काठमाडौं– एमसीसी परियोजना अघि बढाउने विषयमा सत्ता गठबन्धनमा सहमति जुट्न सकेको छैन। शनिबार गठबन्धनका प्रमुख तीन शीर्ष नेताहरुबीचको छलफल पनि निष्कर्षविहीन भएको छ।
प्रधानमन्त्री एवं नेपाली कांग्रेसका सभापति शेरबहादुर देउवासँग एमसीसी परियोजनाकै विषयमा छलफल गर्न नेकपा माओवादी केन्द्रका अध्यक्ष पुष्पकमल दाहाल 'प्रचण्ड' र नेकपा एकीकृत समाजवादीका अध्यक्ष माधवकुमार नेपाल शनिबार बालुवाटारमा पुगेका थिए।
प्रधानमन्त्रीसँगको आजको छलफलमा कुनै ठोस कुराकानी नभएको बुझिएको छ। प्रधानमन्त्रीका प्रेस सल्लाहाकार गोविन्द परियारले बैठकमा कुनै निष्कर्ष ननिस्केको जानकारी दिए।
‘एमसीसी लगायतका विषयमा नै तीन नेताहरुबीच छलफल भएको हो,’ उनले भने, ‘छलफल निष्कर्षविहीन भयो। फेरि नेताहरुबीच छलफल हुने कुरा छ।’
उनले आजै साँझ अथवा भोलि नेताहरुबीच पुनः छलफल हुने जानकारी दिए। आजको बैठकमा पनि तीनवटै नेताहरुले आ–आफ्नो अडान कायमै राखेका थिए। स्रोतका अनुसार आजको बैठकमा प्रधानमन्त्री शेरबहादुर देउवाले संसद्को आउने बैठकमा एमसीसी टेबल गर्नुपर्ने प्रस्ताव प्रचण्ड र नेपालसमक्ष थिए। तर, उक्त प्रस्ताव प्रचण्ड र नेपालले अस्वीकार गरेका छन्।
‘प्रधानमन्त्रीले धेरै ढिलो गर्नु भएन। अब बस्ने बैठकमा नै एमसीसीलाई टेबल गरौं भन्नुभयो,’ बालुवाटार स्रोतले भन्यो। तर, अध्यक्षद्वय दाहाल र नेपालले अहिले नै एमसीसी टेबल गर्न नसकिने भन्दै प्रमुख प्रतिपक्षी दलसहित राजनीतिक दलहरुबीच साझा धारणा बन्नुपर्ने प्रष्ट्याएका थिए।
एमसीसी सम्झौता संसद्बाट अनुमोदन गर्ने विषयमा सत्ता गठबन्धनभित्र नै मतभेद देखिएको छ। प्रधानमन्त्री जसरी पनि एमसीसी सम्झौता अघि बढाउनुपर्ने पक्षमा देखिए पनि अन्य साझेदार दल भने सहमत भइसकेका छैनन्।
केहीदिन अघि अमेरिकी सहायक विदेश मन्त्री डोनाल्ड लूले नेताहरुलाई फोन गरेर एमसीसी फिर्ता हुने अवस्था आए अमेरिका–नेपाल सम्बन्धमा पुनःविचार हुन सक्ने चेतावनी दिए।
अमेरिकी सहायक विदेश मन्त्रीको टेलिफोनपछि एमसीसी परियोजना कार्यान्वयनमा लैजाने विषयमा नेताहरुमा थप दबाब बढेको छ। सत्ता गठबन्धन दलबीच नै सहमति हुन नसकेका बेला प्रमुख प्रतिपक्षी दल नेकपा एमाले भने पर्ख र हेरको नीति अबलम्बन गरिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
