काठमाडौं– एउटा कलाकारको व्यक्तिगत र सार्वजनिक जीवनलाई लिएर उसका प्रसंशक निकै उत्सुक हुन्छन्। कलाकारले आफ्ना प्रसंशक र दर्शकसँग जोडिने माध्यमको रुपमा सामाजिक सञ्जाललाई प्रयोग पनि गरिरहेका हुन्छन्।
चाहे त्यो आफ्नो कामको विज्ञापन गर्नमा होस् वा व्यक्तिगत। कुनै कुरालाई सार्वजनिक गर्न, सामाजिक सञ्जालले कलाकारहरुको जीवनमा निकै ठूलो भूमिका खेलिरहेको हुन्छ।
तर, बलिउडमा यस्ता कलाकारहरु पनि छन्, जो सामाजिक सञ्जालभन्दा बाहिर छन्। राम्रो नाम र चर्चा कमाएका कलाकारहरु पनि सामाजिक सञ्जालभन्दा टाढा रहेका छन्। फेसबुक, इन्स्टाग्रामजस्ता सामाजिक सञ्जालमा उनीहरु प्रयोगकर्ताको रुपमा त छन्, तर त्यसको व्यवस्थापनमा उनीहरुको रुचि भने निकै कम हुन्छ। उनीहरु यी माध्यममा सक्रिय पनि छैनन्।
यसरी सामाजिक सञ्जालमा सक्रिय नभएका बलिउड कलाकार हुन्, आमिर खान। आमिर खान लामो समयदेखि भारतीय फिल्म क्षेत्रमा स्थापित नाम हो। उनले ‘थ्रि इडियट्स’, ‘लगान’, ‘दंगल’जस्ता थुप्रै ब्लकबस्टर फिल्म दिइसकेका छन्। तर, यी अभिनेता सामाजिक सञ्जालमा भने सक्रिय छैनन्। भारतीय अभिनय क्षेत्रमा सामाजिक सञ्जालको व्यापक प्रयोग हुन थालेको धेरै पछि मात्रै आमिरले आफ्नो इन्स्टाग्राम खोलेका थिए।
२०१८ मा उनले यो सामाजिक सञ्जालमा प्रवेश गरे। केही समयसम्म परिवारसँगका तस्बिरहरु पनि राखे। तर, पछिल्लो समय भने उनी पुरानै लयमा फर्किएका छन्। अर्थात उनी फेरि निस्क्रिय बनेका छन्। २०२१ मा उनी सामाजिक सञ्जालबाट पूर्ण रुपमा टाढा बने।
२०२२ मा पनि उनको यो शैलीले निरन्तरता पायो। भारतीय सञ्चारमाध्यमसँगको कुराकानीमा भने उनले आफ्नो काममा केन्द्रित हुनका लागि सामाजिक सञ्जालभन्दा बाहिर रहेको बताउँदै आएका छन्। उनले सार्वजनिक रुपमै केही समयअघि घोषणा गरेर सामाजिक सञ्जालभन्दा बाहिर रहने बताएका थिए।
सामाजिक सञ्जालमा सक्रिय नरहेका अर्का अभिनेता हुन्, सैफ अलि खान। बलिउड अभिनेता खानले सधैं सामाजिक सञ्जालसँग दूरी राखेका छन्। इन्स्टाग्राम, ट्विटर र फेसबुकलगायतका सामाजिक सञ्जालमा उनको आफ्नो अकाउन्ट छैन। उनका प्रसंशकहरुले उनको नाममा विभिन्न पेज र अकाउन्ट बनाएको भएतापनि उनको व्यक्तिगत अकाउन्ट भने हासम्म खोलिएको छैन।
बलिउडकी भर्सटायल अभिनेत्री रानी मुखर्जी पनि सामाजिक सञ्जालभन्दा बाहिर छिन्। उनको पनि कुनै पनि सामाजिक सञ्जालमा अकाउन्ट छैन। सैफ अलि खानको जस्तै उनका प्रसंशकहरुले उनको नाममा ‘फ्यान पेज’ त खोलेका छन्। तर, व्यक्तिगत रुपमा मुखर्जीले भने हालसम्म आफ्नो कुनै पनि अकाउन्ट नभएको बताएकी छिन्।
बलिउडका ‘रकस्टार’ अभिनेता रणविर कपुर पनि सामाजिक सञ्जालभन्दा बाहिर छन्। उनकी ‘अघोषित’ प्रेमिका आलिया भट्टले समय समयमा रणविरसँग छुट्टि मनाउन गएको तस्बिर सामाजिक सञ्जालमा राख्छिन्। तर, रणविर आफैं भने कुनै पनि सामाजिक सञ्जालमा छैनन्।
‘जाने तु या जाने ना’ फिल्मका अभिनेता इमरान खान पनि सामाजिक सञ्जालभन्दा बाहिर रहेका अभिनेता हुन्। इन्स्टाग्राममा उनको नाममा अकाउन्ट त छ। तर, त्यो अकाउन्ट वर्षौंदेखि निस्क्रिय छ। उनले आफ्नो इन्स्टाग्रामकै बायोमा ‘सामाजिक सञ्जालदेखि असन्तुष्ट भएको’ उल्लेख गरेका छन्। उनले पछिल्लो पटक आफ्नो इन्स्टाग्राममा २०१८ मा पोष्ट गरेका थिए।
बलिउडकी अर्की अभिनेत्री वरीना हुसैनले पनि हालसालै सामाजिक सञ्जालबाट टाढा भएकी छन्। उनले २०२१ मै सामाजिक सञ्जालबाट सधैंका लागि टाढा जाने निधो गरेकी थिइन्।
उनले २०२१ मा अन्तिम पोष्ट गर्दै लेखेकी छिन्, ‘मैले कतै विदा हुनुअघि बताउन आवश्यक छैन भन्ने पढेको थिएँ। तर, म आफ्ना साथीहरु र प्रशंकका लागि अबदेखि सामाजिक सञ्जालबाट टाढा हुने जानकारी दिन्छु। अबदेखि मेरो नामका सामाजिक सञ्जालका अकाउन्ट मेरो व्यवस्थापनले चलाउने छ। म यी माध्यमबाट टाढा रहनेछु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
