडौं– एमसीसी परियोजना अनुमोदन गर्ने विषयलाई लिएर सत्ता साझेदार दलहरुबीचमै तीव्र मतभेद छ। प्रधानमन्त्री एवम् नेपाली कांग्रेसका सभापति शेरबहादुर देउवा जसरी पनि फागुन १६ गतेभित्र संसदबाट एमसीसी अनुमोदन गराउनुपर्ने अडानमा छन्। उनले निरन्तर रुपमा सत्ता गठबन्धनमा रहेका दलहरुसँग संवाद गरिरहेका छन्। तर, सहमति जुट्न सकेको छैन। गठबन्धनमा रहेका दलहरुले नै सहयोग गर्ने परिस्थिति नदेखेका देउवाले प्रमुख प्रतिपक्षी दलसँगको संवादलाई पनि निरन्तरता दिएका छन्।
बिहीबार बालुवाटारमा गठबन्धन दलहरुबीच छलफल गरेका देउवा सोझै प्रमुख प्रतिपक्षी दलका नेता एमाले अध्यक्ष केपी शर्मा ओलीसँग भेटवार्ता गर्न बालकोट पुगे। पत्नी आरजु राणालाई समेत साथमा लिएर बालकोट गएका प्रधानमन्त्री देउवाले त्यहाँ डेढघन्टा लामो छलफल गरेका थिए।
छलफलमा प्रधानमन्त्री देउवाले एमसीसी संसदबाट अनुमोदन गराउनका लागि सहयोग गर्न एमाले अध्यक्ष ओलीलाई आग्रह गरेका छन्। उनले यसअघिको भेटमा पनि यस्तो आग्रह गरेका थिए। तर, नेकपा एमालेले यस बारे कुनै ठोस जवाफ दिइसकेको छैन।
बिहीबारको भेटमा पनि प्रधानमन्त्रीले प्रमुख प्रतिपक्षी दलका नेतालाई एमसीसीलगायत विषयमा सहकार्य गरेर जानुपर्ने प्रस्ताव राखेका थिए। ‘प्रधानमन्त्री ज्यू अहिले गठबन्धनबाट नै अप्ठ्यारोमा हुनुहुन्छ। त्यसैले उहाँले अध्यक्षलाई भेटेर सहयोग माग्नु भएको हो,’ ओली निकट एक नेता भन्छन्, ‘एमाले विरुद्ध गठबन्धन बनाउनु भएको थियो। अहिले अप्ठ्यारोमा प्रधानमन्त्री पर्नुभएको देखिन्छ।’
बिहीबारको भेटका बारेमा ब्रिफिङ सुनेका अर्का एक नेता भन्छन्, ‘प्रधानमन्त्रीले सहकार्य गरेर जाउँ भन्ने प्रस्ताव राख्नुभयो। तर, अध्यक्षले आफ्नो प्रष्ट अडान र धारणा उहाँलाई राखिसक्नुभएको छ।’ ती नेताका अनुसार बिहीबारको भेटमा पार्टी अध्यक्ष ओलीले गठबन्धनसँगको सम्बन्ध टुंगो नलागेसम्म कुनै सहकार्य नहुने प्रष्ट पारेका थिए। ‘अहिले तपाईले गठबन्धनको नेतृत्व गरिरहनु भएकै छ। बहुमतमै हुनुहुन्छ। गठबन्धनका दललाई मिलाएरै जानुस्,’ ओलीको भनाइ उद्धृत गर्दै ती नेताले भने, ‘होइन हामीसँगको सहकार्य नै खोज्नु भएको हो भने तपाईं र गठबन्धनको सम्बन्ध टुंगो नलागेसम्म त्यो सम्भव हुँदैन।’
ओलीले कांग्रेससँग सहकार्य गरेर जाने विषयमा एमालेलाई समस्या नहरेको भन्दै पहिले गठबन्धनका विषयमा निर्णय गर्न आग्रह गरेका थिए। प्रधानमन्त्रीले पनि आफूले सकेसम्म सहमति कायम गराउन प्रयास गरेको भन्दै हुँदै नभए त्यसपछिको परिस्थिति बेग्लै हुने जवाफ दिएका थिए।
नेकपा एमालेका प्रमुख सचेतक विशाल भट्टराईले पनि प्रधानमन्त्रीले पार्टी अध्यक्षसँगको भेटमा सहयोगका लागि आग्रह गरेको र जवाफमा अध्यक्षले गठबन्धनको सम्बन्ध के हो भन्ने प्रष्ट नभएसम्म एमालेले सहयोग गर्न नसक्ने जवाफ दिएको जानकारी दिए।
‘एमसीसी पास गर्नका लागि गठबन्धनकै स्पष्ट बहुमत पुगेकै छ। एमालेले केही गर्नु आवश्यक नै छैन,’ भट्टराई भन्छन्, ‘सरकार र गठबन्धनले के निर्णय गर्छ। उनीहरुले टेबुल गर्छन् कि गर्दैनन् त्यो स्पष्ट नभइ अहिले नै एमालेले धारणा बनाइरहनु जरुरी देखिँदैन।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
