काठमाडौं- नेकपा (एमाले)का नेता डा भीम रावलले १४ वर्षदेखि अलपत्र माथिल्लो कर्णाली जलविद्युत आयोजनामा भारतीय कम्पनी जीएमआरलाई थप समय दिने सरकारको निर्णयप्रति आपत्ति जनाएका छन्।
बिहीबार एक विज्ञप्ति जारी गर्दै रावलले जीएमआरले आयोजना नबनाउने र केवल ओगटेर नेपालको उर्जा विकासमा अवरोध सिर्जना गरेको भन्दै राष्ट्रिय हित र सम्झौताका प्रावधान विपरीत थप दुई वर्ष समय दिने निर्णय खेदजनक भएको बताएका हुन्।
‘काम नगर्ने कम्पनीसँग सम्झौता तोड्नुको सट्टा समय थप्नु राष्ट्रिय हितमाथिको कुठाराघात हो,’ उनले भनेका छन्,‘आयोजना विकास सम्झौता गरेको सात वर्ष वितिसक्दा आयोजनाको काममा जोड दिनुको साटो सम्झौताका प्रावधान विपरीत म्याद थप्नु प्रधानमन्त्री शेरबहादुर देउवाले नेपालको राष्ट्रिय हितमाथि कुठाराघात गरेको र विदेशी कम्पनीका सामू लम्पसार परेको ठहर्छ।’
सम्झौताको तोकिएको अवधिभित्र काम नगर्दा थप्ने समय घटाएर पनि मोटामोटी हिसाब गर्दा जीएमआरले प्रति मेघाबाट प्रतिदिन १३८९ रुपैयाँका दरले नेपाललाई हालसम्म झण्डै डेढ अर्ब हर्जाना तिर्नुपर्ने उनको तर्क छ।
‘सम्झौता विपरीत माथिल्लो कर्णाली जलविद्युत आयोजनामा राष्ट्रिय हितमा गरिएको आघातको निन्दा गर्दै यसलाई सच्याउन माग गर्दछु,’ विज्ञप्तिमा भनिएको छ,‘माथिल्लो कर्णाली देशमै सबैभन्दा कम लागतमा ९ सय मेघावाट विद्युत उत्पादन गर्न सकिने आयोजना भए पनि विदेशी कम्पनीले आफ्नो स्वार्थमा १४ वर्ष अल्झाउँदा विकासमा अवरोध गरेको छ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
