सोमबार बसेको एमाले संसदीय दलको बैठक
काठमाडौं– नेकपा एमालेका पाँच सांसदहरुले खाली कागजमा हस्ताक्षर गर्न अस्वीकार गरेका छन्। उनीहरुले प्रयोजन नखुलाइ हस्ताक्षर गर्न अस्वीकार गरेका हुन्।
एमालेको सोमबार बसेको संसदीय दलको बैठकमा सांसद्हरुको हस्ताक्षर संकलन गरिएको थियो। तर, आफूसहित पाँच जना सांसदहरुले हस्ताक्षर नगरेको झपट रावलले जानकारी दिए।
हस्ताक्षर नगर्नेहरुमा सांसदहरू घनश्याम भुसाल, भीमबहादुर रावल, दीपकप्रकाश भट्ट, पवित्रा निरौला खरेल र झपटबहादुर रावल छन्।
कतिपय सांसद्हरुले बैठकमा प्रधानन्यायाधीश चोलेन्द्र शमशेर राणाका विरुद्ध आएको महाभियोग प्रस्तावमा एमालेले 'काउन्टर' महाभियोग प्रस्ताव ल्याउन नहुने धारणा राखेका थिए। तर, अध्यक्ष केपी शर्मा ओली निकटका केही सांसदहरुले भने काउन्टर महाभियोग प्रस्तावको पक्षमा बोलेका थिए।
बैठकपछि पत्रकारहरुलाई प्रतिक्रिया दिँदै एमालेका प्रमुख सचेतक विशाल भट्टराईले हस्ताक्षर संकलन गरिएको र आवश्यक ठाउँमा प्रयोग हुने बताएका थिए।
'सम्पूर्ण सांसदहरुको हस्ताक्षर गरेर राखेका छौं। आवश्यक परेको ठाउँमा ती चिजहरुलाई उच्चस्तरीय नेतृत्वमा छलफल गरेर अगाडि बढाउने कुरा हुन्छ', भट्टराईको भनाइ थियो।
एमालेले काउन्टर महाभियोगबारे निर्णय गर्ने अधिकार शीर्ष नेतृत्वलाई दिएको छ। 'आजको बैठकमा सांसदहरुले आफ्नो मन्तव्य राख्दै वस्तुस्थितिको ठोस विश्लेषण गरेर, सम्पूर्ण कानुन र संविधानको अध्ययन गरेर, हिजोको घटनाक्रम र अहिलेको सत्तारुढ गठबन्धनले गरेको व्यवहारविरुद्ध कसरी प्रतिवाद गर्ने भन्ने बारेमा शीर्ष नेतृत्व बसेर ठोस निर्णय आओस् भन्ने सुझाव गएको छ', भट्टराईले भने, 'नेतृत्वले पनि यथाशीघ्र बैठक बसेर सबै पक्षको विश्लेषण गरेर यथोचित र समयमै निर्णय गर्ने वचनबद्धता आज पार्टी अध्यक्षले गर्नुभएको छ।'
बैठकमा एमाले अध्यक्ष ओलीले एमालेले कुनै उत्तेजना र आवेगमा नआइ सुझबुझका साथ निर्णय गर्ने बताइएका थिए। उनले संविधान र लोकतन्त्रको रक्षाका लागि पार्टीले कुनै कसर बाँकी नराख्ने बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778491729.jpg)
-1764146706.png)
