काठमाडौं– बालुवाटारमा सत्ता गठबन्धनको बैठक सुरु भएको छ। प्रधानमन्त्रीको सरकारी निवास बालुवाटारमा सत्तागठबन्धनका शीर्ष नेताबीचको बैठक सुरु भएको हो।
बैठकमा कांग्रेसका तर्फबाट सभापति शेरबहादुर देउवा, प्रकाशशरण महत, ज्ञानेन्द्रबहादुर कार्की, गगन थापा र कृष्णप्रसाद सिटौला सहभागी छन्। त्यसैगरी, माओवादी केन्द्रका तर्फबाट अध्यक्ष पुष्पकमल दाहाल ‘प्रचण्ड’ र नारायणकाजी श्रेष्ठ तथा एकीकृत समाजवादीबाट अध्यक्ष माधवकुमार नेपाल र झलनाथ खनाल सहभागी छन्। जनता समाजवादी पार्टीका बाबुराम भट्टराई र राजेन्द्र श्रेष्ठ सहभागी छन्। जसपा अध्यक्ष उपत्यकाबाहिर भएकाले बैठकमा सहभागी छैनन्।
गठबन्धनको एक घटक राष्ट्रिय जनमोर्चाले भने आफूहरुलाई बैठकबारे जानकारी नै नभएको बताएको छ। बुधबार प्रधानमन्त्री एवं नेपाली कांग्रेसका सभापति देउवा र नेकपा (माओवादी केन्द्र)का अध्यक्ष प्रचण्डबीच भएको छलफलपछि गठबन्धनको बैठक तय भएको थियो। आजको बैठकमा एमसीसीको विषयमा छलफल हुने जनाइएको छ।
जसरी पनि एमसीसी टेबल गरेर पास गर्नुपर्ने तयारीमा जुटेका प्रधानमन्त्री देउवाले गठबन्धनमा रहेका दलहरुकै असहयोगपछि निर्णायक छलफल गर्न लागेका हुन्।
एमसीसी पास नगरी नछाड्ने कांग्रेस अडान र पास गर्न जबरजस्ती गरे सरकार छाड्ने माओवादी अडानका बीच आजको गठबन्धन बैठकलाई महत्वका साथ हेरिएको छ।
एमसीसी पास गर्न नहुने भन्दै देशव्यापी विरोध प्रदर्शन भइरहेको छ। सरकारमा सहभागी रहेका दल नेकपा माओवादी केन्द्र र नेकपा एकीकृत समाजवादी पार्टीका जनवर्गीय संगठनहरुले नै एमसीसीको विरोधमा प्रदर्शन गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
