काठमाडौं- नेपाली कांग्रेसका नेता मीन विश्वकर्माले अन्तर्राष्ट्रिय सम्बन्धलाई समेत अप्ठ्यारो पार्नेगरी एमसीसीको विषयलाई गिजोलिएको बताएका छन्।
मंगलबार न्यूज एजेन्सी नेपालसँगको कुराकानीमा नेता विश्वकर्माले एमसीसी परियोजनाबारे राजनीतिक दलहरुले नै गलत प्रचारबाजी गरि भ्रम सिर्जना गराएको उनले आरोप लगाए।
'राजनीतिमा यस्तो बेइमानी र बठ्याइँ नहुनुपर्ने हो। आफैँले प्रयास गरेर, आफैँले मागेर आफैँ प्रक्रियामा सामेल भइसकेपछि राष्ट्रिय राजनीतिको परिधिभित्र मात्रै छु भनि महशुस गरी अन्तर्राष्ट्रिय राजनीति र अन्तर्राष्ट्रिय सम्बन्धलाई समेत पनि अप्ठ्यारो पार्ने गरी जसरी यो विषय गिजोलियो, यो विषयलाई यसरी गिजोल्नु हुँदैन थियो' उनले भने।
एमसीसीमा जुन जुन दलहरु सम्बद्ध रहेका छन् उनीहरुले नै फरकमत राखेकोले त्यसो नगर्न कांग्रेसले अनुरोध गरेको उनको भनाइ थियो।
भ्रमहरु सिर्जना गरेर प्रचारबाजी गरिएको भन्दै उनले यस्तो प्रचारबाजीले मुलुकलाई, जनतालाई देशलाई अन्तर्राष्ट्रियस्तरमा धमिल्याउने काम भएको उनले बताए।
नेता विश्वकर्माले राष्ट्रिय सरोकारको विषय एमसीसी परियोजनालाई यथास्थितिमा राखेर गठबन्धन जोगाइराखेमा जनताले सत्तारुढ दलहरुलाई नपत्याउने बताए। राष्ट्रिय सरोकारको विषयलाई टुंगोमा पुर्याउनु पर्नेमा उनको जोड थियो।
गठबन्धनलाई जिवित राख्दै एमसीसी परियोजनाको विषयलाई टुंगोमा पुर्याउन आफूहरुले चाहेको भन्दै राष्ट्रिय सरोकारका विषयलाई पन्छाएर गठबन्धन जोगाउन तर्फ कांग्रेसको चासो नरहेको नेता विश्वकर्माले बताए।
'राष्ट्रिय सरोकारका मुद्दाहरु चाहीँ यथास्थितिमा रहने, त्यो कुनैपनि निष्कर्षमा नपुग्ने, तर गठबन्धन चाहीँ जोगाइरहनुपर्छ अथवा गठबन्धन टुट्छकि, गठबन्धन बिग्रिन्छकि भनेर राष्ट्रिय मुद्दालाई यथास्थितिमा लथालिङ्ग छोडेर गठबन्धन जोगाइ राख्दाखोरी जनताले हामीलाई पत्याउँदैनन्' उनले भने, 'राष्ट्रिय सरोकारका मुद्दाहरुलाई टुंगोमा पुर्याउनका लागि हामी गठबन्धनलाई पनि जिवित राख्दै, गठबन्धनलाई क्रियाशिल राख्दै, गठबन्धनलाई साथसाथै लिएर जादैँ यि मुद्दाहरु टुंग्याउन चाहान्छौँ । तर कथम् कदाचित यि मुद्दाहरुलाई पन्छाएर गठबन्धन जोगाऔँ भन्यो भने हाम्रो त्यतातिर खासै चासो रहदैनँ।'
उनले निर्वाचनलाई शतप्रतिशत् निष्पक्ष बनाउन कांग्रेसले प्रयत्न गर्ने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
